Buli muntu akiidhi ati endhovu dhili ne enhindo mpanvu.

Aye ebiseera ebye eira einho, enhindo eye endhovu yali nnhimpi era nnene. Otise ngaito ghagati mu bweni bwayo.

Lunaku lulala Wandhovu omuto yazaalibwa. Yali yebuuza ku buli kintu. Yali ne ekibuuzo kyeyebuuza kubuli nsolo.

Yali yebuuza ku Wantwiga. "Lwaki oli ne enkoto empanvu?" Bwe yabuuza.

Yali yebuuza ku Wankula. "Lwaki eiyiga lyo liliku akasongovu ku mpembi?"

Yali yebuuza ku Wanvubu. "Lwaki oli na amaiso amamyufu?" Bwe yabuuza.

Era yali ne ebibuuzo kamaala ku Wagoina. "Wagoina alya ki ekyeigulo?" Bwe yabuuza.

"Tobuuzanga kibuuzo nga ekyo!" Ininha bwe yakoba. Meeni yaatambula yaavaagho nga anniize.

Mangu ago Waikoova yaika ghansi ghe Wandhovu omuto. "Nnonereza tugye ku mwiga. Agho oidha kubona Wagoina kyalya ekyeigulo," Waikoova bwe yaseka.

Atyo Wandhovu omuto yaanonereza Waikoova okuja ku mwiga.

Yeenhigiriza mu ngada era yaayemerera ku mwalo. Yaalinga mu maadhi. Wagoina ali igha?

"Muna," eibaale okumpi no omwalo bwe lyakoba. "Muna," Wandhovu omuto yairamu. "Osobola okunkobera kiki Wagoina kyalya ekyeigulo?" Bwe yabuuza.

"Gotama ghansi ndidha kukukobera," eibaale bwe lyakoba. "Ghansi inho, ghansi inho," eibaale bwe lyakoba. Atyo Wandovu omuto yaagotama ghansi, era ghansi inho.

Mu bwangu einho, "kwafu!" Enhindo ya Wandovu omuto nga eli mu maino ga Wagoina. "Wagoina aidha kukulya ekyeigulo!" Waikoova bwe yaseka, era yaagulukagho.

Wandhovu omuto yaatyama ku magulu ge agaamaani era yaasikula. Yaasikula, era yaasikula. Aye Wagoina tiyamulekula.

Enhindo ya Wandhovu omuto yaaduumuuka, era yaaduumuuka, era yaaduumuuka. Meeni, "thudi!" Yagwa ku mugongo gwe.

Wagoina yaadimira mu maadhi. Yaaba munhiivu olwokufiirwa omuyigo gwe.

Wandhovu omuto yeelinga ku nnhindo ye. Yali edhuumwike inho. Yali tasobola na kubona igha ghe ekoma.

Enhindo ye yaali mpanvu inho nti nga asobola no okulonda ebibala okuva ku nsaga edhaghaigulu.

Enhindo ye yali mpanvu inho nti nga esobola okunaaza omugongo gwe na amaadhi. Okuva no olwo olunaku, endhovu dhonadhoona dhili ne enhindo empanvu era edho mugaso.