Riki sek oudo tiye imata otii koudo bedo kede ikwae mege adek.

Buli odiko oudo ki oto ipoto pur, do ceng acel, atin nyako acel oko yamo be, “adaa, ango atiye winyo goro tin?.”

Imata oko cwane ipaco.

Kaka me nyako otuno kede paco, eko neno be ringo oudo tiye i agulu me dek. Eko camo ringo dedede dido eko oot buto.

Imata kede idwe are icegun ka oudo ool di kec oneko gi, kaka me ki dwogo kede kipoto. Daagi oko dolo kwon me otieno pii camo kede ringo kame oudo etedo odiko sek.

Eko yabo agune pi toko cam ne ikwayee mege. Kaka me eko yabo kede agulu me ringo, eko oudo etiye nono.

“Ngai kocamo ringo?” daagi oko penyere, di eger. Do ikwae mege adek dedede oko yango wigi. “liango” di ngat acel acel dwoko.

Dido daagi oko tweno auno di beo iwii esamai. Eko yamo ne ngat acel acel kikom gi pi ngolo loka di ki wero wer. “ngat kocamo ringo bino poto ipii, di eko pwonyo yamo ateni” Adaa oko medo yamo ne idwe.

Akware me agege oko oot oyot-oyot ngolo esamai di etiye wer.

Wer nono oudo were bee, “ kame ango en acamo ringo, wek auno ni coti di eko uca inam, wek apoti kaka tut me nam, wek auno coti di eko uca in nam.

Ikwae are ka oko geno piem gin ken-gi ken-gi. Nyako oko yamo ne awobi be, “ in lubi” awobi oko dwoko ne be, “in ber lubi!”.

Akware koudo ocamo ringo udo tiye kede lworo di kome oko miel. Dido ekobo tyene pi oot i auno, en eko cher di eko poto ii nam.

“Konyanu-konyanu” nyako oko ilelem. Adaa oko yamo ne ikwae are ochegun ka, “lewic omake, do pore okonye nu”.

Karacel ki ko wano nyako kame lworo oudo omako ca ooko me nam. Geno cenge no ikwae me imatacni oko donyo yamo ateni.