Aabawo khaalekho, yabawo umusaani mutweela, uwamenyatsaka n'umukyelama weewe nga amukana naabi. Shifukhu shitweela, waakyeendakakho waatsya mu shisaali. Nga ali mu ntsila atsya, waakanana umukhasi, umunyelele, umuleeyi, luundi nga umukhaana umumiliwu naabi. Nga nio alimuboonekho, waamusiima. N'umukhaana naye waafukiilisilawo. Ne shonyene waamuboolela ari, niye alikho libeele litweela lyonyene.

Kila alomela umusaani ari atsye ingo, akhalekho umukyelama weewe libeele, areere amurekho. Aryo nio nga wabeelekho kamabeele kabili, bayilane. Aryo waakhuula tsindimo weelayo ingo, waabukula kumubano, waakwiila umukhasi weewe uyo, waamukhalakho libeele khaangukho.

Waatimaka weelayo mu shisaali isi alekhile umukanwa weewe isi anyoolile. Ne nga mbaawo isi amubonela ta. Kila akukuula lisiina lyeewe ni kamaani keene, ne nga buli aandu aasilile busa. Lwanyuma waawulila likono nga liloma liri, "Shiina kila wikhuunga? Iwe s'umanya uri uli mu shisaali sha Musaambwa kwa libeele litweela?"

Umusaani n'awulila aryo, waatikhula tsindimo weelayo ingo, nga lisasi Ne shonyene ndi waanyoola umukhasi weewe nga nio alifwiile. Kumutaambo kwaamubeela mukali naabi lweesho sheesi akholile, shaakila naye waafwa na khufwa.