Lwali lwamukaaga ahamwi homu Desemba ni hememula. Ebbugumu lyali ebitirifu era hiisi muutu gaali hiiyohe. Nga maama atuloma ati, "Bbooti, Mafuta ni Luhoodi mutuseho ehiiyohe, mutule ebulafu muje mugudule!"

Nga huduluma hutula ebulafu. Nga Luhoodi aloma ati, "Hutiine hu lwabi, eyo pololohiho." Nga Bbooti aloma ati, "Maama gatugeene ohwebbomba mu lwabi." Nga Luhoodi agaluhamo ati, "Sihunebbombe wabula hunagudulire mu hiŋolu ohuupi n'olwabi."

Aye omugudulo gw'ohwepena gwali gutuyaania wayire nga gwali ŋaasi wa musaala ohuupi n'olwabi. Ohwenda hutaŋulira bbugumu hweheerera hwefiihulamo engaito. Coka era hwasigala ni huŋulira ebbugumu. Ng'aŋo hwefiihulamo esaati n'ebirinda. Era hwasigaliriye ni huhiiriho ebbugumu.

Ehyahanda nga huta amagulu geefe mu lwabi ahaŋolaho. Ehyo ni hitahena nga hweswanyusaho amaaji hudoola.

Nga Mafuta ahanda aloma ati, "Muhole seeyi hwebbombe! Ko muŋeega muuti maama anamanye?" Ng'aŋo hwebbomba, hwebbomba hwibirira n'esaawa ej'ohwagama.

Eryuba ni lyatandiiha ohwihirira ohuja ohugwa mu maaji ng'embeŋo etandiiha ohutuŋamba. Era nga ko huhebulira ohwendula aŋahutaaye engoye jeefe.

Hwajendula ŋaasi w'emisaala, hwendula mwisugu, hwendula hiisi ŋaatu, cooka ndihujibona.

Ŋaaliŋo eŋombe ohuupi n'olwabi ni jaaya enyaasi egimuhi hwigobo. Bbooti ni gagangamuha ng'ayibona atuloma ati, "Mubone eŋombe yira! Yirya hiina?" Nga Luhoodi aloma ati, "Yiri hulya ehimuli ehirando." Nga Mafuta aloma ati, "Oli hisiru? Sobona oti yiri hulya saati yiyo?"

Nga hubona eŋombe eyindi niyo ni yiri hulya ehiitu ehya bbululu. Nga Bbooti genianguha ati, "Yiri hulya hirinda hyange."

Hwagamayo engo mu pajama jeefe ni hukaakana. Sirwa mbeŋo aye olwohuba hwali humanyire ehinatwoleho. Olwohuleha eŋombe jalya engoye jeefe obunyuma bwali butubaliriiye ni humanyire huuti maama anatusyalemo obuswanyuswanyu.