Óre apá te enkâng é Elunyiko, némanya olpáyian ójî Ndong'a ó enkitók enyé najî Namukhaywa. Néata inkéra ílê. Náa intóyie póoki.

Óre enutá Namukhaywa enkéráí enyé e naápishana, néísikông Ndong'a ajokí, "Teníu enkáí títo, náar túá. Káke teníkííki olayíóni, nááítóbíraki ósírúa sápuk!"

Óre peê ebáu enkatá náishó, nélo Namukhaywa enetíi enkáítóyíóní. Ké entíto o aashû ké enkayíóni ená keráí?

Ilmáo, entíto ó enkayíóni. Néjo enkayíóni Mukhwana, néjo entíto Mulongo. Néíng'or Mukhwana, néshipa olêng. Óre peê édôl Mulongo, néísinánuo. Nédol énaa entóki nabô aké éídim ataása.

Néíng'úéíki Namukhaywa enkaitóyioni Mulongo néya Mukhwana áng enetíi olpáyian lénye.

Óre te eng'ídâ kítok néítodôl Ndong'a enkayíóni. Néshipa olêng néípotu iltúng'áná lé elátíá metíshipakinotó e ínóto é enkayíóni enyé.

Nébulu Mukhwana aakú olbarnóti shíáát naléng. Nébulu siî nínye Mulongo aakú esiankíki shíáát naléng.

Óre enkolóng nabô egirá áaing'or inkíshú e ménye, nédol Mukhwana entító shíáát. "Enâ títo áyíéú náyam," néjokí kewán.

Káke óre peê ejokí peê enyorráa méyamá, nérany elê sínkólio: "Mukhwana wefwe, Mukhwana. So yakhupa omunwa, Mukhwana. Nebebula omukhana, Mukhwana. Barulaka khulwanda, Mukhwana. Nebebula omusiani, Mukhwana. Barera mungo muno, Mukhwana. Iyeyi yakwa, Mukhwana. Iyindi yakwa, Mukhwana."

Néas enâ aigíl aigíl. Nélau Mukhwana énáâs.  Nélo enetíi ng'ótonyé Namukhaywa, néjokí,  "Ánóto entíto shíáát náa káyieu náyam. Káke kájo aké áíkílíkuan, nérany osínkólio aigíl aigíl."

Néjo Namukhaywa te enkíputúkuny, "Ore enajóíto inâ titó te osinkólio náa késipa. Enkanáshe inó inâ. Etoíuokí intáí irára ilmáo. Káke enkayíóni eyíéú pápa líno, mmê entíto. Náíng'úaa enkanáshe inó éátâ enkáítóyíóní nááyáu iyíé enetíi papá líno."

Óre peê elikí Mukhwana ményé, néyiolóu ajó étáásá embáe torrónô. Néípotu Namukhaywa néíriamári póoki áapuo enetíi enkáítóyíóní áariku Mulongo.

Óre peê ebáú Mulongo áng, néyiang'akiní enkíné papá lénye ó ilkulíkai payianí. Néítobirí ósírúa oitútum Mulongo ó inkanáshera enyéna.

Óre peê eishúnye olárî, néyami Mulongo oláyíóní lé olkínkí kársîs téína latíá. Néyáki kársísisho ó enchipái kitók olmáréí lenyê.