Yim laa, yaana yindi Nana-a Nani-a yanja-a bawanja-a nasuna. Na dasaganadә jauro ngamdu. Ingi cududiwawo, nemaye bawo. Kәmbo manәmiya, sai ledu kuruwu dimia.

Nana, fero darajaa ye nәmgada ye sәrra ye. Yanjuwuna Nani kәla kәbbua wundumaye gala ngojiwawo. Ambo kissәgәnni.

Dunia wayenniya, kәramiya yindidә kәmbo gәnama cadanni. Kәmbo madaro leyera. Nana-a Nani-a jawal gade gadeyen leyera.

Sadәn, kәmurjo laa Jari canidә gәrenjadә tiye kәrga. Wundu yaye Jaria jaijaro nojәna. Amma kasa nandǝɍimaye cәdana. Tiyinju nga tuno.

Nania kәmurjo adә bowoyeno. "Feroni, nganәm? Ndaran Kadim? Ndararo lenәmi?"

Nani koronju sammaro jawu keno. Koro kamu kәmurjodә tiro yeno, "Fanniro kalansәne awo laa wuljǝgәkke." Nani kәmurjodәro mana kuttu kuttu cәddo: "Dunonәm kinaji adәa lenәkko nәmidә nukkәna ngalwo."

Kәmurjodә tiro kissәgәnni, kәlewan jәmme yeno.

Daji Nani jawalnju kida, na laa ajappa nayeyen. Nadә dәngaɍi so, kadi so, kuɍiya jiɍi jiɍi kada. Naniye tiyi nga faida bawo, jau maro cәmbarәna nangaro awima juwunni. Na adәn napciya, kuɍiya tia jagәri.

Jawalnin, Nana-a kәmurjo-a kattado. Kawu bәlaaro badijәnayen, Jari runjumaa Nana curo, jauro karwunju kәji. Kәmurjodә tia bowoje, koro kamanjuro cәddәna ngaa kiddo.

Nana kasacce Jaria fannjuro kalakkeno. "Awo am nguwu cadәnni ni dimba," yeno kәmurjoye. Nanaro ka ce, fadoro walle nadәn awo ragәmba ngaa fandәmi yeno.

Nana kәmurjodәa wuseje, ngәrәmbaro fadoro leyeno. Fado bәɍin kare-a kәmbo kada-a nayeyen. Lardudәn kamuwa ngaa nangaɍiwun kojәna.

Amma yanjugәna faccәgәnadәro sawi yaye ciri, "kam gala kәrәnjiwawo wa ci kәmagәnnero ngayi."