Kale saana, ifyuuni fyalilongene. Fyaleefwaya ukukwata imfumu nga bantu neenama. Cuuni nshi caali nookuba imfumu?

"Kapumpe wamaka eulingile ukuba imfumu!" efyatiile icuuni cimo. "Awe kapumpe teeti abe mfumu. Kabili nga aita omfwika kwati aleeilishanya," efyasosele icuuni cimbi.    "Mwakatala! Pantu mukulu kabili alaabuluma kwati ninkalamo," efyalandile icuuni nacimbi. "Iyo. Tapupuka. Imfumu yafyuuni ilingile ukupupuka."

"Nine ningile ukubeemfumu. Pantu ndi naaliyemba," e Pikoko. "Waliitemwa saana iwe. Ine nalikwata amenso ayakulu. Nine mfwile ukubeemfumu," e Cipululu. "Teeti ubeemfumu, Cipululu," efyapundile ifyuuni fimbi. "Uya mukulaala lilya bwaca akasuba katula."

Tabaafikile apatali mukusaleemfumu. Icuuni cimo caalitontonkenye. "Uwalaapupuka apatali saana ewalaabeemfumu," efyocatiile. "Ee," ifyuuni fyonse fyapundile kabili fyapupukiile mumulu.

Icibata capupwike ubushiku bumofye kabili cacilwike impili ishitali mucaalo. Kapumpe apupwike inshiku shibili mumuulu ukucila pampili. Leelo Ikubi lyapupwike inshiku shitatu ukwabula ukwiminina ukuya kukasuba. Pamuulu ifyuuni fyaumfwile Ikubi lileepunda, "Nine napupukisha, nine mfumu."

Ikubi lyaumfwile pamuulu waliko amashiwi yakuti, "Tii, tii, tii! Nine ndimumuulu saana. Nine mfumu." Kaali kaatyetye, akooni akanoono pa fyuuni fyonse. Akatyetye kaalikatilile amapindo yakalamba ayeKubi ilyo lyaleelela mulwelele.

"Tawancishe kabili," efyatiile ikubi. Lyapupukiile mumuulu. Ikubi lyapupwike ukuya mumulu saana mpaka lyafikile mpampela. "Ndipamuulu saana ukucila icuuni icili conse cimbi. Nine mfumu yenu!" efyo apundile.

Lelo mwisamba lyamapindo yeKubi, mwali akooni akanoono. "Tii, tii! Tii, tii! Nine munoono! Ndi mfumu yeenu!" Ikubi lyalinaka saana icakuti lyalifilwa nookupupukilako mumuulu.

Ikubi lyapupukile panshi ninshi nakatyetye nako kali mwisamba lyapindo.    Ifyuuni fimbi fyalifuliilwe akatyetye. Fyalikalolela ukuti fikafumye amapindo.

Ilyo akatyetye kamwene ifyo ifyuuni fimbi fyafulilwe, bwangu bwangu akatyetye kapupukiile mucilindi cansoka leelo insoka tayalimo. Ifyuuni fyaleelolela fyaebele Icipululu ati, "Iwe waalikwata amenso ayakulu uloleele apa pacilindi pakuti akatyetye nga kaafuma ukeekate." Efyo Icipululu caikeele pacilindi.

 Akasuba kaalikabile neecipululu efyo caleele. Akatyetye kalilengeele kamona Icipululu nacilaala. Efyo kafumine kaapupuka nookupupukila mumulu ukutali.

Icipululu caumfwile insoni pantu caalilekele akatyetye ukuti kafyuke. Nomba Icipululu cilungafye ubushiku. Akasuba cilalaala pakuti beecimona kufyuuni fimbi.