Ekadeni, sasingekho isibandana esinemilenze.

Zoke zazirhurhuba phasi.

Bekubabantu kwaphela abanemilenze njengombana uMaguru wanikela abantu imilenze.

Ngelinye ilanga, uMaguru wakhetha ukunikela zoke iimbandana imilenze.

Bekakhamba yoke indawo amemezela ngespikara. Bekafuna zoke iimbandana zikhambe njengabantu.

Iimbandana zathaba khulu nezizwa kuthiwa zizokunikelwa imilenze. Esinye nesinye isibandana besifuna ukuba nemilenze ukuze sikwazi ukukhamba nokugijima.

Bezivuma, zijuguja imisila yazo beziphaya namaphiko wazo.

Iimbandana zahlangana zizokucocisana ngobudisi ezinabo lokha nazirhurhubako. Phasi bezikghuka amathumbu wazo.

Imilenze izobasiza bajame babone kude le, njengombana nabantu basenza.

Nakufika ilanga lelo, iimbandana ezinengi zarhurhubela ekhaya lakaMaguru ukuyokuthola imilenze yazo.

Iindlulamithi, amabhubezi, iindlovu, imiqasa, iingulugudela neenyoni zenza umjeje zilindele ukunikelwa imilenze.

Esinye nesinye isibandana besinikelwa imilenze emine.

Inyoni ngayinye beyinikelwa imilenze emibili.

Iimbandana zabonakala sezihlukile nasele zinemilenze.

Ezinye bezithabile zigida. Ezinye beziba nobudisi bokukhamba beziwele phasi.

Bezikhamba indawo yoke zizikhangisa ebantwini. Zoke iimbandana zathi, "Angekhe sisarhurhuba godu."

Isilwanyana ebesisekugcineni komjeje bekunguSongololo.

UMaguru wambuza, "Kungabe kusese nomunye ngemuva kwakho?" "Awa, ngimi wokugcina," kwaphendula uSongololo.

UMaguru wacabanga, "Nangabe akusenamuntu, ngizokwenza ini ngemilenze eseleko le?"

UMaguru wanikela uSongololo yoke imilenze eseleko.

USongololo wakhamba athabe khulu ngombana anemilenze eminengi.

"Ngizokukhamba masinyana khulu kunabo boke," uyacabanga.

USongololo nakaqeda ukukhamba, inyoka yafika endlini kaMaguru.

"Maguru, ngibawa ungiphe imilenze," inyoka iyamncenga.

"Ngikhuphe yoke imilenze. Bewukuphi wena?" kubuza uMaguru.

"Ngilele khulu," kuphendula inyoka.

UMaguru wazuma ngendlini yakhe aqala bona ayikho imilenze eseleko.

Azange athole litho.

UMaguru wabuya wathi, "Ngilibalela nyoka, ayisekho imilenze eseleko." Inyoka kwafanela irhurhube ibuyele ekhaya ngaphandle kwemilenze.

Ukusukela mhlokho, inyoka ayilali isikhathi eside. Ngamalanga ilindele elinye ithuba lokuthola imilenze.