Kolong ang'orot, ayei ekapolon anyaritae Kayanja. Alomito ka aberu ka nakookeng Apenyo. Arai Apenyo apese nakebusen na asakete ng'ikiliok daang akiut. Nakaneni, asaki ekapolon Kayanja kiutae ng'ibaren alukalak.

Edunyasi awi ekapolon Kayanja ka ekatukon Loapolon Aludah. Arai ng'esi ekatukon Loapolon kotere apupete ng'itung'a ng'esi. (Arienyana ng'esi alotung'a alupe apupete ng'esi!) Na atoanea aberu keng kotere edeke lo ang'isuru abu ng'esi tasak akiut aberu ache.

Kong'ina, abu ekatukon tolot nawi ekapolon esaki akiut nakookeng. Ering'a ng'ikiliok luarei ng'ulu iyanakinito kidiama ng'ibaren lu akuuta, abu akedalan Kakembo kiira ng'akiro ng'una. Apuposi Kakembo ka Apenyo noi.

Tocham ekatukon Aludah akiutakin Kayanja epewae ebari keng. Arai emutuu epei ang'iboro kang'ulu. Aponi torekinae ng'akiro akuuta imunonitae. Ayeni ekapolon atamar nyitalakarete ng'akiro ng'una nakookeng.

Idong'it ng'irwa ng'ikan-karei min akuuta, abu Kakembo tolot ni Apenyo. "Ikoku ekapolon, areki apokon akuuta kon ka ekatukon Aludah, emini akuuta adaunet ang'irwa ang'ikan-karei," tolimu Kakembo.

Tobul Apenyo, pe ayeni ng'esi ibore ni esubakini. Kitamak tama,  "Nyachamuni ayong ekatukon Aludah, ekasukout lo atuman. Nyepedor! Kimiek ekomak ni eyei Trevor eng'olik ibore esubakin atipei." Arai Trevor epae Apenyo.

Atabong ng'ina tosiwak Apenyo anawi. Karai toyen apakeng ni alosi keng'oit. Towut toped ng'amon nakamutonok, ng'atabab, tani ni ayei Trevor. Na adolio kai keng, aburunit ng'esi, anyamit akoro ka akure.

"Akoone, inyo ikeria iyong erot kooyen bon nakware?" king'is Trevor. Dio kidokak ng'esi ng'akipi kimiek kiyang'a. Nyililing'a Trevor emasi Apenyo, edarit ng'esi kiyanak.

"Akoone, nyo erono?" king'is Trevor. Kiyang'ak Apenyo lokojokon tama, "Esaki apakang keut ayong ekatukon Aludah. Nakaneni nyachamit ayong ekile lo aronon ng'olo! Trevor, kiutae ayong tani kiboosit. Achamu ayong ng'ichan. Kamina ayong iyong!"

"Akoone, amakar ayong ebari keusia iyong, iyeni iyong atamar keboosit ayong." Kikalou Trevor. Tatachu Apenyo, "Ayeni ayong, nakaneni iyong bon kiutari yong." Tatamak wadio tama, "Kapana ni eyei Kategga lokamean atubwa, kidok ng'oni ekwakaye ang'olol. Aloger kang'olo nyikianyuni ng'oni apakang nabo."

Kaama anawi, abu Kayanja toyen atamar asiwaki Apenyo. Tomea ng'esi ng'ikedalak keng asakar wadaang anadakar. Ng'ikeyokok, ng'asigeria ka ng'itung'a daang tasaka, nakaneni emam ituan anyu Apenyo. Tobong'osi lokapolon atamar ang'op Apenyo. "Tasaka namoni," tolimu Kayanja. Ang'oit ng'esi noi!

Napei elose Apenyo ka Trevor nang'olol, kisiakis ng'idowon lukirionok aburuchaar kidiama. Abunit akiru naapolon.

Ameat Kategga atubwa keng, dio potu nikeng ekile ka apese. Tolimoki Trevor, Kategga tama, yarai kechi ekwakaye ang'olol. Towou Kategga, tolimok kechi tama ebunit akiru naapolon.

Kisisak Trevor, Kategga eger lo achamakinakar kechi ilamete ang'olol atipei. Kirepak akan lopuko tout abolokoki ekame nak Kategga. Tachamu Kategga na eng'olikenea abolokok ekame ibus. Kisienoto ng'esi, tachamu akidok kechi tani keyei akiru.

Yau Kategga atubwa lokwaas ang'olol, tolimok kechi tolomasi. Tolemu abato kitorotokinio atubwa. Anang'unet ekapolon Kayanja ka ekatukon Aludah lokwas ang'olol, king'olikis luuni anatubwa dio toyena atamar kilany kechi ng'iminan ng'ulu.

Kibapa ng'ikuwama loapolok atubwa kisipiyo Kategga. Kirema ekapolon tama, "Apenyo tobong'u kare! Karimak ayong iyong. Nyekedesi iyong kori Trevor." Nakaneni pe adikino epedorete abong'un. Tobukor atubwa ng'ina dio tanyama ng'akipi luuni ng'ulu totoaka daang. Anyoun akwar ng'ina, tachamunae itwan daang kiut itwan ni echamit, kebarit kori kiboosit, anakwap ana apolokinit Kayanja.