Olwali lwa khale lulia, olwe shialo shiali nishili eshiyiakha, efikulu efikhongo fiali nifiafunikha eshialo ngo oburungeti, ne emisala emirambi chiatsomosherera hosi mwikulu.

Mushialo muno, lialiho litiba liolutungu olurambi nilielima, niliawulera khandi nilianyira tsi.

Khulwalo lwe litiba lino, tsialiho tsinzukha tsibiri. Ndala yali niyakhupa amakanya kamalwelwe, ne indi inyerere niyekotiombola.

Ne inyanga ndala lialiho lirunda likali. Ikhupa yatulukha niyikhupa okhula hasi welitiba elo. Amatsi nikakabukhana khulwe eshise. Tsinzukha nitsilola eshialo hekulu, nende efifwanani fiaukhane halala nende efilonje fia amabaa. Amatsi olwa kafunikhao khandi, tsinzukha shitsiebiririra amang'ining'ini katsiali nitsilutsi tawe.

"Shikhunyala okhumenya mwitiba linyifu khandi lierima tititi lino khandi tawe," Nitsiboolanira. "Khutsie hekulu khulole eshialo shiliyo." "Khulamenya khurie khu shialo?"

"Amayoni komwikulu shikalakhutsekha okhubeera mbu khuli hasi tawe. Shikhulamoola tawe. Khulachenda busa."   Kaala tsinzukha tsiakanyulukha. Halala tsiachaka okhwisoka nitsinina hekulu, hekulu, Khubulafu bwaliyo.

Ne olwa tsiola khumatsi hekulu, eshiamakana shiakholekha. Emirwe chie mishila chiatsio, chiatikhamo khabiri-efilenje nende tsinzala. Hasi womurwe, amakhono kamera kabiri nende efikalabo ne tsinzala.

Shi tsiali tsinzukha khandi tawe, halali omusatsa nende omukhasi. Ne olwa balinganakho, nibachamana.

"Khulombakha litala liefu mufikulu," Omukhasi naboola. "Buli itsuli, khulalolanga eliuba nilirula nilikhutundumia emikongo." "Khularuka obunyasi nende emisala," Omusatsa naboola. "Khandi obwitsa nende liyoni nende Isolo."

"Itsa," Omusatsa wa Mbeli naboola. "Endetsa," Omukhasi wa Mbeli nakalusia. Ne halala nibachenda okhuinjira mushialo.