Kimina ayong ka lopaekang Kiki akireb ng'akiro. Ng'esi kiyenea sua na asubasi anawaitin kosi lokojokon. Apei kolong'it kiponit sua alosukul kiteni nawi, kipotu atopupokin atamar kilosi wache akireb.

Kipotu etoro diye erot amotoka anakaropeon tarai bo kichikit apakeng a Kiki nyikitoro neni. Ekisidi, kipotu eng'olikisi ekile lokooyen, lo anapit ekoti lokooyen kiriono, kiwapit sua wadio.

Kipotu sua dae atolot wadio kisaki esemoto ng'esi alodiye. Arai itwan nikiteemi. Eleleba loper loleu keng. Auriaka ng'ipon keng pe arapito ng'ikel keng luong'ora. Ayakar ng'esi apar naapolon epeiwae ereet keng.

Abu etau kang kidong'ak lokojokon tosubu kori edikino ekile ng'olo iirari. Abu ayong atopochoki ng'esi ng'akonyen. Nyejoikina ng'esi eger lo akienyikinitor ayong, kikilau tama, "Iyong idia lo, ng'ae ikienyikinit iyong?"

Kitobul sua epung'aros, nakaneni nyipung'ara ayong lokojokon. Kirumu ekile ng'olo eworu kang lo erarum kiriyaa ang'ikiling'a.  Kilany lopaekang Kiki ng'esi.

Katadaku ayong ekile ng'olo kwa akaratas kemasak tooma ache motoka nakwaan na awei anaro. Kiboikin ng'esi lokicholong lo along'aren. Katobun ayong lorukitos keng lo ayei tooma amotoka ng'akonyen, katoeniya ng'akan akamaluot. Dio ekamen kirita amotoka lokojokon.

Abu erukoot lo ang'iarei lokiboi ka ayong, tolemu aworu nakaasikon kewaak ayong loreet. Na eriyaria auris kona abu atojotoor. Ekisidii na akienyunia, atoriamu aperi alokwap akai nati aribokinit noi. Eleleba ng'asimokoka ka ng'irunyei.

Napei kona tang'aar emulango. Tolomu erukoot losek kemukit ayong ereet eting'it atubwa. "Kimuj atipei kotere ilosi iyong nikooyen," tolimu ng'esi.

Na eirarei ayong akiroit be 'alosit' abu atonyou emuj ataanyunia ng'ikiling'a. Talacha erukoot ng'olo auno nakaenitor ayong. Aniemuji ayong kiboikin ng'esi lokwaas emasi esigara. Kilelebun apuru tooma akai wadaang.

Kidong'odong'ok itwan emulango, tolomu erukoot epei ka ekamen amotoka edakito edia. Keponi kirumunae Kiki dae! Wae! Kitogolokis dir kai naaribokinit.

Kipotu atoriputu atamar ikwa erukoot lokooyan loaronon ereet ng'esi arai ekapolon aluche. Pe alakara erukoot lokainuni ayong akimuj kotere ng'akiro naasubete kechi. Kipotu eirasi iburate aloking'a. Tolimu lokarikon tama, "Nyasaki akiyen teni kiyen iyong awi kech. Nyilochi iyong ng'itamen kon tokona."

Kotere eburas ng'olo, kipotu sua atoyena atamar kiyenete kechi sua. Tama Kiki, "Bua ataanyutu erot lokisiya. Emakatar ng'ikauriak yok ng'aropiyae nakiyuuneta ng'oni." Kiburata ng'irukoi ng'ulu tani tojioto. Abu ayong atalachak Kiki atipei, atang'aasi emulango esiakisi akisak erot lokisiya.

Kipotu eng'olikisi epuke akai lokaading'an loachai. Eriutu ng'akito todol nialachakinotor ng'isimaria luakodito. Atachadasi dio tololomer lokojokon.

Adit akwan a Kiki nabo awowong. Atamasi king'arenik ng'esi tasaka erot loking'arakinor. Abu ayong eng'arak ng'esi kitor lopuke ng'olo dio toporok kwap.

Napei eirareta ng'irukoi ng'ulu ng'ikukus a Kiki, tanang'a emulango tang'aasi. Towaa tokienyikis epuke, sodi kiding'iding'aros topudosi king'a. Tong'oa, noi lotete apolon loa ereet aloaronon, na ang'opikinia ewae lo amatar idia. Tama niti kedichi, "Etachete ng'ikauriak kon ng'akiro nuku."

Apotu taramakis ng'akito togolo epuke. Abu ayong eira kechi nabo iburate. Abala lotete amasi esigara katalachakin ayong. Aemit lokamen atamar kori erikuni Kiki arek. Nakaneni asaki lokarikon ng'aropiyae.

Napei kona eira etoil aitwan aniapolon ebala, "Nyiyem. Adolu arek. Kinapakin kwap kimuk akou nabo nyiyotok."

Tachalau etoil ka eruye ang'imalia atom. Nyeyena ayong ibore asuba kotere eriamakina aapei. Tolomut ng'arekea tooma kai dio kirumut ng'irukoi atipei.

Tang'aa naberu emulango, tolomu kemukok ayong aworu. Tama, "Ayakar lopaekon akuj kotere abu todolu nikitiyaa sua etich. Napei kona atarama sua elii potu ng'asigeria nache apotu atosubakisi ng'irukoi lu!"

Toenae ng'irukoi ng'ulu ng'akan kijukakinae tooma amotoka na arek. Atoloma ayong ka naberu tooma namotoka apei. Kayaar ayong nawi lokauriak kang luabulit. Anyoun akwar ng'ina, kirau ayong ka Kiki lukachoak lokojokon.