O'du alu, mva azi ndra ci 'ba eri omve Dramani 'i. Eri ma amvi erini ovuzu eribe ojuri 'ba eri omve Draru 'i. Eyi ma ati kamu drazu eyi ma andri be 'bo, asii mvi o'a eyi ma atapuru be. 'Ba ecandi eyi tu eyi ma atapuru vile akua. 'Ba ndra eyi co kalika azonisi, vini, 'ba eyini i'di yiyiru ni fe paale alu o'du alu alia nyaka ru 'i. Asi apa ra.

Esu ojile azi fizu o'azu ania. Ori nde eyi tu a'dusiku eri ndra kini agu 'ba nyapi nya 'dii 'be 'da ma dria ci. Eyi ede kaati okporu ni pari fizu oguna ma alia ri atrizu. Kuu 'bile were were ru iri oli vini diza ni fizu oguna ma alia. Dramani nga 'yo ima amvi ni, "Mima asi oguna ma alia mani muria amani nyaka nda ria. Mima a'di iza ku. Aguu 'ba nyapi 'dii le iza ma nguza tu."

Ondre alu alu si Dramani ni ndra afa eri ni 'di 'dii eji indi – kile otoa le, aria le, kaniku ndirea le dii. Ka sa woro si eca oguna ma tia 'bo, eri ongo ngo: Draru, Draru, Ma andri ma zamva. 'I zi mani oguna mati Oli ma fi ania beni Eri 'bile be iri.

O'azu oguna ma alia etu zu Draruni enza ru. O'du alu, eri ma adri kamu 'bo, Draru fu angu amve 'dii one. Esu yi avizu ania, vini pati tuzu sinia. Eri 'i 'isi vini ayikosi. E'do e'yo ega, "Saa azini si agu 'ba nyaapi 'dii yo. Saa azini si ama atapiru 'yo ndra agu 'ba nyaapi 'dii ci ama asia ori fezu."

O'du 'da ma vutia esu asi okpo aci oduzu 'ima ruati imizu. Te odu aci nde oguna ma alia, kaati be opizaru, candi isuzu ku. "Ani ra aka iza were ni 'ba aci alia, 'da ma e'yoo yo. Iza o'biza nyazu nga ovu muke tu."

Eri ma adri ka mu eca 'bo, asi ongo ngo kile okuri le: "Draru, Draru, Ma andri ma zamva, Inzi mani oguna ma ti, Oli ma fi ania beni Eri 'bile be iri." Nzi kaati ima adri ni fizu. Eri mu iza a'diza nee 'bo, Dramani nga ima amvi zi, "Mi o'ii iza 'di aci koko ngongoni ru?" "Ma o'i eri etuka si amve 'dale," Draru nga omvii mbele. Dramani ni andezu tu risi, asi agata ga ku. Rii vaa eyi ma nyaka nya.

O'du 'da ma vutia, odu aci dika o'bi vini iza dika. Eri mu iza de o'bii 'bo, ari o'diko amve oguna tilea ongo ngo: "Draru, Draru, Ma andri ma zamva, Inzi mani oguna 'di ma ti. Oli ma fi ania be ni. Eri 'bile be iri." Te o'duko 'da a'u ni eri ma adri vilerile ku. Draru nga 'yo: "Ku ku. Mi ovu ni ma adri 'i ku; mi o'duko erivu ri le ku." Ori nde Draru ni ku erini ovuzu oguna ma aliari si.

Saa were vutia, 'ba azi e'do ongo ngo oguna tilea amve, "Inzi mani kaati ma amvi." "Draru, Draru, Ma andri ma zamva, Inzi mani oguna 'di ma tile. Oli ma fi ania beni. Eri 'bile be iri." O'duko 'da tro tro eri ma adri vileri le. Asi oguna matile nzi.

Agupi azi 'bi be gunya gunya ni atri oguna ma ti ci. Ebi Draru ni denga apani ku. Draru esu drileba ofuta andizu aci erini oduu ri ma alia. 'Bani eri raria, nga ofuta ayi geri alia si, 'dole 'dale.

O'du 'da si afa Dramani ni bi ra ri otoro anyufi be tre – to eri jurua ma alia, asi 'gii ima loloa. Eri mu ca oguna ma tia 'bo, esu tile ni mgbo dika eri ma amvi yo te ofuta e'da kini fii oce alia. Obi ofuta nde ma vuti geri si kpere ne aci oduza ali 'dale.

Agupi azi ambu ruati 'bi be ni ri aci tia, jurua ambooni eri ma ageyia ci. Demani mu eri vu, 'ye'i mvu cilo cilo, "Kirikiri, ma ati, iko ma aza. Ma pa azo azo. Ife mani yi." Agupi 'da 'yo, "Ma mini yi fe ra ika 'yo mi eco mavile jurua 'di bii ku."

Ka mu yi eji 'bo, Dramani li baka 'bani jurua ma ti ombezu ri. Eri ma amvi efu jurua ma aliari si. Dramani oja jurua nde ivile anyufi beri si. Adri ki amvi be zii eyi a'du afa ninga 'yeru niyari nezu.

Agupi 'da kamu yi eji 'bo, eri ma mvii dika ezi amu indi. 'Yo ima zii ni, "Afa azi ala ni jurua alia jo alia. Mima mu iji." Zii nzi jurua ma ti were afa ania ri nezu, te anyu du eri ma dri. Za okpo si, "Eri 'ba du du" "Mima mu eri ma aza ko!" 'yo ima mvii ni. Anyu du vini eri ma dri.

"I'duu ma aza'ba le ku", za anji ma dria. Fi jo alia ceni. Asi jotile opii ci. 'da ma vutia nzi jurua ma ti. Anyufi omba be 'dii efu jurua ma aliari si, e'do eri oduu drifaa, omvu alia, milea. Mile koko, e'do omvu jo alia, dika 'I o'be azo anyufinii eri oduzuri ma e'yo si.

Fu nzu ongule si. A'de yi alia julu ru. Eri ma drifa ari oritreku ma alia eco ni anze ku. Oja'i pati kutu 'bani driga teri le – anyufi ni muke fizu otoro ru. Saa azo ma vutia, Dramani pi Draru be ri anyu aluza mbe otoro 'da ma alia.