Ndráa drìò, àngʉ̀ àzɨ́ 'bánɨ́ omvelé Íníá 'ɨ rɨ̀ mà aléá 'dálé, ágúpɨ́ àzɨ́nɨ cɨ́ rún ɨÒndògá 'ɨ díká èrɨ mà òkʉnɨ mà rú Àyákáká 'ɨ. YƗ mà anzɨ yɨ ndráa ázɨ́á. Anzɨ 'dɨ̀yɨ ndráa drɨ́á ezóanzɨ yɨ.

Àyákáká kà muzʉ́ 'ɨ́ mà mvá ázírìzʉ́rɨ̀ esú 'bo, Òndògá lɨ èrɨ mà bíléndú kɨ́nɨ̀, "'Ɨ́kà zámvá àzɨ́nɨ osi díká, ma mɨ 'di tè." Te'ɨ́kà mánɨ́ ágúpíámvá osi, mà nga mɨ́nɨ́ òmù àzɨ́ àmbó 'dɨ́nɨ nɨ 'bàa 'ɨ́.

Sâ mvá nɨ́ osizʉ́ rɨ̀ kà mú ecá 'bo, Àyákáká mu òkʉ́ 'bá osiípɨ rɨ̀ vʉ́. Mvá 'dɨ̀ nɨ nga ovʉ zámvánɨ yàkànɨ̀ ágúpíámvánɨ?

Mvá osi ágúpíámvá àzɨ́nɨ zámvá-èjʉ yɨ! 'Da ágúpíámvárʉ́ rɨ̀ màrú Àyìkònɨ́ 'ɨ, 'da zámvárʉ́rɨ̀ márú Lèkʉrʉ́ 'ɨ. Nè Àyɨ̀kònɨ́ nɨ 'dɨ́nɨ, àyɨ̀kò fu èrɨ sàârʉ́. Te nè Lèkʉrʉ́ nɨ 'dɨ́nɨ, càndɨ́ fu èrɨ sâárʉ́. Te kírí egá kɨ́nɨ̀ e'yó àzɨ àlʉ ɨ́nɨ́ ecó 'yé rá nɨ cɨ́.

Àyákáká kʉ Lèkʉrʉ́ nɨ òkʉ́ 'báosiípɨ rɨ̀ vʉ́ 'dǎ. 'Du Àyɨ̀kònɨ́ nɨ jí àkúá ɨ́mà ágúpɨ́ vʉ́ 'dálé 'ɨ́.

E'da mvá ágúpɨ́árʉ́rɨ̀ Òndògánɨ́ àyɨ̀kòsɨ̀ àfʉ́ pie. Àyɨ̀kòfu Òndògá nɨ káyɨ̀ ànɨ́ omve súrú ndulu rɨ̀ emʉ́zʉ́ òmù ɨ́mà mvánɨ́ àndrʉ̀ osizʉ́ águpíámvánɨrɨ̀ nyazʉ́.

Àyɨ̀kònɨ́ zò kàrilè rʉ́ ruá be àlá. Lekuru zò vɨ́nɨ zámvá rʉ́ àlá ndrɨ̀zà.

Ó'dú àlʉ, èrɨ nɨ́ 'ɨ́mà átíi mà tí yɨ océrɨ́á, Àyɨ̀kònɨ́ nè zámvá àzɨ́nɨ ndrɨ̀zà rʉ́ nɨ. "Zámvá mánɨ́ lèlé 'dulérɨ̀ belénɨ 'dɨ̀ 'ɨ́." Rɨ o'yó a'dúle a'dúle.

Te èrɨ nɨ́ zámvá ndê zízʉ́ 'ɨ 'dʉ́zʉ́ rɨ̀sɨ̌, zámvá ndê e'dó ongó àzɨ́nɨ ngó.

E'yó 'dɨ̀rɨ 'ye 'ɨ́ 'dɨ̀lé páalé kárákàrà. Àyɨ̀kònɨ́ nɨ̀ dɨ́ 'ɨ 'ye ngónɨ yàrɨ̀ kʉ̀. Ngà dɨ́ mú 'ɨ́mà ándrɨ́ Àyákáká vʉ́. "Má esú zámvá àzɨ́ ndrɨ̀zàrʉ́ nɨ 'bo," 'yo. "álè té vɨ́nɨ èrɨ 'dʉ́ mâ òkʉ́rʉ́. Te ákà ó'dú dríá sɨ̀ èrɨ zɨ́ ovʉzʉ́ mâ òkʉ́rʉ́, èrɨ mánɨ́ óngó àzɨ́ àlʉ nɨ ngo 'ɨ́."

Àyɨ̀kònɨ́ òsù tʉ̀ èrɨ mà ándríi nɨ́ 'yozʉ́ èrɨ nɨ́ kɨ́nì "e'yó zámvá 'dà nɨ́ ngó ongó mà aléá 'dà e'yó áda nɨ" rɨ̀sɨ̀. "Zámvá 'dà èrɨ́ mí mà amvɨ́i nɨ. 'Bá osi ndráa èmɨ èjʉ́ rʉ́. Mɨ́ átíi lè ndráa ágúpíámvánɨ ovʉnɨ́ zámvá nɨ kʉ. Ànɨ́ ákʉ ndráa dɨ́ mɨ́ amvíi nɨ́ òkʉ́ mvá osiípɨ rɨ̀ vʉ́ 'dálé, má ejí dɨ́ mɨ mɨ́ átíi vɨ́lé àkúá 'dólé a'dʉ́lé."

Àyɨ̀kònɨ́ kà mú e'yó 'dɨ̀ òlʉ̀ú 'ɨ́mà átíi nɨ́ 'boó, átíi nì rá kɨ́nɨ̀ e'yó 'ɨ́nɨ̀ 'yé 'dà ndráa ònzɨ́ áda. Nga Àyákáká nɨ omveé 'ɨ́vʉ́ rá, yɨ́ ìrìtró mú Lèkʉrʉ́ nɨ ejí òkʉ́ mvá osiípɨ rɨ̀ vɨ́lé rɨ̀sɨ̀.

Lèkʉ́rʉ́ kà mú ecá àkúá 'boó, èrɨ mà átíi pɨ órɨ́'bà 'bá 'wàrà rʉ́ súrúá 'dɨ̀yɨ pie lí ndrí àzɨ́nɨ òwɨ̀kɨ́ órɨ́ Lèkʉrʉ́ pɨ ecɨ́zʉ èrɨ mà àyɨ́à anzɨ àzɨ́ ázírì 'dɨ̀yɨ pie.

Élɨ́ àlʉ mà vútiá ópɨ́ àfa é'ɨ́ rʉ́ rɨ̀ mà mvíi nga dɨ́ Lèkʉrʉ́ nɨ jé òkʉ̂ rʉ́ nɨ̀. Ejí málɨ̀ àzɨ́nɨ àyɨ̀kò àkú 'ɨ́mà átíi nɨ́rɨ̀á trétré.