Ukuqinteliswa kwamakhambo kweenkolo
African Storybook
Busisiwe Ndlovu
isiNdebele
First paragraphs
UBusisiwe banoBandile bathabe kwamanikelela. Iinkolo zivaliwe ngesimanga sokuqinteliswa kwamakhambo!
-
Bathabele ukuba nesikhathi esimnandi emakhaya.
1
Ngemuva kweemveke ezihlanu zokuqinteliswa kwamakhambo, abodade laba abakathabi.
-
“Heyi ngisebenza ngokuzikhandla naziza ekufundeni ngokwethungelelwano. Lesi kusitjhijilo samambala!” kububula uBandi.
2
UBusi naye uyavuma uthi, “Sengihlulukele ukuya esikolweni.”
-
“Njenganje, isikolo sekuma-WhatsApp wetlasi wokucoca ngeenqhema, ama-apps weenkundla zezefundo kanye ne-TV yezefundo,” kutjho uBandi.
3
Uragela phambili uthi, “Njenganje isikolo sesifuna siziphathe kuhle khulu begodu sizimisele khulu.”
-
UBusi uthi, “Okhunye godu kukobana kufanele sihlale sinedatha nethungelelwano ngaso soke isikhathi.”
4
“Imindeni eminengi angeze yakghona ukuthenga idatha. Idosa emhlweni,” kutjho uBandi.
-
UBusi ucabangela abangani bakhe, uBuhle noLuka.
5
UBusi uthi, “Abanye abantwana bafuna nokudla kwesikolweni.”
-
UBusi utshwenyekile, “Ingabe ababelethi babo bazokukghona ukuthenga ukudla okwaneleko?”
6
UBandi uthi, “Thina sinetjhudu. Ukuqinteliswa kwamakhambo lokhu akhange kusithinte khulu naziza ngeemalini ekhaya.”
-
“Mina yo! Sengibahlulukele khulu abangani bami,” kububula uBusi.
7
Ungezelela uthi, “Iye khona ngiyakghona ukukhuluma nabo ngomtato, kodwana akufani. Ngithanda ukudlala nabo.”
8
UBandi uleka ngokuthi, “Ngihlulukele amasango wesikolo, abotitjhere, ukufunda izinto ezitja nokuba nabangani bami.”
-
UMma ungena ngekamerweni labo.
9
“Bantazana bami, ngiqeda ukuzwa emrhatjhweni kuthiwa iinkolo ziyavulwa ngeveke ezako,” kumomotheka uMma.
-
UBusisiwe noBandile bathaba komhlolo nabezwa lokho!
10

——Imibuzo


  1. Hlathulula okutjhiwo magama la: ‘ukugandeleleka kezemmali’, ‘ukufunda ngethungelelwano’, ‘isikimu sokudla eenkolweni’.
  2. Ingabe abodade laba bebakuthabele yini ukuqinteliswa kwamakhambo?Hlathulula lokho okutjhoko.
  3. Qathanisa ukufunda ngokusebenzisa ithungelelwano nokufunda usesikolweni. Ngikuphi okutjhiphileko kilokhu?
  4. Nangabe kuba nokhunye ukuqinteliswa kwamakhambo, ngiziphi izinto ongazenza ngokuhlukileko?
  5. Ingabe kunezinto ozifundileko ngepilo ngesikhathi sokuqinteliswa kwamakhambo? Hlathulula.
  6. Ucabanga bona kubayini isikolo sifuna ukuthembeka nokuzinikela ngesikhathi sokuqinteliswa kwamakhambo.
11

——


Indatjana esencwadini le imayelana nemibiko yomRhatjho i-RX. Umrhatjho i-RX kusitetjhi somrhatjho wethungelelwano, wenzelwe abantwana bewusetjenziswa bantwana.
-
UmRhatjho i-RX usebenza ukusuka esibhedlela i-the Red Cross War Memorial Children’s Hospital e-Cape Town.
-
UmRhatjho i-RX usiza abantwana ukobana bacoce iindatjana ngezinto eziqakathekileko kibo.
-
Visit RX Radio
12
Attribution CC BY
Your attribution should include the following:
Title: Ukuqinteliswa kwamakhambo kweenkolo
Author/s: African Storybook
Translator/s: Sponono Mahlangu
Illustrator/s: Busisiwe Ndlovu
Assurer/s: William Jiyana
Language: isiNdebele

© Zenex Foundation - Saide 2025 (Updated Edition)

CC BY includes the following elements:
 BY   – Credit must be given to the creator