Khale ka khaleni, a ku ri na nhwanyana un'wana loyi vito ra yena a va ku i Kalabushe. Kalabushe a a ri nhwanyana wo vulavula ngopfu. Mhani wa Kalabushe u n'wi tshinyile leswaku a nga vulavuli ngopfu, kambe Kalabushe a nga yingiselangi.
Siku rin'wana hahani wa Kalabushe u khomiwile hi vuvabyi. A a tshama entsungeni wa nambu etlhelo ka muti wa ka va Kalabushe.
Mhani wa Kalabushe a a ri gingirikeni swinene hi siku rero. A ku ri vusiku swinene hi nkarhi lowu a nga nyika Kalabushe swakudya ku ya nyika hahani wa yena lowo vabya.
Endleleni Kalabushe u hlanganile na Sinson, mhisi leyi nga cinca yi va munhu.
Sinson u n'wi vutisile leswi a nga swi khoma. Kalabushe u hlamurile a ku, "I nyama, mandza na ntswamba." Mhani wa Kalabushe u n'wi tsundzuxile leswaku a nga boxi leswi a nga swi rhwala.
Nakambe Kalabushe u byerile Sinson leswaku hahani wa yena wa vabya na leswaku u n'wi yisela swakudya. Sinson u sungurile ku n'wi kayakayisa emiehleketeni ya nyama leyi Kalabushe a nga yi khoma.
U tsutsumile hi rivilo emahlweni ka Kalabushe ku ya endlwini ya hahani wa yena.
Mhisi yi fikile yi mita hahani wa Kalabushe ivi endzhaku a n'wi phutsela hi nkumba wa yena.
Loko Kalabushe a fika, endlwini a ku nga twakali nchumu. U nghenile endlwini kutani a huwelela a ku, "Hahani, xana u le kwihi?"
Loko a nga twi rito ra hahani wa yena, Kalabushe u nghenile eka kamara ra le ndzeni laha hahani wa yena a etlele kona. U hlamurile loko a vona munhu un'wana a phutseriwile hi nkumba lowukulu.
"Hahani, hikokwalaho ka yini tindleve ta wena ti ri letikulu namuntlha?" ku vutisa Kalabushe. Sinson u hlamurile a ri endzeni ka nkumba lowukulu a ku, "Ku endlela leswaku ndzi kota ku twa kahle."
Kalabushe u vutisile nakambe a ku, "Hahani, hikokwalaho ka yini mahlo ya wena ya ri lamakulu?" Sinson u hlamurile a ku, "Ku endlela leswaku ndzi kota ku ku vona kahle."
Eku heteleleni Kalabushe u vutisile a ku, "Hahani, hikokwalaho ka yini nomu wa wena wu ri lowukulu?" Sinson a hlamula a ku, "Ku endlela leswaku ndzi kota ku ku mita." Sinson u tlurile ku suka emubedweni kutani a mita Kalabushe.
Hikokwalaho ka ku va Kalabushe a vulavula ngopfu, a tshamela ku vulavula hambiloko a ri endzeni ka khwiri ra Sinson. U vutisile swivutiso swo tala.
Eku heteleleni, Sinson a a karhele hi swivutiso swo tala swa Kalabushe lero u kale a teka xiboho xo n'wi nkampfunya.
Kalabushe na hahani wa yena va lamuleriwile hi vaakitiko. Ku sukela siku rero, Kalabushe a nga ha vulavulangi ku tlula mpimo na vanhu lava a nga va tiveki.