Kanye ngelanga ibhesi ekulu ehlaza sasibhakabhaka ijama esiphandeni sakoBubu ilayitjhe abantu abaya edorobheni.

UBubu bekangakaze abone ibhesi ekulu kangaka. Ubala amafesidere alithoba wabakhweli nelilodwa elisesihlalweni somtjhayeli. "Kufanele kube nemida yamarhemo ali-9 yeentulo zabakhweli, bese kuthi irhemo ngalinye libe neentulo ezisi-6," kucabanga uBubu. Nange uBubu aqinisile, ibhesi elikhulu elihlaza sasibhakabhaka lingakhweza abantu abangaki?

Kusasa uBubu nonina bazokukhwela ibhesi ekulu ehlaza sasibhakabhaka baye edorobheni bayokuthengela uBubu ijinifomu etja.

Unina likaBubu ufuye iinkukhu. Uthengisa amaqanda wazo nge R15 idazini. Iimveke ezinengi wenza imali engange R450. Utlhoga ukuthengisa amadazini amangaki ukwenza R450? Eemvekeni ezine ezidlulileko, wonge isiquntu semali yakhe ukuze akwazi ukuyokuthengela uBubu ijinifomu etja.
Ungakwazi ukubala bonyana unina likaBubu ubulunge malini ngeemveke ezine?

Besele kudlule iinyanga ezintathu soloku uBubu wagcina ukukhwela ibhesi, urhabe khulu!

Kusasa kulilanga elikhulu! Nge-iri lekhomba, besele asembhedeni wakhe kodwana angakghoni ukulala. Ingqondo yakhe iyagijima akakwazi ukuhlala angacabangi ngekhambo labo lakusasa lokuya edorobheni. Sekupheze kube mizuzu ematjhumi amathathu ngemva kwe-iri lethoba, kodwana uBubu akakalali ubuthongo!

Unina likaBubu ngamalanga umvusa ekuseni nge-iri lekhomba. Namhlanjesi, nanyana izolo alele ebusuku nge-iri letjhumi nanye, kodwana nge-iri lesithandathu ekuseni besele avukile!

Nge-iri lekhomba besele ahlambile bewambatha sekalungele ukukhamba. UBubu izolo ulele isikhathi esingangani?

Imizuzu nayilitjhumi nahlanu ngaphambi kwe-iri lobunane, uBubu nonina befika esitopeni sebhesi ekulu ehlaza sasibhakabhaka ifanele ifike nge-iri lobunane poro!

Unina likaBubu uqala iwatjhi lakhe, sekudlule imizuzu elitjhumi nahlanu. "Ibhesi ihlala njalo ifika ngesikhathi ekungiso." Wathi, "Ngiyamangala bona umraro ngabe yini na?"

Ngesikhatjhana esincani, abanye abantu abane bafika esitopeni sebhesi. Nabo bafika baqala amawatjhi wabo bazibuza bonyana kubayini ibhesi ize ngemva kwesikhathi. "Lokhu kuyamangaza!" kutjho indoda enepandla eyembethe isudu ehlaza sasibhakabhaka. "Sekuli-iri lethoba!
Ngizokuladelwa emsebenzini!"

UBubu nonina bebalinde isikhathi eside khulu. UBubu bekazizwa kwangathi ulinde ama-iri amanengi. Nokho akusilo iqiniso! UBubu nonina bebalinde isikhathi esingangani?

UBubu ukhathazekile. "Ngisazokuyithola ijinifomu yami?" ubuza unina.

UBubu ubalisa isikhathi sokuya edorobheni nokubuya. Kuzokuba ma-iri amane. Ne-iri lokufika lapho, ama-iri amabili wokuthenga ne-iri lokubuyela ekhaya. "Mma, nginomdlalo webholo erarhwako nabangani bami nge-iri lesibili poro ehloko! Ngithemba kobana ibhesi izokufika ngesikhathi, nakungasi njalo angekhe sibuyele ekhaya ngesikhathi."

Basalindile nangalesi gadesi. Kwanjesi uBubu sekayalila. Abanye abantu ababili bayasuka emjejeni babuyela emakhaya. Abanye basoloko baqala isikhathi emawatjhini wabo.

"Asibekezeleni. Ngiyakholwa ibhesi izokufika kungasikade." Kutjho unina likaBubu. "Awa mma! Mina sengifuna ukubuyela ekhaya!" Kurhuwelela uBubu. "Asilinde eminye imizuzu elitjhumi," kutjho unina lika Bubu. Nange ibhesi ingakafiki imizuzu namatjhumi amathathu ngemva lwe-iri lethoba sizokubuyela ekhaya."

Kusesenjalo bezwa umdumo webhesi uduma ukhuphuka indlela. "Uyabona ngikutjelile!" kutjho unina likaBubu. "Imizuzu imatjhumi amathathu poro ngemva kwesimbi yethoba."

"Sizokuthenga ngokurhabako. Nange ibhesi ingasuka ngesikhathi, sizokufika ekhaya ngaphali kwesikhathi sakho sokuthoma kwebholo erarhwako!" UBubu usula iinyembezi, amehlo wakhe athoma akhazimula! IInyako zakhe zibuhlungu.
Uzizwa adinwe khulu. Urhabele ukungena ngebhesini.

Okwabamangaza khulu kukuthi bekungasiyo ibhesi ekulu ehlaza sasibhakabhaka. Kwavela ibhesi encani ebomvu. UBubu wabala amafesidera amane kwaphela ehlangothini lebhesi. UBubu wathi, "Mma! Le ibhesi incani khulu kunebhesi ekulu ehlaza sasibhakabhaka. Angekhe kube nendawo eyaneleko yawo woke umuntu oya edorobheni!"

Uyavumelana noBubu? Ungaqagela bonyana bangaki abakhweli abangathwalwa yibhesi encani ebomvu?

Unina uyamtsima uthi, "Utswenyeka khulu Bubu. Okungasenani thina soke esilindele estopeni lesi sizoyithola indawo yokuhlala!"

"Asingene ngokurhabako khona sizokuthola iinhlalo eziseqophelweni eliphezulu. Ngithi sesijame isikhathi eside khulu!"

UBubu nonina bangena ngebhesini. Ngemva kwabo kusese nabantu abalithoba abasajame emjejeni. UBubu uyabuza godu, "Kuzokuba neenhlalo ezaneleko zawo woke umuntu?"

Kwanjesi sekayabona kobana kunamareyi amane weenhlalo ngebhesini, kuneenhlalo ezimbili ngakelinye ihlangothi begodu neenhlalo ezimbili ngakelinye ihlangothi.

Zingakhi iinhlalo nasele zizoke? Ingabe boke abantu abasemjejeni bazokwazi ukuhlala phasi?

UBubu nonina bahlala eenhlalweni zokuthoma ezingaphambili eziseduze nomnyango. UBubu ubala abanye abantu abasithandathu abangezeleleke umjejeni. "Uyacabanga bonyana sekunabanye abantu okutjho ukuthi abakhweli sebalitjhumi nekhomba nasele baboke."

UBubu utjela unina uthi, "Mma kunendawo yawo woke umuntu ojame emjejeni!

Kunomkhweli oyedwa nje kwaphela ozokujama ngeenyawo!" Ingabe uBubu ubale kuhle na?

Kwanjesi ibhesi seyizele. Umtjhayeli uvala woke amabadi webhesi bewakhamba. Ngaphandle kunetjhada elikhulu. UBubu nabanye abakhweli bahlola ngefesidere. Kunabantu abanengi abagijimela ukuzokukhwela ibhesi. Bayarhuwelela, "Jama! Jama! Nathi sifuna ukukhwela!"

Kodwana besele kungemva kwesikhathi! UBubu nonina babazwela abantu abatjhiyeke ngemva.

Unina lika Bubu ubuza umtjhayeli, "Kubayini ungakezi ngebhesi ekulu ehlaza sasibhakabhaka?" "Iphukile izolo, kwadingeka, kobana ngithole enye ibhesi. Ngithole encani le."

"Kodwana kuzokwenzeka ini ngabantu laba esibatjhiyileko, nabanye abanengi esibadlule endleleni?" unina lika Bubu ubuza umtjhayeli. "Ungatswenyeki! Ngihlele ukuthatha amanye amakhambo amabili namhlanjesi!" kutjho umtjhayeli.

UBubu ubalalele nebakhulumako. Ngehlokweni yakhe ucabanga ngeenomboro.

UBubu ubuyelela ukubala iinhlalo. "Ngicabanga bonyana ibhesi le encani ebomvu ithwala abantu abama-20, abali-16 bahlezi bese aba-4 bajama ngeenyawo."

"Ngiyazibuza bonyana ibhesi le ifanele ithathe amakhambo amangaki nange kufanele ikhweze abakhweli aba-100 abaya edorobheni?" Kungaba njani babe ama-200 nofana 150?" Ungakwazi ukusebenza ipendulo?

UBubu uthabile! Kungasi kade uzobe anejinifomu etja, bese ibhesi encani ebomvu izobabuyisela ekhaya, ngesikhathi esifaneleko somdlalo wakhe webholo erarhwako.