Gobani bekayindvodza lendze kakhulu. Bantfu besigodzi bebambita ngekutsi nguGobani losidlakela lesingenangoti, ngobe bekathulile futsi abenebungani. Bekangefani netidlakela letinye letingasikahle lekufundvwa ngato etindzabeni letinye!

Gobani abesebenta engadzini yakhe. Bekagobeka ngalesikhatsi agobondzele phasi nakasebenta ngelikhuba lakhe lelifisha. Umgogodla wakhe ufanele kuva buhlungu!

Thimba bekahlala edvute naGobani. Kwamenta wangajabuli kubona Gobani aba nebulukhuni ekusebentiseni likhuba lakhe lelifisha, nobe agobondzele phasi nakafuna kuphuma emnyango!

Thimba watsatsa sincumo sekutsi asite Gobani. Wakhuluma nebantfu labadzala besigodzi. Kodvwa ngembi kwekutsi bamsite, bebafuna kwati kutsi ngabe Gobani mudze kangakanani.

Thimba wabuta Gobani, "Ngabe mbamba mbamba umudze kangakanani?"

"Ngilingana 2,5m budze." Walala phasi embhedeni nakamchazela, wase utsi, "Ngiyati matilasi wami ulingana 1,5m budze. Ungabuka imilente yami ilenga ibe ngulenye imitha. Ngako-ke loko kusho kutsi ngimudze lokungenani 2,5m."

Nyalo Thimba sekangabatjela labadzala besigodzi kutsi Gobani ulingana 2,5m budze. Lobo budze lobukhulu kakhulu!

Thimba bekanelisu lelifihlakele!

BoThimba, Gobani kanye nenkhukhu yakhe lenguSipho, baphuma baya emakethe ngelibhayisikili laGobani lelincane. Gobani bekumele aphakamise tinyawo takhe ngetulu kwetinsimbi letisemkhatsini wemaphedali. Thimba wabhaca ngekhatsi ebhayisikilini, ngekwesaba kakhulu kubuka emgwacweni ngalesikhatsi libhayisikili lishona le nale emaceleni.

Endzaweni yesikwele sesigodzi, Gobani wehla ebhayisikilini lakhe, licembu lebantfu besigodzi labanemusa bamutungeletela. "Sawubona Sidlakela Lesingenangoti!" Shifu wesigodzi wamemukela. "Thimba lomncane wasitjela kutsi ubukene netinkinga emphilweni yakho, tekuba mudze!"

"Sifuna kukuncedza! Sitawenta siciniseko sekutsi konkhe lokudzingako kube yisayizi lefanele wena! Ngekushesha nje tinkinga takho titawunyamalala. Lindza bese uyabukela!"

Bantfu besigodzi basebenta kwate kwasa benta konkhe loko bekudzingwa nguGobani nekutsi kube yisayizi lengiyo.

Buka likhuba lakhe lelisha. Catsanisa budze baleli lelisha naleli lelidzala. Leli lelisha libukeka lilidze ngalokuphindvwe kabili. Ucabanga kutsi linebudze lobungakanani?

Lokulandzelako, bantfu besigodzi basita Gobani ngekwakha ifreyimu yemnyango lendze kancane lehambisana nemnyango lomusha wendlu yakhe. Bewumudze kancane kunaGobani, ngako-ke bekangasagobondzeli nakumele angene ngekhatsi. Sewukahle impela!

Bukisisa lesitfombe. Budze baGobani bulingana emamitha la-2,5. Ngabe ifreyimu yemnyango inebudze lobungakanani?

Lokwalandzela kutsi bafike nembhede lomusha kanye namatilasi lohambisana nemashidi lamadze ngalokwecile kanye netingubo kumbatsisa umtimba waGobani lomudze kusukela enhloko kuya etintwaneni!

Ekugcineni bekalangatelela kuphumula nekulala kanyenti ngekuthula. Tinyawo takhe betingasalengeli ekugcineni kwamatilasi!

Shifu wesigodzi wacela lomunye walabasebenta ngetinsimbi esigodzini kutsi entele Gobani libhayisikili lelikhulu. Belinebhasikidi lenkhulu ngalokwanele lelingana Thimba nenkhukhu yakhe kutsi bangahlala ngekhatsi.

Sihlalo, tibambo tensimbi nemaphedali besekukudze ngalokufanele. Gobani akamange alengise tinyawo emgwacweni nobe atilengise ngenhla kwetibambo tetinsimbi kute atisuse endleleni.

Labo lababatako besigodzi bentela Gobani litafula lelisha lelidze latawuhlala kulo abuye adlele kulo. Imilente yakhe kumele lokungenani ibe 1,5m budze. Nyalo nasekahlala phasi nakadla, tinyawo takhe titsintsa phasi!

Thimba uhlala edvute naye esitulweni sakhe lesidze. Kudzingeka agibele sitebhisi saGobani kute akwati kufinyelela esitulweni. Bala kutsi kumele enyuke kangaki kute alingane naGobani. Ngabe sitebhisi sidze ngalokungakanani?

Likhuba lelisha laGobani belenta kube lula kuhlanyela nekuvuna. Ingadze yakhe yaba lihlatsi!

Gobani ushiyela bantfu besigodzi ibhasikidi yetitselo ngephandle kwemnyango wakhe wangaphambili, kukhombisa kutsi ubabonga kangakanani ngelusito lwabo.

Konkhe loku kucale ngeliphupho lemfana lomncane longuThimba ngekulinga kwentela umngani wakhe loSidlakela Lesingenangoti nekutsi imphilo yaso ibe lula.