Saŋa saŋa kaŋa naŋ pare, Naa kaŋa da bebe la ka o yuori di Kayanja. O ne o pɔge ane a o pɔgeyaa Apenyo la da kpeɛrɛ a Naa yiriŋ. A Naa pɔgeyaa Apenyo da veɛlɛ la yaga ka neɛ zaa da boɔrɔ o, kyɛ a Naa da maŋ ŋmaa la a kyaroo boma ka a e yaga te zuo.

Naa kaŋa meŋ ba naŋ boɔlɔ Aludah Beremɛ da kpeɛrɛ peɛle la a Naa Kayanja yiri. Ba da boɔlɔ o la Beremɛ, bonso neɛ zaa da ba gaŋna o noɔre. (O da ba maŋ taa nemibaaloŋ ko neɛ na soba zaa naŋ gaŋ o noɔre). A Naa Aludah ŋa pɔge deɛ da kpie la ka o da la boɔra pɔgeyuo na de.

A Navorɛɛ ŋa da gaa la a Naa Kayanja zie ne pɔgekyare boma a na te de a o pɔgeyaa. A dɔba bama naŋ da zeŋ yele a yɛlɛ la ka a Naa yiri yeme na kaŋ woŋaa. A yeme ŋa meŋ ne a Naa pɔgeyaa da ba yire taa poe.

Naa Aludah da sagɛɛ la a na poŋ a o naboma ziiri ayi a iri kaŋa kyare a pɔge. O da la de la kparpĩĩ poɔ a kyaroo boma poɔ. Ba sɔgele la a nare a Naa Aludah ne a Naa pɔgeyaa Apenyo kultaa. A Naa da baŋɛɛ ka a o pɔgeyaa poɔ koŋ pɛle ne a kultaa ŋa.

A naŋ da wa kyɛre daa ka a kultaa ŋa na maale, yeme Kakembo gaa la Apenyo zie a te yeli, "N kyɛnɛ, a fo saa nare la fo ne Naa Aludah kultaa. A kyɛre la daa gbuli ka a kulitaa tigri ŋa di."

Naa pɔgeyaa Apenyo noɔre da maaɛ la. A tontobaa na o da ba baŋ lɛnɛɛ zaa o naŋ na e. Ka a pãã da wa teɛroŋ, "Maã daŋ koŋ kuli Naa Aludah zaa. A dɔɔnyaa-vorɛɛ na be? A koŋ tontoma! N na page la wieo gaa Trevor zie te nyɛ bon na o naŋ na tõɔ e a poɔ ka a yelwolaa ŋa ta page ma." Apenyo sɛnɛ da la a Trevor.

Apenyo da sɔgle yi la a tensoga na zaa a yi. Ka a saa da erɛ baŋ zie na o naŋ da gara, o da na mii la yaga. O da kpɛ la mɔsɔgo poɔ, a do piiri, a kpɛ tuuri kyɛ te o Trevor zie. O naŋ da wa ta zaa ka o balɛɛ la ka kɔŋ ne kɔnyuuri era naa ko o.

Ka Trevor da soore o, "N nonna, bonso ka fo zo tensɔga ŋa a kpɛ tuuri poɔ a wa kyɛ tensɔga ŋa?" o da ɔŋ la kõɔ ko o kyɛ da bare o ka o pɛnne. Trevor da ba la toɔna na zeŋ teŋa kyɛ kyɛle Apenyo noɔ yɛlɛ.

Ka Trevcor soore o, "N nonna, boŋ yele la be be?" Apenyo da voore la yaga zaa a kyɛ yeli nembɔɔyɛlɛ, "N saa boɔra la ka o de ma ko Naa Berema ka o kuli, kyɛ maa eŋ ba boɔra a dɔɔ faa na. Trevor, fo naŋ ba taa bonzaa kyɛ fõõ la ka N na kuli. N sagɛɛ la ka yeli zaa naŋ na wa o wa. Fõõ la ka N nɔŋ."

Ka Trevor kõkyeere, "N nɔnna, N ba taa bonzaa a na tõɔ kyare fo. Fo baŋɛɛ ka nandaana la ma." Ka Apenyo yeli, "N baŋɛɛ la kyɛ fõõ yoŋ la ka N boɔra na kuli." O da la teɛre la a yele, "E ka te gaa Kategga, a gborŋmaara zie ka o de te gaŋ ne a kolaa ka te be a kolaa gaŋne. Lɛ la ka N saa koŋ la nyɛ ma bee a baŋ a te kpɛ zie."

Kyɛ a Naa yiriŋ, Naa Kayanja da wa nyɛɛ ka a o pɔgeyaa ba kye a yiriŋ. O da e la ka o gbaŋgbaare yi a boɔrɔ o. Ba gaa la tenne ane zie zaa a yɔ boɔra a Apenyo. A Naa areguuribo ane a tontombiiri zaa da yie la a bɔ Apenyo lɛɛ kyɛ ba nyɛ o. Ba da leɛ gaa la a te yeli ko a Naa ka ba ba nyɛ Apenyo. Ka a Naa da tanne ne suuri, "Yɛ kpɛ moɔ poɔ meŋ a te bɔ o."

A Apenyo ane a Trevor naŋ da naŋ zoro gara a kolaa poɔ, saa kpoŋ da koe la. Ka saa da wa ne sasekpoŋ.

Kategga meŋ da are maala la o gbori ennɛ ka a dɔɔ ne a o pɔge la sãã wa yi. Trevor da yeli ko la Kategga ka o mɔŋ ba gaŋ ne a kola. Kategga da zagre la kyɛ yeli ka sasekpoŋ naŋ waana zuiŋ, ka a na eɛ tuo ka o de a gbori kpɛ a kõɔ poɔ.

Trevor da naŋ are ne o la gbɛɛ. O da wuli la ba kyɛmo ananso ko Kategga. O da toŋ la kɔreŋ a iri libipelaa ko Kategga. Kategga naŋ da woŋ a ba yeli na, nembaaloŋ da kpɛ o la. A saseɛ naŋ da erɛ, kyɛ o da sagɛɛ la na de ba gaŋ ne a kõɔ.

Kategga da tage la a gbori peɛle ba a e ka ba kpɛ. O da de la o vuuri a mɔna a gboro kpeɛrɛ ne a kõɔ poɔ. Naa kayanja ane Naa aludah naŋ da wa ta a kolaa noɔreŋ, ba da nyɛ la a noba bata a gbori poɔ. Ba da nyɛɛ ka a nɔnnebɔ bayi na yi la ba nuuriŋ.

A saseɛ da fo la yaga a viiri a gbori yaga zaa. Kategga da koŋ la tõɔ e yeli zaa. Ka Naa Kayanja meŋ da are tanna boɔlɔ: "Apenyo, sɔroo zaa, leɛ wa. N di la suuri ko fo ane Trevor zaa. N koŋ e yɛ yelfaa zaa." Ane a ŋaa zaa ka a parɛɛ la. A gbori da vɔgle ne ba la a ŋmɛ ba te eŋ a kɔndie poɔ. A kõɔ di ba la. Anaŋ da yi a ŋaa puoriŋ neɛ zaa pãã da taa la sori na kuli neɛ na zaa o naŋ boɔra a Naa Kayanja paaloŋ poɔ. Ka nandaana la bee ka bondaanaa la.