Kwalifye saaca imo mumushi mwakwa Ebei. Yaali iikulu kabili iyabuluu. Yaali iyacongo saana.

Bushiku bumo, baana Ebei baatile, "Mailo tukaya ku tauni mukushita yunifomu yobe."

Ebei alitemenwe saana. Pakuya baleekabilwa ukunina saaca. Ubo bushiku Ebei aalifililwe ukulaala.

Uluceelo-ceelo Ebei alishibwike, afwala nookufwala banyina tabalaaisa mukumubusha.

Ebei nabanyina baile pamakasa kucitesheni ca saaca.  Baaloleelele saaca iikulu iyabuluu. Leelo saaca tayaishile.

Abantu nabambi bafikile pacitesheni ca saaca.  Baaliilishanya pamulandu wakuti saaca yaaliceelwa ukufika. "Bushe saaca naitusha?" efyo baipwishe.

Ebei aliisakamikwa.  "Tatwaye kutauni." "Nshashite yunifomu yandi," efyo atontonkenye.

Abantu bambi baalinakile ukuloolela. Baaliiya na kumayanda. Leelo Ebei aalilila akana nookuya ku ng'anda.   Banyina baalimutalalika.   "Twalaaloleko panono," efyo batile.

Palya pene, baumfwile icongo. Baamwene noolukungu mumwela. Saaca yaisa!

Leelo iyi saaca tayaali buluu. Tayaakulile. Saaca iyi yaali iyakashika kabili iinono.   Abantu baaleeloleela baaloleeshe saaca.  Tabaaninine muli saaca.

"Ingileni! Ingileni! " efyapundile banamutekenya ba saaca.   "Twaceelwa saana leelo," efyo banamutekenya ba saaca baatile.

Ebei nabanyina ebabaliilepo ukunina. Ukwabulookupisha inshita, abantu bonse baniinine muli saaca iinono iyakashika.

Ebei aaloleeshe panse peewindo. Amwene abantu nabambi pacitesheni ca saaca.

Abantu abengi baaleefwa baaleebutukila ukuniina saaca. Nomba baaliceelelwe.  Saaca yaaliswile.  Saaca yakashika yaile kutauni.

"Bushe saaca iikulu iya buluu ilikwisa?" efyo baipwishe banyina Ebei. "Naifwa," efyo baaswike banamutekenya.  "Tuleeilungisha. Ikeesa mailo," efya landile banamutekenya.

Ebei tasakamikwe neemimonekele ya saaca. Tasakamikwe nookuceepa nelyo ukukula kwa saaca. Aalitemenwe pantu iyi saaca yaleeya kutauni.