Ho vha hu na bisi nthihi fhedzi muvhunduni wa ha Ebei. Yo vha i khulwane nahone i ya lutombo. Yo vha i na phosho.
Liṅwe ḓuvha mme a Ebei vha ri, "Matshelo ri ḓo ya ḓoroboni u renga dzhunifomo yaṋu ya tshikolo."
Ebei a takala vhukuma. Vha ḓo ṱuwa nga bisi khulwane ya lutombo. Ho ngo eḓela hovho vhusiku.
Ebei o vha o no ambara musi mme awe vha tshi ḓa u mu vusa.
Ebei na mme awe vha tshimbila vha ya vhuimabisi. Vha lindela bisi khulwane ya lutombo. Bisi i si bvelele.
Vhaṅwe vhathu vha swika vhuimabisi. Vha vhilaela uri bisi yo lenga. "Bisi yo ri sia?" vha a vhudzisa.
Ebei o vha a khou vhilaela. "A ri nga koni u ya ḓoroboni. A thi nga koni u wana dzhunifomo yanga," a lelekanya zwenezwo.
Vhaṅwe vhathu vha ṱovhowa vha humela hayani. Ebei ene a lila a sa ṱoḓi u ṱuwa. Mme awe vha mu khuthadza. "Ri ḓo lindela nyana," vho ralo vha tshi amba.
Hu si kale vha pfa phosho. Vha vhona buse muyani. Bisi yo vha i khou da!
Fhedzi bisi ya hone a si ya lutombo nahone a si khulwane. Heyi yo vha i tswuku nahone i ṱhukhu. Vhathu vho lindelaho vha lavhelesa iyo bisi. Vha si ṋamele.
"Kha vha dzhene! Kha vha dzhene!" mureili u a vhidzelela. "Ro no lenga nga maanḓa namusi," a tshi amba.
Ebei na mme awe vho vha vhone vha u thoma u dzhena. Na avha vhaṅwe vha kona u tevhelavho.
Ebei a sedza nnḓa nga fasiṱere. A vhona vhathu vhanzhi vhuima bisi.
Nahone vhathu vhanzhi vho vha vha tshi khou gidimela u fara bisi. Fhedzi vho vha vho lenga. Bisi yo vha yo no ḓala. Bisi tswuku ya livha ḓoroboni.
"Bisi khulwane ya lutombo i ngafhi?" hu vhudzisa mme a Ebei. "Yo tshinyala," hu fhindula mureili. "Ri khou i lugisa, i ḓo da matshelo." O ralo a tshi engedza.
Ebei ho ngo londa zwa muvhala wa bisi. Ho ngo londa vhungafhani ha bisi. O takalela uri bisi i khou ya ḓoroboni.