Àkú àzɨ́nɨ ndrâ àlʉ patí éfɨ́ be aluzàrʉ́ nɨ nɨ́ ovʉzʉ́ rî drìnɨá cɨ́ 'bá drɨ́á nɨ́ ndrâ muzʉ́ alénɨá patí éfɨ́ ndêrɨ̀ 'bìzʉ́ rɨ̀ 'ɨ. Àkú ndêrɨ̀ mà alɨ́á zámvá àzɨ́nɨ vɨ́nɨ ndrâ ndrɨ̀zàrʉ́ cɨ́. 'Bá drɨ́á rɨ èrɨ mà ndrɨ̀tá tʉ̀ rɨ̀ pɨ epí, sí nɨ mvěpɨ milé nɨ be rɨ̀ pie àzɨ́nɨ èrɨ mà adrɨ́zà ndrɨ̌pɨ ònyɨ̀ dà mà drìlɨ́á rɨ̀ pie ɨ̀ndɨ̀.

Zámvá ndêrɨ̀ kà mú zǒ àmúrúó rʉ̌ 'bǒ, kàrílè àzɨ́nɨ àgùpi 'wàrà 'dɨ̀yɨ e'dó drɨ́á mǔ yɨ vɨ́lé àkúá lèzʉ́ èrɨ̀ jezʉ́. Èrɨ mà tipíka egá kɨ́nɨ̌ 'bá ngápɨ èrɨ jépɨ rɨ̀ nɨ nga ovʉ 'bá rɨ́pɨ àkú 'dà mà drìá 'dǎ ètú zù patí éfɨ́ 'dà nyakókòrʉ́ rɨ̀ 'i.

E'yó 'dà ku súrú 'dà mà alɨ́á 'dǎ wàkàkà. Ágúpí drì ekópɨ emúpɨ òkòrɨ̀ nɨ ndrâ ágú 'bá ámvú 'ya'bá súrú 'dà mà alɨ́á 'dǎ 'dɨ̀yɨ mà drìlé rʉ̌ rɨ̀ 'i. Ndrɨ̀ ndrâ sǎrʉ̌, èrɨ àfa be dríá àzɨ́nɨ èrɨ mvárʉ̌. 'Bá a'ɨ́ èrɨ rá díká 'bá fè èrɨ nɨ patí éfé 'dà nyǎ. Rɨ sâ were cotí 'du patí éfɨ́ nyǎ. 'Ba dro èrɨ rá.

'Dà mà vútiá, ágú 'bá ànyàpá tà mbápɨ 'dɨ̀yɨ mà drìlérʉ̌ rɨ̀ emú nɨ̀. Èrɨ ndrâ mvârʉ́, ndrɨ̀zàrʉ́ àzínɨ àfa be dríá. Èrɨ mà é'yó fɨ zámvá 'dà mà ásíá rá. 'Bá kà mú èrɨ nɨ́ Patí éfɨ́ 'dà fě nyá 'bo, 'du rá nyará. 'Bá pè tinɨ rá.

Ágú emúpɨ 'dà mà vútiá rì ndrâ 'bá àngù mà é'ɨ̂ rʉ́ nɨ. Èrɨ ndrâ 'bá àfʉ̂rʉ́ àzɨ́nɨ ònzɨ̀vʉ̀ rʉ́ nɨ. Zámvá 'dà zi Mʉ́ngʉ̀ ɨ́mà ásíá kɨ́nɨ̀ lè mà nya patí éfɨ́ 'dà rá 'bá mà pè tinɨ ànɨ́. 'Bá kà mú èrɨ nɨ́ patí éfɨ́ 'dà fě nyazàrʉ́ 'bǒ, gà nyakó sɨ̀. Sâ e'dó agǎ, zámvá 'dà e'dó rʉ mǎ èrɨ vʉ́ mà nya patí éfɨ́ ndêrɨ̀ benɨ̀. Sâ kà mú cá mudrí 'bǒ, abírí ndè èrɨ káyì rá, 'du patí éfɨ́ nyǎrá. 'Bá dró vɨ́nɨ èrɨ rá.

'Dà mà vʉ́tɨá, ópɨ́ àngʉ̀ 'dà vɨ́lé rɨ̀ emú nì. Èrɨ ndrâ ònzɨ̀vʉ̀rʉ́, àfʉ́rʉ̌, dèzàrʉ́ àzɨ́nɨ adrɨ́zà be ònzɨ́.'Bá àlʉ nɨ lè nɨ́ ndrâ èrɨ àngʉ́ 'dà mà alɨ́á 'dǎ kʉ. Zámvá 'da a'á ásí 'bàzà be kɨ́nɨ̀ èrɨ̀ nga patí éfɨ́ 'dà nyará àzɨ́nɨ mu rá. 'Bá kà mú èrɨ nɨ́ patí éfɨ́ 'dà fě 'bǒ, gà nyakó sì. A'á ètú zù. Sâ mudrí drɨ̀nɨ ìrìá lérǔ 'dɨ̀á, zi rúkúsà ecózʉ́ muzʉ́ àzàkozʉ́. Èrɨ nɨ́ drì èdàzʉ́ rɨ̀sɨ̀, patí éfɨ́ 'dà mà àjí àrìkàrìrʉ́ rɨ̀ rɨ ngǔ èrɨ mà ruá àzɨ́nɨ èrɨ mà ti ecá dríá ekarǔ! Nya dè patɨ éfɨ́ èngázʉ́ còrónìá 'dálé 'bo. Zámvá 'dà mà hwi 'ye 'bá ní ti nɨ pèzʉ́ rá rìsɨ̀.

O'dú kà mú agaá 'dà mà vʉ́tiá were 'boó, ópɨ́ mvî emú. Zámvá 'dà nè èrɨ ásí 'bàzà be. Se èrɨ kálá mu rʉ mǎ èrɨ vʉ́ kínì mà nya patí éfɨ́ 'dà kʉ. Fè drínɨ́ patí éfɨ́ kàlàfe sɨ̀ were tʉ̀ aga èrɨ 'nɨ́ fě 'bá àzɨ́ 'dɨ̀yɨ drí rɨ̀ rá. Sâ ázíá nɨ mu casɨ̀ 'dɨ̀, esú dè ópɨ́ mvî nya patí éfɨ́ 'bo, díká 'bá pè vɨ́nɨ ti nɨ 'bo. Òcòkò àzɨ́nɨ àwókó zámvá nɨ nyápɨ tʉ̀ rɨ̀ fè wʉ 'i káyì.

Drùsì 'dínɨɨ́, ' 'bá àzɨ ámvú 'yǎ pɨ nɨ emú. Èrɨ înɨ́ ndrâ àlíó nɨ àzɨ́nɨ òvʉ̀rʉ́. Te èrɨ ndrâ mvârʉ́. 'Bá nì ndrâ èrɨ sǎrǔ e'yó nzezà tiá tré rìsɨ̀. Èrɨ nɨ́ emûrɨ̀á, nì rá kɨ́nɨ̀, ì nga àbálá nděrá. Zámvá 'dà fè èrɨnɨ́ patí éf'ɨ́ kárákàrà rʉ́ díká a'ɨ́ èrɨ yɨ nyazú rá muzʉ́ tè. 'Bá kà mú èrɨ drí patí éfɨ́ fě 'bǒ, gà nyakósɨ̀. Zámvá rɨ dí tě ásí súzà be. Sâ ázɨ́á aga, sâ àrò ca. Sâ kà dɨ́ mú cá mudrí 'bǒ, a'i dɨ́ yí mvuzà. Zámvá e'dó Mʉ́ngʉ̀ zí kɨ́nɨ̀ kàté patí éfɨ́ nyará ba, te èrɨnɨ́ ngà kírí Mʉ́ngʉ̀ zírɨá, sâ ínîní àlʉ ca. 'Bá ámvú 'yǎpɨ rɨ̀ nga dɨ́ obétá zámvá 'dà mà tipíka yɨnɨ́ fě 'bá ásí mbazà be ndênɨ̀ rɨ̀ ò'bìzʉ́ rɨ̀ agǎ rá.

Èrɨ mà tipíka ngá dǐ yɨ vɨ́lé zámvá rɨ̀ fě ágúpí òvʉ́ó rǒ rɨ̀ drí. Zámvá 'dà ò'bì màtʉ́ 'bǎ 'bání èrɨ epázʉ́ drìléònzɨ́ 'dà mà alɨ́á rɨ̀ sɨ̀ rá te e'yó àzɨ́ èrɨ mà tipíka yɨnɨ́ ecó 'yé rá nɨ yo. 'Bá ámvú 'yǎpi rɨ̀ nɨ́ èrɨ jirɨá 'i vɨ́lé àkuá, e'dó óngó àzínɨ ndrɨ̀zàrʉ́ nɨ ngǒ drí sazà be. 'Bá kárákàràú emú nzìlá tiá ágúpí 'dɨ̀ pɨ nèzʉ́ èrɨ vɨ́lé òkʉ́rɨ̀ be.

'Bá emúpɨ 'dɨ̀yɨ mà èselɨ́á ìndɨ̀rɨ̀ ndrâ àtɨ'bo ópɨ́ mvî vɨ́lé 'dɨ̀yɨ. Omvé 'bá ámvú 'yǎpɨ rɨ̀ nɨ kálá, díká 'yó èrɨ nɨ kɨ́nɨ̀ yɨ nga èrɨ drí tí pɨ fè séndè pie kà à'i zámvá 'dà kʉ rá rɨ̀á. Sâ ezakókòrú, ágúpí 'dà 'du séndè rá cotí ko drì mú. Kʉ zámvá 'dà pɨ àtɨ'bo ópí mvî vɨ́lé 'dɨyɨ pie a'dúle.

Àtɨ'bo 'dɨ̀yɨ òsǔ zámvá 'dɨ̀ bòngó ndrɨ̀zàrʉ́ 'dìyɨ sɨ̀. Ngà dɨ́ èrɨ jí ópí vɨ́lé àkúá rá cotí agá èrɨ be trʉ́á trʉ́á ópɨ́ mvî vʉ́. Sâ ezakókòrʉ, 'Bá omve èrɨ mà tipíka yɨ àzínɨ 'bá otʉ́ òmù 'bá ìrì 'dìyɨ ecɨzʉ́ àjé alɨ́á.