Agho olwatuuka, nga ghabaawo omusaadha eyayetebwanga Byantaka. Byantaka yali ne ente ye nga nkazi. Byantaka  yayayanga  ente ye yaiguta  bukalamu. Yagighanga  na amaadhi  yaanhwa. Aye Byantaka yali nabwa kasumbi katono kati.

Kyeyava agya ewa mulilaanwawe  yeyazike entamu agheeremu  ente ye amaadhi. Mulilaanwa yaikiriza  okwazika Byantaka ku nsaka dhe esinga bunene. Yaakoba ati, "Omulilaano gwokya dhoona ibiri."

Ghaabita enaku mbale, Byantaka yaagya ewo omuwumbi. Yaagulayo ensaka entontono. Yaagileeta ghakawe. Yaatoola ensaka entono yaagita munda mu nsaka  yeyeeyazika ewa mulilaanwawe.

Yeetwika ensaka dhombi ku mutwe gwe yadhitwalira mulilaanwawe eyamwazika ensaka.

Byantaka yaamukoba ati, "Mulilaanwa, Ndiziiza ensakayo nga ezaire."
Mulilaanwawe yeewuunia ati, "ensaka yange yazaala ensaka eyindi!"
Yaatendereza Byantaka ati, "Enhumbayo ya mukisa."

Oluvainhuma,  Byantaka yairayo ewa mulilaanwawe amweyazikeku entamu. Kino tiyakikola mu mwoyo mukalamu.

Mwene nsaka yalindirira Byantaka okwiza ensaka nga tamubona. Yaabitaamu engaito yaatuuka ewa Byantaka. Yaamukoba ati, "Muna nnonie nsaka yange."

Byantaka yaakamutema ati,  "Mukagwa, entamu yaife yafa. Ondagaine neetegeka kwidha kukubikira."

Byantaka yeekyankyamula ati, "entamu yaife eyali ennungi obwaga agho yatufiireku. Nagiziise agho gheene agho!"

Mulilaanwawe yaadhikubamu obukiika dhayaka omuliro. Ne enzigezige dhaasituka. Yaatanula okuyomba ati, "Nze kino tikibonangaku. Ensaka okufa?"

Mulilaanwa yaagemwa obusungu yaagya mu mbuga yaaghaghabira Byantaka.
Omulamuzi yaawulirisa okweinhonholaku kwaibwe bombi.
Yaasala omusango yakoba gusinga mwene nsaka.

Yabuuza, "Byantaka bwe yakukoba ati ensaka yazaala, waikiriza?"
"Iyi."
"Kale, bwakoba ati buli kilamu ekizaala kili no okufa, aba mutuufu!" Atyo omulamuzi bweyalamula omusango.

Mulilaanwa yaira yo ghaka nga abbwoita bubbwoite oti ikovu. Atyo Byantaka yanhaga ensaka mu magezigezi.