Nakong yela Akai e sa le mosetsana yo monyane, mmagwe o be a rata go mo robatša legogong le lebotse kudu kudu. Rakgadi wa Akai o le logile ka matlakala a mopalema.

Legogo le be le na le mmala wo mopinki wa go taga kudu, wo mo talalerata, le wo mo talamorogo. Le be le fapana kudu go magogo a mangwe ao Akai a bego a na le ona.

Mobu wa tikologo ya gabo Akai o be o omeletše kudu, e bile go tletše maswika. Gona moo go be go na le digokgo, diphepheng le dinoga tše dintši. Le ge go le bjale, Akai ga se a ka a longwa ke diphedi tše tša go ba le kotsi.

Mmagwe o rile, "Legogo la gago le le kgethegilego ke lona le go šireletšago dikotsing ka moka."

Akai e be e le mosetsana yo bohlale kudu. O ile a utolla mo sediba sa kgauswi se bego se le gona.

Akai o kgonne go tseba le gore legae la koko wa gagwe le kae. O be a fela a eya gona go ipshina ka maswi a kamela le makgolo wa gagwe.

Ka letšatši le lengwe Akai o ile a hloka mahlatse. O ile a tloga gae go ya motseng wa koko wa gagwe eupša a timela gare ga dithaba. Akai o be a tšhogile kudu.

O ile a dula ka fase ga mohlare a emetše go hwetša thušo. A swarwa ke boroko gomme a tlelwa ke toro.

Toro e sepetše ka mokgwa wo. O be a robetše legogong la gagwe le le kgethegilego. A bona mosadi wa go swana le makgolo wa gagwe a mo lebeletše ka hlokomelo. Mokgekolo o be a myemyela ge a mo fa mogopo o tletše maswi a kamela. Ge Akai a otlolla seatla gore a amogele maswi, a phafoga torong ya gagwe.

Akai o ile a bula mahlo ka go nanya. Ge a lebelela godimo a bona nonyana ye nnyane ye tala lerata e dutše lekaleng la mohlare.

Ge Akai a emelela, nonyana ye nnyane ye tala lerata ya phaphatha mafegwana a yona ya mo eta pele. O ile a e šala morago.

Akai o ile a fihla moo tsela e ntšhago maphakga a mabedi a go fapana. Nonyana ye tala lerata e ile ya wiša setsekana sa legogo sa mmala wa go swana le la Akai.

Ge Akai a topa seripana sa legogo, a bona mehlala ya maoto yeo a tsebilego gore ke ya mmagwe. Ka pelapela a bona sediba seo ba kgago meetse gona.

Ba leloko la Akai ba ile ba mo amogela gae ka go opela le go bina. Ba ile ba hlaba pudi, ba beša nama gomme ba keteka go boa ga ngwana wa bona.

Akai o ile a dula legogong la gagwe le le kgethegilego gomme a ipshina ka go ja nama ye kgolo ya go bešwa.