Ore apa aa enkiti tito Naserian, naa keirragie apa ng'otonye meirurayu tesos. Enkanashe e ng'otonye apa naitobirua ena sos te oo imbenek o oltukai.

Keata ina sos emua pile, empus o enanyori. Kepaasha o kulie sosi naata ng'oto Naserian te aji.

Ore auluo e enkang oo Naserian naa ketoyio, neirowua netii isoito. Naa ketii inkolupani, ilkendin o ilasur. Kake eitu aikata eony Naserian kuna kukuni torrok.

Néjo ng'otonyé, "Ore enâ sôs náa kérrip Naserian arishíé bátisho."

Óre Naserian náa enkéráí ng'ên. Néyiolóu enetíi olchórrô ótaaná lémegut.

Néyiolóu enetíi enkáji é kókó lenyé. Kélo oshî inkatítin kúmok aók kulé é entamés te enkáji é kókó lenyé.

Óre enkolóng nabô négolikí. Néípang ajó áló enkají é kókó lenyé káke eitú ebayá. Etapong'óri te oó ildóínyo. Néureishóyu Naserian.

Néton te entonatá ó orététí aanyú oltung'áni oretú. Néírura néíteru aidetidét.

Injí eikunári enkidetídet: Egíra airrág te esôs énye. Néíng'orita enkítok naáíjo kókó lenyé. Nényimo enkítok néísho enkúkúrí natíi kúle é entamís. Néjo Naserian áítóríoo enkáíná angamú kulé, néputúnye te oó injô.

Nébol Naserian inkonyék enyéna máákútití. Óre peê eing'ór shúmátá, nédol emótonyî pûs te shumatá ninyé natíi olng'ósílá.

Óre peê einyotóto Naserian, nélak emótonyî pûs inaipúko arikoó Naserian.    Néírukurukóre emótonyî.

Nébau Naserian ewúéji neórore inkóítoí. Néítadóyio emótonyî pûs esôs nanyaányukie énê Naserian.

Néjo Naserian ádúmú esôs, nédol irorúát naáíjo ínê ng'ótónyé. Néítokí adól olchórro lémégút laáíjo oloshî ookúnye enkáré.

Néranyakí olmaréí lénye Naserian peê ebayá áng. Néyiang'akí enkíné, népej inkírí eshipakíno enchúkúnotó te esérianí é enkéráí enyê.

Néton Naserian te esôs énye anyá eshipakíno oldung'óti lé enkiring'ó.