Kale saana, takwali inama iyakwete amoolu. Shonse shaleeikulafye pamushili.

Abantu fye epela ebakwete amoolu pantu Maguru apeele abantu amoolu.

Ubushiku bumo Maguru atontonkenye ukupeela amoolu kunama shonse. Aendele ukushinguluka umushi onse aleebilisha ukubomfya icakulandilamo. Aleefwaya ukuti inama yonse ileenda ngo muntunse.

Inama shatemenwe cibi ilyo shaumfwile ukuti shali noopeelwa amoolu. Inama yonse yaleefwaya ukukwata amoolu pakuti shileenda nookubutuka. Shalimbile, ukusunsha imicila nookukapa amapindo.

Inama shalilongene nookulaanshanya ifyo caafya ukuikula. Umushili waleeshikwebulula pamala. Amoolu yaali nookushafwa ukwiminina nga bantu nookumona ukutali ngeefyo abantu bacita.

Ilyo bwaciile, inama shaikulile ukuya ku ng'anda yakwa Maguru mukupoka amoolu. Indyabulula, inkalamo, insofu, utululu, ing'wena neefyuuni fyalitanteme nookuloleela ukuti bafipeele amoolu.

Inama imo imo yapeelwe amoolu yane. Ifyuuni fyapeelwe amoolu yabili-yabili.

Inama shaalipuseneko ukumoneka na moolu. Shimo shalicinda kunsansa. Shimbi nasho shaleefilwa ukwenda kabili shaleepona.

Inama shaendele ukushinguluka umushi ukukumbwisha abantu amoolu. Shonse nama shatiile, "Tatwakatale atuikulapo nakabili."

Inama yaleekelesheko mumulongo caali ciyongoli. Maguru aipwishe, "Bushe kuli nabambi abakukonkelepo?" "Iyo mukwai, nine wakulekeleshako," efya aswike Ciyongoli.

Maguru atontonkenye ukuti, "Nga takuli nabambi, lyene cinshi twalaacita namoolu yashala?"    Maguru apeele amoolu yasheleko yonse ku ciyongoli.

Ciyongoli aile nensansa saana pantu aakwete amoolu ayengi. "Nkalaendesha ukucila uuli onse," efyo atontonkenye.

Panumafye Ciyongoli aile, insoka yaishile kung'anda ya kwa Maguru. "Maguru, shimpeniko amoolu," efyo insoka yapapeete.

"Nimpeela amoolu yonse. Waaciba kwi?" efyaipwishe Maguru. "Naacilaalisha," efyaaswike Insoka.

Maguru afwaile mung'anda yakwe nga mwalisheleko amoolu ayali yonse. Leelo tasangilemo ayali yonse.

Maguru afumiine panse nookutila, "Cabipa we nsoka, takuli amoolu ayashele." Insoka yaikulwilefye yaya na kung'anda ukwabula amoolu. Ukufuma bulya bushiku insoka tailaalisha. Lyonse iloleela inshita ikapoka amoolu.