Document

Ímbápị Drãpágá Ꞌi

Tanzanian folktale

Jemma Kahn

Ụ́ꞌdụ́ ãlu ágọ́bị́ ãzí rụ la Drãpágá ꞌi. Ĩꞌdi anzị kí imbá, uꞌá jó sụ̃lụ́lụ̃ drị̂ agá ku, wó ife umvelé kálãbãsĩ rĩ ị̃ndụ́ gá.

Ĩndró ãlu, Mũcé rụ́ Pâ ꞌi rĩ, tụ mụlé ife ꞌbã ãka ãzí kí ụ̃gụ̃lé. Aya kálãbãsĩ ꞌbã ife. ꞌDãá ãlu la aꞌdé Drãpágá drị̃ gbãlé sĩ ĩꞌdi ꞌdịjó rá. Anzị kí mụ ĩꞌbã ímbápị ịsụ́lé vụ̃rụ́ drã rá ꞌbo, uꞌá ũcõgõ ãmbógó la sĩ.

Lẽ kí nị̃lé la ãꞌdi ꞌdị Drãpágá ꞌi nĩ yã rĩ. Rụ kí ãlụ́kụ̃ ándrá rĩ. "Ĩꞌdi mi ꞌi kálãbãsĩ aꞌbélépi vụ̃rụ́ ímbápị ãmadrị́ Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó ãlụ́kụ̃ ándrá rĩ jọ, "Ádrĩ tá adru agá ũkpó trũ bõrõ ũdrí sĩ rĩ icó tá áma atrịlé rá yã?"

Mụ kí bõrõ ũdrí ru rĩ rụ́. "Ĩꞌdi mi ꞌi ãlụ́kụ̃ ándrá rĩ atrịlépi, kálábãsĩ aꞌbélépi vụ̃rụ́ ꞌdõlé sĩ ãmadrị́ Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó bõrõ ũdrí ru rĩ jọ, "Ádrĩ tá adru agá ũkpó trũ, údrógó la tá icó áma lũlé rá íngoní ru?"

Ị́jọ́ ꞌdĩ sĩ, mụ kí údrógó rụ́. "Ĩꞌdi mi ꞌi bõrõ ũdrí ru rĩ lũlé, ãlụ́kụ̃ ándrá rĩ atrịlépi, kálábãsĩ aꞌbélépi vụ̃rụ́ ꞌdõlé sĩ ãmadrị́ Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó údrógó jọ, "Ádrĩ tá adru agá ũkpó trũ, búrãŋá la tá icó áma nalé rá yã?"

Ị́jọ́ ꞌdĩ sĩ, ịsụ́ kí búrãŋá ꞌi. "Ĩꞌdi mi ꞌi údrógó nalépi rĩ, bõrõ ũdrí ru rĩ ũlũlé mgbọ, ãlụ́kụ̃ ándrá rĩ atrịlépi, kálábãsĩ aꞌbélépi vụ̃rụ́ ꞌdõlé sĩ ãmadrị́ Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó búrãŋá jọ, "Ádrĩ tá adru agá ũkpó trũ, ícó tá áma umbélé ĩbáká sĩ rá yã?"

Ị́jọ́ ꞌdĩ sĩ, mụ kí ĩbáká rụ́. "Ĩꞌdi mi ꞌi búrãŋá umbélépi cí, ĩꞌdi údrógó bõrõ ũdrí ru rĩ ũlũlépi, bõrõ ãlụ́kụ̃ ándrá rĩ atrịlépi, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Ĩbáká jọ, "Ádrĩ tá adru ũkpó trũ la, ícó tá áma lịlé ị́lị́ŋá sĩ rá yã?"

Ị́jọ́ ꞌdĩ sĩ, mụ kí ị́lị́ŋá ꞌi. "Ĩꞌdi mi ꞌi ĩbáká búrãŋâ údrógó nalépi rĩ umbéjó cí rĩ lịlépi rĩ, údrógó ꞌdĩ bõrõ ũdrí ru rĩ ũlũlépi mgbọ, bõrõ ãlụ́kụ̃ ándrá rĩ atrịlépi, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó ị́lị́ŋá jọ, "Ádrĩ tá adru ũkpó trũ, ála tá áma ivé ãcí sĩ rá yã?"

Ị́jọ́ ꞌdĩ sĩ, mụ kí ãcî ndrụ̃ trũ. "Ĩꞌdi mi ꞌi ị́lị́ŋâ ivélépi rĩ, ị́lị́ŋá ĩbáká lịlépi rĩ, ĩbáká búrãŋá umbélépi cí rĩ, búrãŋá údrógó nalépi rĩ, údrógó bõrõ ũdrí ru rĩ ũlũlépi, bõrõ ãlụ́kụ̃ ándrá rĩ atrịlépi rĩ, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ ímbápị Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó ãcí jọ, "Ádrĩ tá adru ũkpó trũ la, ị̃yị̂ ícó tá áma anụ́lé rá yã?"

Íjó ꞌdĩ sĩ mụ kí ị̃yị́ rụ́. "Ĩꞌdi mi ãcí anụ́lépi rĩ, ãcí ị́lị́ŋâ ivélépi rĩ, ị́lị́ŋá ĩbáká lịlépi rĩ, ĩbáká búrãŋá umbélépi cí rĩ, búrãŋá údrógó nalépi rĩ, údrógó bõrõ ũdrí ru rĩ ũlũlépi, bõrõ ãlụ́kụ̃ ándrá rĩ atrịlépi rĩ, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ ímbápị Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó ị̃yị́ jọ, "Ádrĩ tá adru ũkpó trũ la, ị̃yị̂ ícó tá áma anụ́lé rá yã?"

Ịsụ́ kí mọ́nị̃gọ́ ꞌi. "Ĩꞌdi mi ꞌi ị̃yị́ mvụlépi rĩ, ị̃yị́ ãcî anụ́léị rĩ, ãcí ị́lị́ŋâ ivélépi rĩ, ị́lị́ŋá ĩbáká lịlépi rĩ, ĩbáká búrãŋá umbélépi cí rĩ, búrãŋá údrógó nalépi rĩ, údrógó bõrõ ũdrí ru rĩ ũlũlépi, bõrõ ãlụ́kụ̃ ándrá rĩ atrịlépi rĩ, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ ímbápị Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó mọ́nị̃gọ́ jọ, "Ádrĩ tá adru ũkpó trũ la, ụ́nụ́ icó tá áma tilé rá yã?"

Ịsụ́ kí ụ́nụ́ ꞌi. "Ĩꞌdi mi ụ́nụ́ ꞌi mọ́nị̃gọ́ tilépi rĩ, mọ́nị̃gọ́ ị̃yị́ mvụlépi rĩ, ị̃yị́ ãcî anụ́léị rĩ, ãcí ị́lị́ŋâ ivélépi rĩ, ị́lị́ŋá ĩbáká lịlépi rĩ, ĩbáká búrãŋá umbélépi cí rĩ, búrãŋá údrógó nalépi rĩ, údrógó bõrõ ũdrí ru rĩ ũlũlépi, bõrõ ãlụ́kụ̃ ándrá rĩ atrịlépi rĩ, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ ímbápị Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku." Wó ụ́nụ́ jọ, "Ádrĩ tá adru ũkpó trũ la, mũcé la tá áma na rá yã?"

Ịsụ́ kí dó mũcé ꞌi. "Ĩꞌdi mí ụ́nụ́ nalépi rĩ, ụ́nụ́ mọ́nị̃gọ́ tilépi rĩ, mọ́nị̃gọ́ ị̃yị́ mvụlépi rĩ, ị̃yị́ ãcî anụ́léị rĩ, ãcí ị́lị́ŋâ ivélépi rĩ, ị́lị́ŋá ĩbáká lịlépi rĩ, ĩbáká búrãŋá umbélépi cí rĩ, búrãŋá údrógó nalépi rĩ, údrógó bõrõ ũdrí ru rĩ ũlũlépi, bõrõ ãlụ́kụ̃ ándrá rĩ atrịlépi rĩ, ãlụ́kụ̃ kálábãsĩ aꞌbélépi vụ̃rụ́ ꞌdõlé sĩ ãmadrị́ ímbápị Drãpágá drị̃ gbãjó rĩ ꞌi. Mi tá ị́jọ́ ꞌdĩ idé agá ꞌdĩ ꞌbã áni ku."

Mũcé ụ̃sụ̃táŋá sĩ ísụ́ dó ꞌi rá, ị́tọ́ ãzí ĩꞌdi ꞌbã icólé jọlé rá la yụ. Anzị jọ kí dó, "Ími ãmgbãrĩ aꞌbé kálãbãsĩ vụ̃rụ́ ãmã ímbápị Drãpágá drị̃ gbãjó nĩ. Ími ãmgbãrĩ la drị̃rịma ịsụ́ nĩ!"

You are free to download, copy, translate or adapt this story and use the illustrations as long as you attribute in the following way:

Ímbápị Drãpágá Ꞌi

Author - Tanzanian folktale
Translation - Barnabas Delu
Illustration - Jemma Kahn
Language - Aringati
Level - Read aloud

© African Storybook Initiative 2014
Creative Commons: Attribution 4.0
Source www.africanstorybook.org
Original source http://www.gutenberg.org/ebooks/37472