Lialio litoka tsa elala mulukoba lwabo Omoka. Liali likali khandi lie shilesi. Liali no luyoka muno.

Indalo yindi, nyinamwana Omoka yaboola, "Mutsuli khulatsia mulukulu okhukula ingubo yo yemwisomero."

Omoka yasangala muno. Bali batsie elukulu mumutoka omukali kwe lilesi. Yakhaywa okhukona mushiro.

Omoka yali afwalire tsingubo olwa nyina yetsa okhumwinyosia.

Omoka nende nyina bachenda okhutsia mushituo shio mutoka. Balinda omutoka mukali kwe lilesi. Habula omutoka shikwetsa tawe.

Abandu bandi boola ashituo shio mutoka. Beiniakana khulwa omutoka kwali kubutsire. "Omutoka kukhuleshere?" Bareeba.

Omoka yahenda muno. "Shikhulatsia elukulu tawe. Shindanyoola ingubo yo mwisomero ta," napaara.

Abandu bandi bafwa omwoyo bakalukha nango. Omoka yalira khulwa shiyenya okhutsia nango ta. Nyina namuenderesia. "Khulalinda kho oluono," naboola.

Mufise efio, baulira oluyoka. Balola olufu lutuma. Omutoka kwali kwitsa!

Alali omutoka kuno shikwali kwe lilesi ta. Shikwali omukali tawe. Kwali omwakhanyu khandi omutiti. Abali balinda omutoka bakuenga. Shibanina mwo ta.

"Injiremwo! Injiremwo!" Omwirusi nayiibukha."Khushindire muno luno," naboola.

Omoka nende nyina benjira imberi. Mufise fitutu abandu boosi benjira mumutoka omutiti omwakhanyu.

Omoka yaenjerera mwidirisha. Yalola abandu abanji mushituo shio mutoka.

Buli shamundu yali yerukha okhunina omutoka. Abula bali bachelewe. Omutoka kwali kwitsule. Omutoka omwakhanyu kwasimukha okhutsia elukulu.

"Omutoka mukali kwe lilesi kuli ena?" Nyina Omoka yareeba. "Kubiyiire," omwirusi nakalusia. "Khukukasinjia. Kuletsa mutsuli," nametakho.

Omoka shiyateba ifwani yo mutoka tawe. Shiyateba obukhongo bwo mutoka ta. Yali nobusangafu khulwa omutoka kwali kutsia elukulu.