Cango, cango, cango obedo nyako moro ma i lwongo ni Nyakawululu. Nyakawululu obedo nyako ma ja cut wac swa. Min Nyakawululu ogwoko go kwoŋ cuto wac, to Nyakawululu ko winjo.

Ndir acyel two omako way Nyakawululu. Peco pere oyido nitye yoloka ma koca.

Min Nyakawululu oyido nitye gi tic mathoth swa i ndelo no. To meno miyo min Nyakawululu miyo go cyemo othieno de othieno tero ri way mere.

Munyo Nyakawululu otundo i royo oromo gi Otoyo. Otoyo obedo ondyek m'olokere cal dhano.

Otoyo openjo go gima otiŋo. Nyakawululu to dwoko ni, "Riŋo, tongweno gi cak." To so nende min Nyakawululu ogwoko go tel tel ni wokir wo wac ri dhano moro je gima go otiŋo.

To doko Nyakawululu waco ri Otoyo ni way mere two aka tero ri go cyemo. Law ocako loro ri Otoyo ka oparo kwoŋ riŋo ma Nyakawululu owaco ni otiŋo.

Otoyo oŋweco piyo piyo to telo tundo ri Nyakawululu pa way mere.

Omwonyo way Nyakawululu to go ama umere gi bilangit.

Munyo Nyakawululu otundo, onwaŋo ot pa way mere oliŋ ni si. Odonjo i ot to lwoŋo ni, "Waya, initye yo kune?"

Munyo Nyakawululu ku winjo dwondi way mere, odonjo i kisika kama way mere nindo iye. Obwok munyo oneno dhano o umere gi bilangit madwoŋ.

Nyakawululu openjo ni, "Waya, iraŋo ithin dwoŋ ama konon?" Otoyo odwoko adwoka gi i bilangit ni, "Aka nyaka awinji gima i waco maber."

To doko Nyakawululu penjo ni, "Waya, iraŋo waŋin doko dongo adonga ama konon?" Otoyo doko odwoko ni, "Aka nyaka anenin maber."

To Nyakawululu penjo macowe ni, "Waya, iraŋo dhokin dwoŋ tek tek ama konon?" To Otoyo dwoko ni, "Aka nyaka a mwonyin woko." Gikenyo to Otoyo pori wok iwi kitanda to mwonyo Nyakawululu.

To paka Nyakawululu oyido obedo jacut wac, omedere ameda cuto wac kir munyo nitye i iy Otoyo. Openjo Otoyo penji kweth de kweth.

Cowe mere, Otoyo ooli gi penji pa Nyakawululu mar amen to jok ŋulo go woko.

Ju loka no jo dimo Nyakawululu gi way mere. Wok ndir no Nyakawululu odoko ku cuto wac ri agem.