Ndráa drɨ̀ò rɨ̀sɨ̌, ényáti àzɨ́ 'bé ruá nɨ mà alɨ́á ágú àzɨ alʉ 'bá drɨ́á nɨ́ nǐ óká dizà sɨ̀ nɨ ándrâ cɨ́. 'Bá àngù ndê mà alɨ́á 'dɨ̀yɨ rɨ́ andrâ èrɨ́ omvě ayaá 'ɨ́, éfɨ́nɨ kínɨ̀ ágú aya dípɨ óká mà alɨ́á tʉrɨ̀ 'ɨ.

'Bá drɨ́á àngʉ̀ 'dà mà alɨ́á 'dɨ̀yɨ nǐ Ayaá nɨ tʉ̀. 'Bá 'dɨ̀yɨ mʉ ò'bíti àlʉ àlʉ sɨ̀ pàrí èrɨ nɨ́ óká dizʉ́ rɨ̀á lʉ́ ábgárí èrɨ nǐ èrɨ nɨ́ óká dǐrɨá. E'dá kɨ̀lé ecó àfa cɨ́ rɨ̀ edé 'ɨ́ vɨ́lé aya rɨ̀ sɨ̀ rá rɨ̀ lé.

Ópɨ́ àngʉ̀ ndê mà alɨ́á Kalanaa Máriko erɨ e'yó Ayaa mà óká dizà mà drìá rá. Pè àzí 'bá 'ɨ́ vɨ́lé 'dɨyɨ mà ti muzʉ́ Ayaa nɨ omvezʉ́ ejízʉ́ 'ɨ́ vɨ́lé àkúá.

Àyìkò fu Ayaa nɨ erɨzʉ́ kɨ́nɨ̀ ópɨ́ Kalanaa Mariko lè 'ɨ ně rɨ̀sɨ̀ tʉ. Ngà 'yó kɨ́nɨ̀, "Mà nga ovʉ àyɨkòsɨ̀ àzí ngazʉ́ ópɨ́ nɨ."

Ànɨ́ Ayaa mu dí ópɨ́ vɨ́lé àkúá rá. "Ayaa, má erɨ e'yó mɨ̂ drí pámvʉ́ óká dɨzʉ́ ndrɨ̀zá rɨ̀ mà drìá rá," ópí Mariko Kalanaa ngà 'yó. "Álè 'ɨ́ nga mání àzí àzɨ́ wúrá be ndʉ́ nɨ."

"Álè mɨ́ mà edé 'bá áda ecópɨ acípɨ 'ɨ̀ndɨ̌, mɨ́ndre mgbàrɨ̀ òsʉ̌ pɨ 'ɨ̀ndɨ̌, àzɨ́nɨ àrɨ́ mgbà 'bá áda vɨ́lé rɨ̀ nɨ́ èfʉ̀zʉ́ ruá nɨ́á nɨ̀ nɨ." "'Dɨ̀ ecónɨ 'yé kʉ," Ayaa egá. Te 'bá àzɨnɨ ecóní gǎ ópɨ́ nɨ́ èrɨ vɨ́lé àkúá kʉ.

Íní 'dàsɨ̀ ó'dú gà Ayaa nɨ 'be kó sɨ̀. Èrɨ nga mu e'yó èwá kákà 'dɨ̀ 'ye ngónɨ ngónɨ? Òrì ndè èrɨ káyɨ̀ àzɨ́nɨ ásí nɨ òtɨ̀ tʉ̀.

Cotí Ayaa egá e'yó mbàzà Avi'bo òndʉ̌ǎ rʉ́ rɨ̀ mà drìá. Ecóté àzàkoma kǒ rá rɨ̀á nɨ. Te Avi'bo nɨ ngʉ̀á yǎ? Àvì ndrâ lʉ́ àngʉ̀ 'dà mà aléá rɨ̀sɨ̀ yà. 'Bá yɨ nɨ́ 'yó rɨ̀ sɨ̀, mu ndrâ ágbárí èrɨnɨ́ ópɨ́ nɨ́ àyɨ̀kò fèzʉ́ kʉ yé rɨ̀ sɨ̀.

Drùsɨ̀ 'dɨ́nɨ Ayaa mu nɨ́ 'ɨ́nɨ́ óká di rɨá 'dálé kʉyé. Mu kánɨ tǔ uru 'bé drìá 'dálé e'yó egázʉ́. Èrɨnɨ́ murɨá 'dálé nè mbàzà àzɨ́nɨ rɨ̌zàrʉ́ patí mà ètíá.

Mbàzà 'dà dè Avi'bo 'ɨ. Ayaa kà mú èrɨ ně 'bo, kɨ̀nɨ̀, "Má ovʉ àyɨ̀kòsɨ̀ mɨ nè zʉ́. E'yó àzɨ́ àmbôrʉ́ esú ma nɨ̀." Ngà dɨ́ mbàzà Avi'bo nɨ́ e'yó ndê òlʉ̌ drɨ́á. Mbàzà 'dɨ̀ egá e'yó álí rá kɨ̀nɨ̀.

"Ímù 'yó ópɨ́nɨ́ kɨ́nɨ̀ 'ɨ́lè míndre pélì álɨ̀fʉ̀ alʉ dǐká drì'bí émvʉ́ tré tré álɨ̀fʉ̀ àlʉ. 'Bá mà oko vɨ́nɨ yǐ émvʉ́ tré tré álɨ̀fʉ̀ àlʉ ɨ̀ndɨ̀. Yǐ sɨ̀ mɨ̀ nga àrɨ́ edé. Drì'bí sɨ̀ mɨ̀ nga àcɨ́ èdʉ̀ ecózʉ́ àgú aya rʉ́ 'dà edézʉ́ òkpôrʉ́ benɨ̀." "Àwà'dɨ̀fô, àwà'dɨ̀fô!" ayaa ngà dɨ́ nzʉ̌ vɨ́lé 'dálé drìfuzʉ́ Kalanaa Mariko be ópí ndê vɨ́lé àkúá ògògò.

Ayaa kɨ̀nɨ̀, "Kalanaa Mariko, mánɨ́ ecózʉ́ e'yó mɨ́nɨ́ lě rɨ̀ 'yezʉ́, mà nga àfa yɨ lè ìrì. Míndre pêlì sɨ̀ tré tré álɨ̀fʉ̀ àlʉ àzɨ́nɨ drì'bí engázʉ́ 'bá àngʉ̀ 'dà mà aléá 'dɨ̀yɨ mà drìá émvʉ́ tré tré álɨ̀fʉ̀ àlʉ ɨ̀ndɨ̀!" Kalanaa Mariko nga e'yó ndê à'ǐ rá. Pè ágú àzí'bá yɨ mà drìléá rɨ̀ mà ti e'yó ndê ecézʉ́ 'bá wóró àngʉ̀ ndê mà aléá 'dɨ̀yɨ drí.

Àwʉ́ nga engázʉ́ ényáti 'dà mà aléá dríá fù. Anzɨ nyɨ́rɨ́ e'dó owʉ́ 'bá 'wàrà 'dɨ̀yɨ pie ètúzù íní rà yɨ nɨ́ ecózʉ́ míndre òsʉ̀zʉ́ pêlì álɨ̀fʉ̀ àlʉ tré tré benɨ̀. 'Bá olí 'bá àngʉ̀ ndê ma aléá 'dɨ̀yɨ mà àlʉ àlʉ mà drì'bí tékètékè, 'bá o'bé yɨ émvʉ́ 'bá nɨ́ òtǐ ópɨ́ vɨ́lé àkúá 'dɨ̀yɨ mà aléá. Te 'bánɨ́ tró ò'bìzʉ́ ngónɨ rá tɨ́, 'bá àngʉ̀ 'dɨ̀ mà aléá 'dɨ̀yɨ mà drì'bí àzɨ́nɨ míndre canɨ́ émvʉ́ àzɨ́nɨ pêlì kárákàrà 'dàyɨ mà aléá alʉánɨ kʉ.

Mariko Kalanaa nga dɨ́ òku e'yó 'dà kʉ́ rá. Omve Ayaa nɨ 'ɨ́ vɨ́lé àkú ópɨ́ vílérɨ̀á 'dálé. Ayaa mɨ 'bá òndʉ̀á rʉ́ nɨ, 'bá nděpɨ òndʉ̀á sɨ̀ ényáti 'dɨ̀ mà aléá 'dɨ̀á nɨ̀ rɨ̀ 'ɨ. "Mɨ́ ecó mâ àzà kó ovʉzʉ àzí'bá má vɨ́lé 'dɨ̀yɨ mà drìlé drɨ́á rɨ̀ rʉ́ rá yǎ?" ayaa cɨ cɨ̀nyà.

"'Ɨ́ kà ecó fě mbàzàó Avi'bo nɨ́ drì èdàzʉ́ rá rɨ̀á, omvɨ." Ayaa ngà dɨ́ ecá àzí'bá yɨ mà drìlé drɨ́á rɨ̀ rʉ́. Vɨ́vɨ́lé rʉ́, Avi'bo ecá vɨ́nɨ 'bá ópɨ́ Kalanaa Mariko nɨ́ embátá fě pɨ 'dɨ̀yɨ mà àzɨ́ ɨ̀rʉ́ Àbàzà ágú óká dípɨ rɨ̀ nɨ́ esúlérɨ̀.