Woke umuntu uyazi bona indlovu inepumulo ede khulu.

Kodwana ekadeni, ipumulo yendlovu beyiyifitjhani begodu inonile. Ifana nenyathelo phakathi kobuso bayo.

Ngelinye ilanga kwazalwa umntwana wendlovu.

Bekafuna ukwazi ngazo zoke izinto. Bekanombuzo ngazo zoke iinlwana.

Wafuna ukwazi ngeNdlulamithi. "Kubayini unentamo ede?" uyabuza.

Wafuna ukwazi ngoBhejana. "Kubayini iphondo lakho libe netlobo elihlabako?"

Wafuna ukwazi ngeMvubu, "Kubayini ube namehlo abovu?" uyabuza.

Bekafuna ukwazi KHULU ngegulukudela. "Igulukudela idla ini entambama?" uyabuza.

"Ungathomi ubuze umbuzo onjengalowo!" kutjho unina.

Ngemva kwalokho wakhamba, akhwinyisile.

Msinyazana nje inyoni yaphaphela emntwaneni wendlovu.

"Ngilandela siye emlanjeni. Lapho uzokubona bona igulugudela idla ini entambama," kutsiyoza inyoni.

Ngalokho-ke umntwana wendlovu walandela inyoni batjhinga ngemlanjeni.

Wangena hlangana namahlanga bese wajama edongeni. Waqala ngemanzini. Beyikuphi igulukudela?

"Lotjha," kwatjho ilitje ebeliseduze nedonga lemlanjeni.

"Lotjha," kwatjho umntwana wendlovu. "Ungangitjela bona igulukudela idla ini entambama?" uyabuza.

"Khothama bese ngizokutjela," kutjho ilitje. "Phasi, phasi," kutjho ilitje.

Yeke umntwana wendlovu wakhothama phasi, begodu waya phasi.

Msinyazana, "Bhi!" Ipumulo yomntwana wendlovu beyibanjwe mazinyo wegulukudela.

"Igulukudela izokudla ikwenze ukudla kwantambama!" kutsiyoza inyoni beyaphapha yakhamba.

Umntwana wendlovu wadzimelela ngeenyawo zakhe ezinamandla wadosela emuva.

Wadosa, begodu wadosa. Kodwana igulukudela azange iyilise ipumulo yakhe.

Ipumulo yomntwana yaluleka, yaluleka, begodu yaluleka. Ngemva kwalokho,"Bhu!" wawa ngomgogodhla.

Igulukudela yabuyela ngemanzini.

Bekasilingekile ngombana bekalahlekelwe kukudla kwakhe kwantambama.

Umntwana wendlovu waqala ipumulo yakhe

Beyidoseke yaba yide khulu. Azange akwazi ukuyibona bona iphelela kuphi!

Ipumulo yakhe beyiyide akwazi ukukha iinthelo ezisematakeni aphezulu.

Ipumulo yakhe beyiyide ikwazi ukuthela amanzi emgogodhlweni wakhe.

Kusukela mhlokho, zoke iindlovu zaba nemigogodlha emide begodu ilisizo kizo.