Olukoba lwa Matungu lwabotokhanwa nende efikulu. Tsinzukha tsinyinji tsiamenya mumutsuru khufikulu. Abamulukoba bakulikha inzukha ingali Unyalego. Inzukha yino yarisia abaandu abanji khubeera yalitsanga tsimbusi nende amakondi.

Inyanga ndala, Asitou, Joy nende Sofia bali batsia mumutsuru okhurenya tsikhwi. Kukhu wabo yabakanira, "Mwilinde nende Unyalego. Mulabukule eshindu shiosi mumutsuru ilali tsikhwi." Joy shiyaulirisia ka kukhu waye ta.

Abakhaana bachinga amabeere, amaremwa, amapwoni nende amatsi. Babukula emikoye chiokhuboya tsikhwi nende olupanga lwokhurema emisala. Bachaka oluchendo okhutsia mumutsuru.

Khunjira, abakhaana bakhupa tsimbakha nibatsekha. Asitou yababoolera, "Bune. Luno no lukoba lwa Unyalego."

Sofia yabalangasia, "Lole, ameno ka Unyalego kangi'nangi'na. Khukabukule." Asitou yabaparisia, "Kukhu yakanisie khulabukula eshindu mumutsuru ta ilali tsikhwi."

Joy nakalusia, "Kukhu abeeya. Yaboola ario khubeera shasangalira khube ne efindu efilayi ta. Ali nende shikhalikhali. Ndalabukula ameno kang'inang'ina." Abakhaana babo batirwa nende oburi. "Joy, kukhukaya okhubukula ameno," nibaboola. Joy shiyaulirisia ta.

Mufise fitutu, Unyalego yarula okhukhaaba ameno kaye. Yasinyikha muno khubeera shiyanyoola ameno kaye ta. Yaulira abakhaana nibapa imbakha nende okhutsekha. Yefisa khulwanda hambi nende omuhanda wa abakhaana bali babire.

Abakhaana betukha tsikhwi khumirwe chiabo. Mufise efio, baulira "Hzzzzzzzz!" Batirwa nende oburi nibatema okhwifisa. Balola Unyalego niyasame omunwa, okhwenya okhubaluma.

Unyalego yareba, "Niwina ubukule ameno kanje kangi'nang'ina?" Shibamukalusia ta. Inzukha iboola, "Ulabukule ameno ta alemba obulayi. Alatsia nango nende tsikhwi. Ne ubukule ameno kanje alemba obubi. Alaba shiokhulia shianje khu tsinyanga tsitaru."

Asitou yemba obulayi: Sio mimi, sio mimi aliye na meno, Mwenye meno bado yuko nyumaaaaaah. Joy yesi yemba olwimbo.

Olumalirisi, Sofia yemba. Yali nende oburi olwa yachaka okhwimba. Olwimbo lwali olubi khandi amakhua shikali habwene ta. Unyalego yalokha, "Shonyala okhwimba nga abashio tawe?" Inzukha yamanya niye wali nabukule ameno kaye kang'inang'ina.

Unyalego yamira Sofia. Abakhaana babo berukha okhutsia mulukongo okhukanira be mulukongo kali kekholeshe.