UGobani kwakuyindoda ede khulu. Abantu bendawo bebambiza ngokuthi nguGobani izimuzimu elilungileko, ngombana bekathulile begodu anomusa. Bekangafani nomhlobo wamazimuzimu ayingozi afana nalawa enifunda ngawo.

UGobani bekasebenza esivandeni sakhe. Bekaphenduphenduka lokha nakakhothamako asebenza ngelembe lakhe elifitjhani khulu. Bekutjengisa bonyana idini lakhe belibuhlangu.

UThimba obekahlala eduze noGobani bekumtlhuwisa ukubona uGobani ahlupheka ngokusebenzisa ilembe lakhe elifitjhani, nofana nakakhothamako lokha kufanele aphume emnyango wendlu yakhe.

UThimba wacabanga ukusiza uGobani, wakhamba wayokukhulumisana namakhosi wendaweni leyo, kodwana ngaphambi kobana bathome ngokumsiza bekufanele bazi ukuthi uGobani mude kangangani.

UThimba ubuza uGobani, "Ubude bakho bungangani?" UGobani uyafunisela, "Ngingaba pheze bubude obu-2,5m." Walala embhedeni wakhe lokha nakahlathululako, wathi, "Ngiyazi kobana umbhedo wami unobude obu-1,5m. Uyabona nawe bonyana iinyako zami zidlulele ngale kombhede ngobude obungaba yimitha eyodwa, okutjho ukuthi nginobude okungenani obu-2,5m."

UThimba wakwazi ukutjela abantu bendawo ukuthi ubude bakaGobani bu-2,5m. Bubude obukhulu khulu!

UThimba bekanamano amahle.

UThimba, uGobani nefuyo esithandwa yakhe ikukhu uChoke, bakhamba ngetsikiri encani yaka Gobani baya emakethe. UGobani kwafanele aphakamise iinyawo zakhe lokha nakareya itsikiri yakhe. UThimba yena wabhaca ngaphakathi komantji, bekathukwe khulu lokha nakabona itsikiri ikhamba iphekgukela ngemahlangothini woke wendlela.

UGobani uthe nakafika emzini, wehla etsikirini yakhe, wafunyana iwoma labantu abanomusa bambungelela. "Lotjha Zimuzimu elilungileko," iKosi yendawo yamukela uGobani. "Isokana uThimba usibikele bonyana uqalene nemiraro eminengi epilweni, njengombana umude khulu nje!"

"Thina sifuna ukukusiza, sizokwenza isiqinisekiso sokobana yoke into oyitlhogako izokuba ngelingana nawe. Ngokurhabako imiraro yakho izabe seyinyamalele. Linda nje wena uzokubona!"

Abantu bendawo basebenza ubusuku boke ukuqinisekisa bonyana uGobani uthola koke akutlhogako kunobukhulu obulingana naye.

Qala ilembe elitjha leli. Qathanisa ubude belembe elitjha nalelo lika Gobani lokuthoma. Lelo elitjha liqaleka lilide libuyelelwe kabili kunelembe lokuthoma. Ucabanga bonyana lide kangangani? Lingaba lide kunemitha elilodwa? Lingaba ngaphasi kwamamitha amabili?

Okulandelako abantu bendawo basiza uGobani ukwenza igoseni lendlu yakhe elide elinomyango omutjha. Bewumude kunoGobani, ukuze angasakhothami lokha nakangena ngendlini, bawenza kuhle nje.

Qalisisa isithombe. UGobani unobude bamamitha a-2.5. Ucabanga bonyana igoseni elitjha lomnyango wakhe belinobude obungangani?

Kwalandela umbhede omutjha onamalageni neengubo ezide ngokwaneleko ukumbesa woke umzimba kaGobani omude ukusuka ehloko ukufika eenyakweni zakhe.

Kwamaswaphela waqala phambili ekubeni nobuthongo obunokuthula aphumule kamnandi. Iinyako zakhe angekhe zisalengelela ngale kombhede. Qala bonyana umzimba wakhe woke wembeswe woke bekwaba nesikhala esiseleko ngemva embhedeni.

IKosi yabawa omunye wabantu abasebenza ngeensimbi kobana enzele uGobani itsikiri ekulu khulu. Beyinekheriyana ekulu ngokwaneleko ukuhlalisa uThimba noChoke.

Isihlalo, iimbambo namatrabha bewanobukhulu okungibo. UGobani azange kusadingeka kobana arhudule iinyako zakhe endleleni nofana aziphephethise ngehla kweembambo ukuze azisuse endleleni.

Umbazi wendawo wenzela uGobani itafula eliphakamileko ukuze ahlale adlele kilo. Imilenze yetafula kufanele ibe nokuphakama okungaba mamitha a-1,5. Okwamanje nakahlezi asidla iinyako zakhe zithinta phasi.

UThimba uhlezi eduze kwakhe phezulu kwesitulo esiphezulu khulu, kudingeke kobana akhwelele phezulu kweleri kaGobani ukuze akwazi ukufikelela esitulweni. Bala bonyana bekufanele agadange kangaki ukuze alingane noGobani. Ucabanga bonyana ileri beyiyide kangangani?

Ilembe elitjha likaGobani lenza kwabalula ukulima nokuvuna. Isivande sakhe sakhula saba lihlathi! UGobani ubeka umantji ozele iinthelo ngaphandle komnyango wangaphambili wendlu wakhe uwubekela abantu bendawo, le bekuyindlela ebekatjengisa ngayo ukuthokoza ebantwini bendawo ngerhelebho labo.

Koke lokhu kwathoma ngebhudango lesokana elincani uThimba, lokha nakafuna ipilo yomngani wakhe iZimuzimu elilungileko ibe lula.