Kadzeni kwakukhona intfombatana leyayihlala eMkhwakhweni, ligama layo kwakunguKhabo.

Khabo abekutsandza kukhuluma. Make wakhe wamcwayisa ngekukhuluma kwakhe kakhulu, kodvwa Khabo akalalelanga.

Kwatsi ngalelinye lilanga, anti waKhabo wagula kakhulu. Bekahlala ngesheya kwesigodzi dvute nalapho bekuhlala khona boKhabo.

Make wakhe wamtfuma kutsi ahambisele anti wakhe kudla, njengobe bekagula. Ngalobo lobusuku make waKhabo walala adziniwe.

Watsi asendleleni wahlangana naZeni, imphisi legucuka ibe muntfu.

Zeni wabuta Khabo kutsi utfweleni. "Ngitfwele inyama, emacandza nelubisi," kuphendvula Khabo.

Kantsi make wakhe abemcwayisile kutsi angasho kutsi utfweleni.

Nako ke Khabo sekakhuluma tonkhe tindzaba kuZeni, atsi anti wakhe uyagula kungako amhambisela kudla.

Zeni wacala kugwinya ematse nakeva indzaba yenyama leyayiphetfwe nguKhabo.

Ngekushesha wagijima wayofika kucala ekhaya lapho kuhlala anti waKhabo.

Utse nakefika, wagwinya anti waKhabo wabese sewutimbhonya ngengubo yakhe.

Kungasikudzala, wefika Khabo, bekutfule kakhulu lapha emtini wa-anti wakhe.

Wangena ngekhatsi wacala kumemeta, "Anti! Anti! Ngabe ungakuphi?"

Khabo akamange eve kusabela kwa-anti wakhe, wacala kukhatsateka, wangena emakamelweni lapho kwakulala khona anti.

Wamangala nakabona kukhona lotimbhonye ngengubo lenkhulu.

"Hawu! Anti, kwentiwa yini kutsi tindlebe takho tibe tinkhulu lamuhla?" kubuta Khabo.

Zeni waphendvula ngaphasi kwengubo lenkhulu, "Kute ngikwati kukuva kahle."

Khabo waphindza wambuta, "Bukela nemehlo akho makhulu lamuhla, kwentiwayini?"

Waphendvula Zeni, "Kute ngikwati kubona kahle."

Khabo wambuta kwekugcina, "Ha nemlomo wakho mkhulu lamuhla, kungani vele ubemkhulu?"

Zeni wavuka ngekuphangisa embhedeni wagwinya Khabo.

Ngobe Khabo bekakhuluma kakhulu, bekaloku akhuluma nangalesikhatsi asekhatsi esiswini saZeni. Bekaloku abuta imibuto leminyenti.

Kwatsi ekugcineni, Zeni sekadziniwe kulalela imibuto leminyenti yaKhabo wabese uncuma kumkhafulela ngephandle.

Bantfu besigodzi beta balamulela Khabo na anti wakhe basindza kanjalo.

Kusukela ngalelolanga, Khabo wakuyekela kukhuluma kakhulu nekukhuluma nebantfu langabati.