UNja noKati bangabangani abakhulu.Bathatha isinqumo sokuvakashela umngani wabo uTshwele, ngosuku lwakhe lokuzalwa.UTshwele wayehlala kwaBhekithunga. Kwakukude kulesi sigodi. Kwakuzobathatha izinsuku ezimbili ukuthi bafike khona.

UNja noKati babeziphatha ngezindlela ezahlukile.UNja wayethanda ukudla nokulala futhi ethanda ukuganga ngezinye izikhathi.UKati wayenomusa, enobubele futhi ethembekile.Bahlangana emzini kaNja bahlela uhambo lwabo.

“Ngizophatha ukudla kosuku lokuqala,” kusho uNja.“Ngizophatha okosuku lwesibili,” kusho uKati.Babebhala yonke into phansi ukuze bangakhohlwa.

“Kuzobamnandi ukubona umngani wethu uTshwele maduzane.Sekuyisikhathi eside sagcina ukumbona,” kusho uNja ephelekezela uKati esebuyela ekhaya lakhe.“Ngiyabonga,” kusho uKati.

Ngosuku olulandelayo bahlangana ekuseni kakhulu ukuqala uhambo lwabo.Endleleni babehamba becula, bedansa bejabulile.Emva kwesikhathi eside behamba baphumula ngaphansi kwesihlahla esikhulu. “Sengilambile, masidle,” kusho uKati.

UNja washesha waphaka ukudla wakuphakela ezitsheni ezimbili. Ukudla kwakugcwele amafutha namanzi.“Ngabe yikho ukudla okuphathele thina sobabili lokhu?”UNja wathukuthela ngoba umngani wakhe wayengaphathanga ukudla ababevumelene ngakho. Wayengakudli ukudla okudliwa uNja.

“Ulindeni?” kubuza uNja. Wayenethemba lokuthi uKati uzoyeka ukukhononda, adle.Ngokucasuka, uKati wabuza, ″Kungani uphethe ukudla okuthandwa nguwe kuphela?”UNja wayedla ephanga kangangokuthi isitsha saze saphunyuka. Konke ukudla kwakhe kwachithekela phansi.

“Ungakhathazeki mngani wami,” kusho uKati.UKati wakhipha amasamishi akhe amahle. Wase eqala ukudla.UNja wabuka uKati ngamehlo ancengayo.Lapho uKati eqeda ukudla, waqoqa wase ethi kuNja, “Singaqhubeka nohambo lwethu?”

Abazange bakhulumisane indlela yonke. Isisu sikaNja sasikhala yindlala.Ngalobo busuku, uKati waziphakela yedwa. Walala ejabulile ngokuthi wayephethe ukudla okwanele.UNja walala elambile.

Ekuseni, uKati waziphakela kancane isidlo sasekuseni. UNja wayelokhu ebuka ukudla kukaKati.UKati wanikeza uNja ukudla.UNja wathi, “Ngicela ungixolele, ngibe nomhobholo.”UKati waphendula wathi, “Masidle sobabili.”Bahlala phansi badla.

Bathi sebeqhubeka nohambo lwabo, base bengabangani futhi.Bafika emzini kaTshwele ngesikhathi.“Belunjani uhambo lwenu bangani bami?” kubuza uTshwele.UKati noNja bamoyizelelana bathi, “Beluluhle kakhulu.”

Umcimbi wosuku lokuzalwa lukaTshwele waba mnandi kakhulu.Badla, bacula futhi badansa.