Yì-iì dzə̀ é ghan símóʼ sí fó yàngùʼ, wónlě nsùm ámóʼó wáa dzə abaà, ve anàʼ véví-iì làyìn.
Áwune tàʼ anàʼ vìn, ghán sí nèn shaàsìn a baá yoʼ yèn.
Ndzə lòo sən, áwune nèn yèn və́y a wú bán e lav yìmòʼ.
Áwune nèn sìysì ji áwune wàá du, e lòn á kirəʼ kée shiíy sho.
Áwune dù, e kùmrì shúu lav.
Wú mvə̀ʼə̀m, áwune nəə́.
Wónlě nsùm vine yoʼ yèn wír e lav. Yii bèy, á yú jí wìr, a yì shaʼtì áwune.
Ji wìr rə̀y nèn yòŋ jii, Dzə̀ mo shinser. Vèn mvəʼ kíŋé, e lì viyíkìr vi fó fo. Vèn mvəʼ ntòn Nsoʼ, é vèn yén kifá kée no.
Wìr və̀y nèn lò e bìnkìr rú é shinsèr, e nèn ŋàŋrì, e fəə̀.
Wónlě nsùm vìyi yíkír, e nò, e beèrì feyì.
Áwune nèn fəə̀ fó lav, a dù.
Mo á du, kwaʼtì ye bií nèn wìy aáwuné kitu.
Á nèn a jeykír jii, "Feyì, feyì, a dzə̀ kí ghàn é le bo shinsér shi fó vèr viyíkìr é vèr sə́.
Á jéykír bey, e nèn sìysì ji á kfə́n a e bàm, e dù, e bvə̀ʼə́y á shinser shee shooy.
Á kfə́n é bàm, é lav fèy, e nèn bvə̀ʼə́y shinser shìy.
Mo á bvəʼəyin shinser bèy, à shinser shi, à lav nen sàsìn, e tàʼrí, e lày.
Áwune nèn yèn, aá sí tíy a dzə̀ fó ndzə e ŋgèŋgèr.