Nga Kakayi asiili mwaana, maayiwe aamwaalisatsaka khu lusaamba luumiliyu naabi.

Seenge uwa Kakayi niye uwamunabila lusaamba luno khukhwaama mu malaala.

Lusaamba lwabamo kamakoondo kamakali:
kamabesemukho, nalubookha, ni imbuusi.

Yaba lwaawukhanamwo ni tsitsasye tsyeesi maayi wa Kakayi aaba natso mu ntsu.

Siifwo isi Kakayi aamenyatsakamu syaba sisyoomu, nga syaabila pilo naluundi nga syaayitsulamwo
kamabaale.

Syabamo bibiindu bibiiluma biikali nga tsitsukhi, kimibubi ni tsindemu. Ne Kakayi saaba mu bukosii bwe khuulumibwa ni bibiindu bye butsiba ibi ta.

Maayiwe aaloma ari, "Lusaamba lwa Kakayi
lwa buraawa lwamuyeeta khukhwikhiinga bukosi
bwoosi."

Kakayi aaba umukhaana uwe kamakesi. Aafumbula
isebele iye ahambi isi ili.

Naluundi aafumbula isi intsu ya kuukhuwe ili. Aatsyatsakayo khuunywa kamabeele ke ng'amiya ni kuukhuwe.

Lutweela, Kakayi saaba ni khabi iyo ta. Aarura ingo
khuutsya wa kuukhuwe mweene ne se oolayo ta.

Aatibila iyo mu ngiingi. Nashiryo Kakayi waarya naabi.

Kakayi ikhala aasi mwisina mwe kusaala, waaliinda buyeeti. Khaangukho liilo lyaamuhaamba.

Abweene ni abweene, waarakikha khuuroora.
Kamarooro keewe kaaba kaari:

Yaaba waakonele khu lusaamba lweewe tsana lwa buraawa. Kuukhuwe waamubonekhela waamwayilisa. Waamuunamuuna, waamuwa
iseesi iye kamabeele ke ing'amiya. Uri Kakayi nio
atsanuusa kumukhono khukhwakaanila kamabeele,
waatitukha mwiilo winyukha.

Kakayi waabiimbula tsimoni mbolambola. Ne nga
ne aakalama mu ngaaki waabona khanywiinywi
khafwiiti khari, khe kamooya kamabuusi nga khetuungelesele khu lusakya angaaki ewe.

Kakayi nga ni enyukha khu ngaaki, Khanywiinywi
ikho khaapakisa tsindaha tsyakho khaamuraangilila intsila. Kakayi waakhaloondelela.

Kakayi woola akhuundu isi tsintsila tsyaakaananila.
Khanywiinywi khaakwiisa khaamenya khe lusaamba
khakhaafwaana nga lwa Kakayi.

Nga niinama aasi khuubukula khasaamba, Kakayi waabona luukyele isi aamanyilawo ari lwa maayiwe.

Lubaluba ndi waabona isebele isi baatahatsakamo kameetsi.

Be muungo mwa Kakayi beemba kimyeenya, naluundi baakhina naabi khuumwakaanila ingo.

Biira imbusi, boosya inyama baalya kamayiiya ke
khukhwakaanila Kakayi nga na aakobola mulamu.

Kakayi ikhala khu lusaamba lweewe lwa buraawa nga ikhoya naluundi nga ali khuulya inyama intsosye.