Wonkhe umuntfu uyati kutsi indlovu inemboko lomudze kakhulu.

Emandvulo umboko wendlovu bewumfisha futsi ukhuluphele.

Ngalelinye lilanga kwatalwa umntfwana wendlovu. Lomntfwana bekatsandza tintfo.

Bekahlala anemibuto ngato tonkhe tilwane.

Wahlangana nendlulamitsi.

"Kungani ube nentsamo lendze kangaka?"

Ngakusasa wahlangana nesibhejane.

"Kungani luphondo lwakho lucijile?

Waphindze wahlangana nemvubu.

"Kungani ube nemehlo labovu?"

Ngobe bekatsandza tintfo bekafuna kwati nangengwenya.

"Ngabe tingwenya tidlani ngesidlo sakusihlwa?" wabuta.

"Ungalingi nje ubute imibuto lenje!" kusho make wakhe.

Wabese uyasuka uyahamba, atfukutsele.

Masinyane lihhwabayi landizela phasi edvute nemntfwana wendlovu.

"Ngilandzele siye emfuleni. Lapho utawubona kutsi ingwenya idlani kusihlwa," kusho lihhwabayi.

Umntfwana wendlovu walandzela lihhwabayi behlela entasi emfuleni.

Umntfwana wendlovu watimpintja wangena emhlangeni wema elusentseni lwemfula.

Wabuka emantini. Iphi-ke lengwenya?

"Sawubona," kukhuluma litje lelisedvute nelusentse lwemfula.

"Yebo," kuphendvula umntfwana wendlovu. "Asewungitjele, idlani ingwenya ngesidlo santsambama?"

"Gobondzela ngitakutjela," kusho litje.

"Sondzela, sondzela," kusho litje. Umntfwana wendlovu wagobondzela wasondzela edvute kakhulu.

Masinyane nje, "Sheshisa!" Ngci, umboko wemntfwana wendlovu emihlatsini yengwenya.

"Ayeye! Ingwenya itawudla wena ngesidlo sakusihlwa!" kunswinswita lihhwabayi.

Umntfwana wendlovu wasima ngetinyawo takhe tangemuva etama kuphunyula.

Wadvonsa, wadvonsa kodvwa ingwenya ayizange imdedele.

Umboko wemntfwana wendlovu wanwebeka waba mkhulu.

Bhu! Wawa ngemhlane.

Ingwenya yancwila yabuyela emantini.

Yatfukutsela ngekulahlekelwa kudla kwayo.

Umntfwana wendlovu wabuka umboko wayo.

Besewunwebeke umudze kakhulu. Akazange abone kutsi uphelela kuphi.

Bewumudze ngendlela yekutsi bewukwati kukha titselo emagaleni lasetulu esihlahleni.

Bewumudze ngendlela yekutsi bekakwati nekutitsela ngemanti emhlane nalilanga lishisa.

Kusukela ngalelo langa, tonkhe tindlovu taba nemiboko lemidze nalelusito kuto.