Cango cango, Oculu kodi Ondyek oyido jo bedo mere ma thol gi tiko. Jo timo gi kipiny ma thoth kanyacel. Jo wero to jo myelo kanyacel.

Ndir acel Oculu owaco ri Ondyek ni, "Mere paran, wa cak furo kanyacel aka waŋaŋ." Ondyek odwoko ni, "Ey, wanyalo furo cemo kweth, wakeci to wa tana ri ji man." To Oculu penjo ni, "Wa le pidho aŋo?"

Ondyek owodho paro ni ber pidho duma. Oculu to yeyo ayeya. Oculu bende to waco ni ber ka jo konyere tic i ndelo. Oculu owaco ri Ondyek ni, "Tic paran le bedo ryemo winyin i ndelo. Aka in i le furo ndelo, i le pidho duma to i doyo."

Ondyek oŋunyaŋunya ni omiy go tic kweth. To Oculu waco ri go ni tic ma ryemo winyin tek aka dwoŋ loyo. Oculu otito ri Ondyek ni, "Tic paran ki yot. A le idho wi yen to aryemo winyin odye ceŋ gi wor. Aka i kinyal idho wi yath."

Gikenyo Ondyek oyeŋ gi wac pa Oculu. Oyeyo furo ndelo go kende. Obedo tic ma thoth swa. Oculu ku konyo kada. Munyo Ondyek ocowo furo ndelo, opidho duma i ndelo gi pi kende.

Ondyek odoyo ndelo gi kwer. Obedo tic mathoth swa. Kano Oculu bedo abeda i wi tele aka wero ni:   "Mere paran obedo ja tic, Abedo ja miy go ryeko. Tiyo pa kalikita, Abedo jagwey go. Go ulo lowo, Go paro gote, Go pidho kodhi, Go doyo dudi, Wa keco duma."

Munyo duma cegin cek i ndelo, Oculu omedo wer munyo sangala ka ryemo winyin. Ryemo winyin ku bedo kada tic matek. Kwok ku cwer kwoŋ Oculu de be.

I chowe mere duma otundo fono. Oculu owaco ri Ondyek ni jo le poko gi ma owok indelo. Oculu owaco ni, "A le keco gi moro je ma onyak i wi lowo aka i le keco gimoro je ma onyak i lowo." Ondyek oparo ni meno obedo paro maber.

Oculu owaco ni, "Kutho a le keco aparan aka nyaka i kec aperin." Ameno Oculu to keco duma je ma nitye i ndelo to ketho i dero opere.

Ondyek to kidho keco gi ma nitye i low. Ofuro munyo geno ni le nwaŋo keco maber. To nwaŋo fuc tyendi duma kende i lowo. Ofuro kisi kamoro. Ku nwaŋo kada gi moro ma ni okeci.

Ondyek onyaŋ ni Oculu okwalo go. Keme omako go. Odok peco gi agono nono. Okidho pa Oculu othieno gi nge mathoth. Owaco ri Oculu ni, "Mere paran, wey waŋan wafur kanyacel kendo."

Ondyek owaco ri Oculu ni, "Waŋin me a le keco gimoro je ma nyak wi lowo aka I le keco gimoro je manyak I lowow." Oculu oyeyo ayeya. Owaco ri Ondyek ni di ber jo wowiri gi ma jo le pidho ka pa pidho duma. Jo yere pidho rabwo.

Ondyek bende to ridho aridha ni waŋin me jo le furo jo je, to jo toŋo rabwo, to jo rwako, to jo doyo. Oculu oyeyo ayeya. To bende jo tiyo i ndelo kanyacel ka jo wero.

Munyo rabwo otegino, Oculu owaco ri Ondyek ni wo keci gi ma odongo wi lowo. Ondyek okidho to rnago gi ma okeci. To kunwaŋo kada gimoro. Onwaŋo boke rabwo kende. To dok peco gi agonin nono.

Oculu okeco rabwo madongo kweth. Oketho i dero pere. Munyo Ondyek oneno gi ma Oculu okeco, obedo gi nge swa. Ondyek openjo Oculu ni, "I raŋo i kwalan?" Oculu otito ni Ondyek won ama o yero ni le keco gi ma dongo wi lowo.

Keme mathoth omako Ondyek. Ondyek oryemo Oculu ni wotimi ŋonge. To Oculu ŋweco ma dwir. Wok ndir no, Oculu kodi Ondyek doko jo ku bedo mere.