Adope paran arasi ipooo ka edokolet ipapero.

Anen obu ipoo olimok opapero ke, alotoailate amowutu ibore yeni inyamari. Obu edokolet lo ocam konye mam ajeni ebe emodikitai ngesi.

Opotu oloto amusiri na ekirididi osodete alomakin aiyam.

Konye acoo ipoo yen obu olot aikwenyar ikulepeke amusiri aikamun edokolet lo ka aitodikin ngesi ebe bangana ngesi noi.

Ogeyari ipoo yen aresianar, ikokolak! Ikokolak! Ikokolak! Adawun ekus kirididi kere! Anen odakuni ekesa je adai okeri.

Atipet opotu ikulepek amusiri okerutu adumun edokolet etami akeryari konye ajasi kede ekori lo awojan lo esipikorit ngesi akerit.

Olomakinete ikulepek aidap edokolet obalasi, obwowu! Obwowu! Iwanyu iso jo, irai jo edokolet.

Oponi ikamunai ngesi osodete abukokin agweret.

Mam ngesi apedori aililing obu olimo, awupa engo kede opaperoka ipoo. Arai ngesi ayawuni engo nee.

Konye opotu ikulepek ojepasi eke kori. Osodete alimokin ngesi ebe olot olimok opapero kon ebe ajepar eka kori!

Osodete alosit oreke ipoo aipo ekori k'edokolet aiyam. Obu ipoo onyarawu edokolet lo abunere aiyam n'aparan.

Akawulo n'adawun eiyam, obu ipoo ingit edokolet ibore yen anyam ngesi. Amamut aijen obu otemar ebe mam ngesi ejeni.

Oponi ikwenyakinai ngesi ebe inyam jo ekoni kori. Iposiari edokolet akerit. Anyowun angin opotu ityang lu okolokinos!