Khaalekho khusyalo Lunyo, mwamenyamo umusaani Donga nu 'mukelema weewe Mukhaye. Baaba ni babaaana basesaaba, boosi nga bakhaana.

Mukhaye nahesa sisombo sye kumusaafu. Donga wamurisirisa ari "I we nga wasaaliile umukhaana lundi nga khukhonye. Ne inga wasaaliile umusinde ndikhukholeela kamayiiya kamakali."

Imbuka niyoola iye khusaala, Mukhaye watsa wo'mukangi usalisa. Umwana kane abe umukhana namwe umusinde?

Asaala umusinde nu'mukhaana -Bakhwaana! Watwikha umusinde Mukhwana ne' umukhana Molongo. Buli isi alooleeleela Mukhwana afunatsaka kumwikhoyo. Ne uli alola khu Molongo wawulila kumutambo. Wambaasa, wakhalawo khukhola sindu sitwela.

Mukhaye walekha Mulongo nu'mukangi amuloleelele, niye wayila Mukhwana isi umusetsa weewe.

Nikumwikhoyo kumukali Mukhaye wokesa Mukhwana paapawe. Donga ikhoya lukali nalundi walanga besikuuka boosi khukhwikhoyele khusalikha khwomwana weewe uwesinde.

Mukhwana atsowa wikela umusoleeli umulayi. Mulongo ninaye atsowa wikela umukhana umulayi.

Sifukhu sitwela, inga Mukhwana ali khukhwayiisa tsikhafu tsa paapawe, waboona umukhana umumiliyu pye! Wilomela ari "uyu niye umukhana isi ngana khuyila."

Ne namulomela ari amuyile nga umukelema weewe, Mulongo wimba kumwenya kuno: "Mukhwana wefwe, Mukhwana. Basaala umukhaana, Mukhwana. Bamulekha khu lwanda, Mukhwana. Nebasaala umusinde, Mukhwana. Bareera mungo muno, Mukhwana. Iyeeyi yaakwa, Mukhwana. Ikindi yakwa, Mukhwana."

Sino syakholekhatsaka kimilundi kimikali. Mukhwana samanya syekhukhola ta. Isyaamamo watsya isi maayiwe Mukhaye. Wamuboleela ari."Natuyiile umukhana umumiliyu. "Ingana abe umukhasi wase. Ne buli imbuka isi mureberakho, imba kumwenya mutwela ukwo.

Sisyamwiyangisa, Mukhaye wamuloma ari"syesi umukhana imbakho syangali. Niye umukooko woowo. Mwasalibwa bakhwana. Paapawo akana umusinde akhuba umukhana ta. Nasiryo nalekha umukooko woowo isi umukangi, nakhuleera iwe isi paapawo."

Nga Mukhana waboolele paapawe bibyabawo, asibona nga wakhola buubi. Walanga Mukhaye bombitsana batsa wo'mukangi khurusayo Mulongo.

Inga Molongo woleele ango, paapa ni basakhulu be musifwo isyo, beera imbusi bakhola kimisiiro kyekhutubaasa Mulongo ni bawandaye boosi musaafu.

Kumwiko kukwiraho, Mulongo wakhwaalikha khumusooleeli uwo'muyinga khu syalo isyo. Aaleela buyindifu ni kumwikhoyo kumukali mungo mwabwe.