Gote oyido othoko calo Mwelo. Thwondhe mathoth oyido nitye i gote no. Thwol madwoŋ m'oloyo oyido jo piny no jo lwoŋo ni agwegwe. Ji mathoth oyido jo lworo thwol no. Oyido mwonyo dyegi gi rombo kir gi nyithindho je.

Ndir acyel, nyimere adek Apiyo, Ajore, gi Awor jo ay kidho dimo yen i lul no. Adha jo ogwoko jo ni, "Kure win ri Agwegwe, thwol madwoŋ. Wikir widim gimoro jye i lul no kwanyo woko yen kende." Ajore kende ama ku diko ithe winjo gima adha jo owaco.

Nyir me jo tiŋo cak, malapi, rabwo gi pi. To jo tiŋo panga ma bith swa ma toŋo yen gi thondhe matweyo. Gi kenyo to jo ayi kadho i lul.

Nyimere me jo lyesa to jo nyero i royo malo malo. I hongo moro to Apiyo, madwoŋ kwoŋ wadi, owaco ma piyo piyo ni, "Liŋ win. Wa cegin tundo kama agwegwe nindo iye."

Awor olwoŋo wadi ni, "Nen win, ee laki agwegwe mafeza. Wey wakwany win." Apiyo opoya wadi ni, "Wiy wan wu kir wu wili gi gima adhawan ogwoko wan iye. Wakir wadim gimoro man je i lul kende yen."

Ajore to waco ni, "Aki geni adhawan. Aparo ni owaco ameno ma geŋo wan bedo gi gima wamito. Amito lake mafeza me." Nyimin go jo bedo gi bwok. To jo waco rigo ni, "Ajore nende wa gwokin." Ajore ku dewo kada.

Piyo piyo agwegwe obino rango lake manya feza. Olokere mager munyo ku nwaŋo lake. Agwegwe owinjo nyir ma jo lyesa aka ju nyero. To kidho to pondo i ŋangi tele ma dhu yo ma nyir me jo le luyo ka jo dok.

Nyir no oyido jo dok gi yeni pajo i wiy jo. Mapiyo piyo to jo winjo gimoro otimo ni, "Hzzzzzz!" Agwegwe oyido niye dhu tyendi jo ma oŋamo aŋama dhoke pa kidho kayo jo. Nyir me to jo kirin swa.

Agwegwe openjo nyir no ni, "Ŋa mu kwanyo lakan ma feza?" Dhano jye to liŋ aliŋa ma kudwoko. To thwol omiyo jo ratem ni, "Ŋat ma ku kwanyo lakan, la wero ma olilo maber. To dok peco gi yen pere. To ŋat ma okwanyo lakan ku lil wer maber. Le bedo cemo paran ma ndelo adek!"

Apiyo ama otelo wero gi dwonde ma loŋo de ni: "Ki an, an angoye gi wac kodin. Ŋat ma ni gi wac kodin fuodi nitye cen." To Awor bende to wero. Go bende owero ma dwonde loŋo.

To weso pa Ajore tundo. Go obedo gi lworo. Odhire ye yo wiye to cako wer. To wer pere owinjere marac swa aka wodho wac obedo rigo mapek. To Agwegwe koko ni, "I ki nyali wero maber paka wadin?" Thwoli onyaŋ paka Ajore ama okwanyo lake ma feza.

Agwegwe oŋamo dhoke madwoŋ swa to mwonyo Ajore. Nyimin jo ŋweco to jo dok i calo. Jo waco ri ŋat ma jo romo gi jo je gima obedo. Adhamere okumo ka waco ni, "Agwoko go, bedi winji gima awaco ri go!"