Ayei amotoka apei bon nadakar nakata Ebei. Arai ng'esi naapolon, napus. Achalana eruye keng.

Apei kolong'it, tolimu itokeng a Ebei tama, "Kilosi ng'oni moi akigiel ng'iworui kon lu esukul."

Abu Ebei talakar noi. Edokete kechi amotoka napus napolon. Nyejotooro ng'esi atabong ng'ina.

Na abunio itokeng akitekienyun ng'esi, akienyi Ebei aning'orot nabo anapit ng'iworui.

Apotu Ebei ka itokeng torotokis jik tani nidoket ng'amotokae. Kidara kechi amotoka napus. Nakaneni nyedoluno amotoka.

Todolut ng'ikalotok luche dang nidoket ng'amotokae. Eng'urung'urosi kechi kotere achaikinit amotoka. "Kiisik ng'oni amotoka a?" King'itanarosi make.

Abu Ebei tobul. Tatam ng'esi tama kori nyepedorete kechi alosit lotaun akigiel eworu lo esukul.

Tobur ng'iche-tung'a tobong'osi nawiyei. Nakaneni, kigor Ebei tong'er akibong nawi. Kimaima itokeng ng'esi. "Kidari ng'oni amotoka nikooyen," tama itokeng.

Napei, kiirasi eruye ka apuwa ekuwam. Talakar Ebei kotere ayeni ng'esi atamar ebunit amotoka!

Nakaneni, pe arai amotoka napus. Arai niareng'an niichi. Apotu ng'itung'a tokienyikis imotoka. Emam itwan abu todoka tooma. Abulit ng'itung'a kotere pe anupito.

"Tolomutu! Tolomutu!" Kirema ekamean. "Echaunit ng'oni akwaar naga," tolimu ng'esi.

Apotu Ebei ka itokeng king'arenikis tolomasi. Wadio, tolomasi ng'itung'a luche daang nimotoka niareng'an niichi.

Tokienyia Ebei king'a alopuke dio king'olik ng'itung'a lukaalak aniedokere ng'amotokae.

Akerete ng'itung'a lukaalak akidol amotoka, nakaneni nyedolo kechi. Kilelebun amotoka ng'ina. Dio torotokis lotaun.

"Nyani amotoka napus naapolon?" King'itakin itokeng a Ebei. "Ichwang'akina," tatachu ekamean. "Esubakinio. Iwoki moi amotoka napus naapolon ng'itung'a daang lu edong'o akwaar naka." Kiyatak ng'esi.

Pe asaki Ebei akiyen emunyen amotoka. Pe asaki ng'esi tani akiyen etiae amotoka. Alakara kotere ewokorit ng'esi amotoka lotaun.