Kobang e ne e le monna ya molelele haholo. Baaahi ba motseng ba ne ba mmitsa Kobang Ledimo le Bonolo hobane a ne a a thotse mme a rata batho. O ne a sa tshwane le madimo a mang a mabe ao o badileng ka ona dipaleng tse ding.

Motshehare Kobang o ne a sebetsa tshingwaneng ya hae. Mohoma wa hae o ne o le mokgutswane haholo a tlameha ho inamela tlase hore a sebetse ka ona.

Mokokotlo wa hae o ne o tshwanetse ho ba bohloko ke ho inamela tlase.

Tshepo a botsa Kobang, "O bolelele bo bokae hantlentle?" Kobang a lekanyetsa a re: "Nka ba bolelele ba dimitara tse 2,5." A paqama betheng mme a hlalosa a re, "Ke a tseba hore leterase la ka le bolelele ba 1,5m. O a bona hore maoto a ka a leketlella ka ntle ka mitara e le nngwe bonyane. Sena se bolela hore ke tlamehile ke be ke le bolelele ba 2,5m bonyane."

Jwale Tshepo o ne a ka bolella baholo ba motse hore Kobang o bolelele ba 2,5m. O molelele haholo.

Tshepo a botsa Kobang, "O bolelele bo bokae hantlentle?" Kobang a lekanyetsa a re: "Nka ba bolelele ba dimitara tse 2,5." A paqama betheng mme a hlalosa a re, "Ke a tseba hore leterase la ka le bolelele ba 1,5m. O a bona hore maoto a ka a leketlella ka ntle ka mitara e le nngwe bonyane. Sena se bolela hore ke tlamehile ke be ke le bolelele ba 2,5m bonyane."

Jwale Tshepo o ne a ka bolella baholo ba motse hore Kobang o bolelele ba 2,5m. O molelele haholo.

Jwale Tshepo o ne a tla qala ho sebetsa ka leano la hae la sephiri.

Tshepo, Kobang le kgohwanyane ya hae a e ruileng Tjhokwe, ba palama baesekele ya Kobang e nyenyane ho ya mmarakeng. Kobang o ile a tlameha ho nyolosetsa maoto a hae ka hodima dinaka tsa baesekele a ntse a hatile ditrapi. Tshepo o ne a ipatile ka hara manki a tshaba ho sheba tsela ha baesekele e kgelohela kwana le kwana.

Sekwereng sa motse, Kobang a theoha baesekeleng ya hae, mme phiphitha ya baahi ba mo thabetseng ya mo pota-pota. "Dumela Ledimo le Bonolo," Morena wa motse a mo amohela. "Motjha enwa Tshepo o re bolelletse hore o tobane le mathata bophelong, a ho ba molelele haholo. Re batla ho o thusa. Re tla etsa bonnete ba hore tsohle tseo o di hlokang di boholo bo loketseng wena. E se kgale mathata a hao a tla nyamela. Ema mme o lebelle."

Baahi ba motseng ba sebeditse bosiu le motsheare ho etsa hore tsohle tseo Kobang a di hlokang di be boholo bo nepahetseng.

Sheba mohoma wa hae o motjha. Bapisa bolelele ba o motjha le wa kgale. Bolelele ba mohoma o motjha bo phetilwe habedi. O nahana hore o bolelele bo bokae? Ho feta mitara e le nngwe? Ka tlasa dimitara tse pedi?

Ha morao baahi ba thusitse Kobang ho betla kosene e telele le monyako o motjha wa ntlo ya hae. O ne o le moleletsana ho Kobang, kahoo o ne a se a sa hloke ho inama ha a kena. O lokile hantle.

Shebisisa setshwantsho. Kobang a ka ba a le bolelele ba dimitara tse 2,5. O nahana hore kosene ya hae e ntjha e bolelele bo bokae?

Jwale ho tlile bethe le leterase o motjha mmoho le dilakane le dikobo tsa bolelele bo ekeditsweng ho kwahela mmele wa Kobang o molelele ho tloha hlohong ho fihlela monwaneng wa leoto.

Qetellong o ipona a tla fumana phomolo le boroko bo kgutsitseng. Maoto a hae ha a sa tla leketla qetellong ya leterase. Sheba kamoo mmele wa hae wohle o apesitsweng ka teng. Ebile qetellong ya bethe ho na le sekgeo se setseng.

Morena wa motse o kopile e mong wa basebetsi ba motse ba sebetsang ka ditshepe ho etsetsa Kobang baesekele e kgolo. E ne e na le manki o moholo ha monate moo Tshepo le Tjhokwe ba ka dulang ka hara wona.

Setulo, dinaka le diterapi di ne di se di le bolelele bo nepahetseng. Kobang o ne a se a sa hloke ho hulanya maoto a hae tseleng kapa ho a leketlisa hodima dinaka hore a tlohe tseleng.

Babetli ba motseng ba etseditse Kobang tafole e ntjha e phahameng moo a tla dulang teng, ya maoto a bolelele ba 1,5m bonyane. Jwale ha a dula fatshe ho ja, maoto a hae a kgome fatshe.

Tshepo o dula pela hae setulong se se lelele haholo. O hloka llere ho hlwella hore a fihle hodimo setulong. Bala hore o hata diterapi tse kae tsa llere ho lekanela le Kobang. O nahana hore llere e bolelele bo bokae?

Mohoma wa Kobang o motjha o mo nolofaleditse ho jala le ho kotula. Tshingwana ya hae ya fetoha moru! Kobang o tlohella baahi dimanki tsa ditholwana ka ntle pela monyako wa hae wa ka pele, ho bontsha tsela eo a lebohang thuso ya bona.

Mme tsena tsohle di qadile ka toro ya motjha Tshepo ho etsetsa motswalle wa hae, Ledimo le Bonolo, bophelo bo bobebe.