Kwesi Gyasi na n'awofo tsenaa ekuraa bi a wᴐfrԑ no Asempaye mu. Ɔwᴐ nyɛnko bi a wᴐfrԑ no Kweku Twum. Kwesi Gyasi na Kwesi Twum kᴐ skuul kor wᴐ Asempaye na hᴐn nyina gyina gyinapԑn kor.

Kwesi Gyasi ne maame wᴐfrԑ no Maame Abᴐkuma na ne papa so ne dzin dze Papa Kodwo Mensa. Dabaa Maame Abᴐkoma tu ne ba Kwesi Gyasi fo dԑ mma onnguar nsu a ᴐtaa fakor da osiandԑ ᴐyԑ hu.

Wᴐmaa skuul kwan no, ne nyԑnko Kweku Twum tuu kwan kᴐr Simpa. Ɔkԑdzii akwanma no wᴐ ne wᴐfa Kobina Amfo hᴐ. Ɔyԑ ᴐfar nyi mapa a ᴐwᴐ hԑmba pii wᴐ Simpa.

Kweku Twum fii akwantu mu bae no, ᴐkᴐhwehwԑԑ ne nyԑnko Kwesi Gyasi bᴐᴐ n'akwanma mu amandzԑԑ kyerԑԑ no nkanka nsu mu eguar. Ɔmaa Kwesi Gyasi hun dԑ nsu mu eguar yԑ dԑw. Kwesi n'enyi gyee amandzԑԑ no ho. Na ne yamu a nkyԑ ᴐnye no kᴐree.

Da kor ewiaber bi anyԑnkofo yi yԑԑ adwen dԑ wᴐbᴐkᴐ nsu no mu ekoguar. Wᴐannkra obiara.

Wokodur nsu no ho pԑr na Kweku huruwii tᴐᴐ nsu no mu. Nna nsu no yԑ nwin. Kweku frԑԑ Kwesi Gyasi dԑ ᴐmbeka noho wᴐ nsu no mu ᴐkaa ne na n'afutu.

Kweku fii nsu nomu pue na odzii ne nyɛnko Kwesi n'adwen ma ᴐkekaa noho wᴐ nsu no mu. Ekyir yi ᴐgyee tum ma wↄkoguaree. Woguaree ara yie ma hᴐn enyi gyee dodow.

Afei nna mber rᴐkᴐ. Nna adze resa. Kweku kaa kyeree ne nyonko, Kwesi dԑ ᴐmma wↄnkᴐ fie. Ofii nsu no mu, ᴐpepaa noho, na ᴐhyԑԑ n'atar. Nna Kwesi da ho reguar, Kwesi kaa dԑ "aka kor."

Ekyirii no Kwesi fii nsu no mu. Ɔyԑԑ dԑ orifi nsu no mu ara na ᴐtsee dԑ biribi atwe ne nan wᴐ nsu no ase. Nna onnhu n'adzeban.

Ɔhwԑԑ no nna ᴐyԑ denkyem, Nsu no mu bosom. Otsiem frԑԑ mboa.

Kweku Twum tsee nkakamu no, ᴐtuu mereka koboa ne nyɛnko no yii no fii nsu no mu. Kwesi n'enyiwado siw no. Ɔtuu emerika kᴐhwehwԑԑ mboa fii ekuraa no ase.

Ekuraa no asefo no tsee dԑ Kweku rekaka mu. Wotuu mereka kᴐᴐ nsu no ho dԑ worekᴐhwe dza oesi. Wↄhun dԑ Kweku Gyasi da ho kegyaa, na mbogya gu famu hᴐ pii. Wᴐbԑfaa no kᴐr ayarsabea a oennhu hwee.

Dᴐnhwer bebiree ekyir no, Kwesi n, enyiwado tsew no.

Ohun n'awofo na ne nyɛnko Kweku dԑ wↄgyinagyina ne nkyԑn. Ɔyɛɛ dԑ ᴐrekeka noho no ᴐtsee yaw wᴐ ne nan kor mu. Wↄ kaa kyerɛɛ no dԑ woetwa ne nan kor. Osuu yaayaayaw. ᴐpaa ne maame kyew dԑ ᴐmfa ne bᴐn nkye no. Ne maame kaa no bᴐkᴐᴐ dԑ, "Sԑanntse nye ᴐwam n'etsikᴐr pᴐw."