Páalé àlʉ òkú ázɨ̀ ndrâ cɨ́ rʉá pɨe àmbó ʉ̀rɨ̀ ʉrɨ̀ rú. O'dú àlʉ èrɨ nɨ́ acɨ́irɨ̀á yí Ombɨ́zokʉrʉ́ rɨ̀ mà kálátiá sɨ̌ esú ezóanzɨ na 'dɨ̀yɨ. Nga yɨ̀ zí zitá sɨ̀ kɨ́nɨ̀, "èmɨ èseléá 'dɨ̀á 'bá èrɨ mà ándríi pɨ nɨ́ èrɨ lèzʉ́ èrɨ mà Átíi be rɨ̀ à'dɨ 'ɨ́ yǎ?"

Zámvà àlʉ nɨ nga omvɨɨ́ kɨ́nɨ̀, "Mâ ándrî lè ma ndênɨ̀." Àzɨ́rì kɨ̀nɨ̀ ídrɨ́rɨ̀á, "Ma àtî lè mâ nɨ́ ma ndênɨ̀." Zámvá na zʉ́ rɨ̀ nga òmvɨ̌ kínɨ̀, ''Mâ átî pɨ lě mâ nɨ́ ma mâ ándrî be ìrì tró.

Òkú 'dà nga dɨ́ zámvá èrɨ mà tipíka nɨ́ èrɨ lèzʉ́ ìrì tró rɨ̀ á'ɨ́ muzʉ́ èjá à'dúzʉ́ 'bàzʉ́ 'ima ngʉ́kʉ́á. Zámvá ndě nga 'dé èrɨ́ mà vúti sɨ̀.

Kǎ mú cá rè 'bo zámvá ndě nga òkú 'dɨ̀ zí zitá sɨ̀ kɨ́nɨ̀ "éjá mɨ́ vɨ́lé 'dɨ̀rɨ kpere ngʉ̀á yǎ?" Òkʉ́ àmbú ndê nga òmvɨɨ́ tinɨá kɨ́nɨ̀, "èrɨ patí àwa 'dàyɨ mà àgeíá."

Ká mú cá patí 'dàyɨ mà ètíá 'bǒ, zámvá 'dà nga èrɨ̀ zí dɨ́ká, "éjá mɨ́nɨ́ 'yó rɨ̀ ngólé yǎ?" omvɨ èrɨ kɨ́nɨ̀, "ovʉnɨ́ dǐ rè kʉ."

Yɨ nɨ́ murɨá drìlé esú ágúpí àzɨ́nɨ yɨ mà drìléá. Ágú 'dà zi òkú 'dà kɨ́nɨ̀, "Mɨ́ mà mvá 'dɨ̀ mà rú à'dɨ 'ɨ́ yǎ?" Òkú àmbú 'dɨ̀ omvɨ kɨ́nɨ̀, "Èri mà rú òkpórúá e'yó nzépɨ rɨ̀ ɨ́."

Zámvá 'dɨ̀ e'dó dǐ ongó ngó 'dɨ́nɨlé: "Mâ rú ovʉ nɨ́ òkpórʉ̀á e'yó nzépɨ rɨ̀ 'ɨ kʉ mâ rú Kamunge 'ɨ! Mâyê! Má ándrɨ́ɨ máɨ́ lèlé ɨ̀i Mâyê! âǎ átíi má nɨ́ lèlé rɨ̀ mâyê! Mâ kéreá mánɨ́ ayúlé lésú mvuzʉ́ rɨ̀."

Ágúpí 'dɨ kà mʉ́zú òngó zámvà 'dɨ̀ nɨ́ ngó ri ma éfì érɨ́zʉ́ 'bó ngá dɨ̀ zámvà ndě épá è'yò èrɨ̀ni òvúzʉ́ álèníá 'dɨ̀ ma álěa rɨ̀sɨ̀ rá. Ò'dùkó 'dɨ̀ de í 'dìpɨ́.