Ndra drio risi, enyati azi 'be rua ni ma alea agu azi alu 'ba dria ni nile oka diza si ni ci. 'Ba angu nde ma alea 'diyi ndra agu nderi omve Ayaa i, efini kini agu aya yi dipi oka ma alea tu ri i.

'Ba dria angu 'da ma alea 'diyi nii Ayaa ni tu. 'Ba 'diyi oku o'biti alu alu si mu pari Ayaa ni oka dizu ria abgari lu eri nii erini oka di ria. Yi yi tii laini si ezu lezu nezu Ayaa ni ima azi 'da nga okpo ngoni ngosi yari.

Opi angu nde vile Kalanaa Mariko eri e'yo Ayaa ma oka diza ma dria indi. Pe karile anzi azi nga pi i dri 'diyi ma ti muzu Ayaa ni omvezu ijizu i vile akua.

Ayiko fu Ayaa ni erini erizu kini opi Kalanaa Mariko le i nee risi saaru. Nga 'yo kini, "Ma nga a'a ayiko si azi ngazu opi ni."

'Di nga de Ayaa ma pale oko fizu opi vile akua ri i. Avu vaa inzitaa ecezu opi nde ni. Opi Kalanaa Mariko nga 'yo erini kini, "Ayaa, ma eri e'yo mi dri pamvu ndriza oka dizasi ri ra." Ayiko fu Ayaa ni opi ma e'yo nzeza 'disi saaru. Ci cinyaa azini fe opi ni awa'difoo e'yo ndesi.

"Ale mi ma ede aya mivu 'daa nisi 'ba ada ecopi aci pi indi, mi ndre mbgari osuu pi indi azini ari mbga 'ba ada driri ni efuzu rua nia indi 'dile ni." Ayaa eca di abaza ru. De 'dini ria 'ba azi econi opi ni 'yo yo, agasi 'dini ku. Ayaa ega coti e'yo baba azi ndra 'bani omvele Avi'bo ru ri ma dria. "Ayaa nga di e'yo 'di omvi candi be kini, "Ma nga azi 'di 'ye ra opi Kalanaa.

Ini 'dasi o'du ga Ayaa ni 'be kosi. Ega e'yo ini rra. Ori nde eri kayi.

Baba 'di avi ndra lu angu 'di ma alea risi mu, opi ni eri omvezu ivile akua 'bo ri ma vutia.

Drusi 'dini Ayaa mu ni ini oka di ria 'dale kuye. Mu kani tu uru 'be dria 'dale e'yo egazu. Erini muria 'dale ne baba azini ri pati ma etia. Baba 'da de Avi'bo i.

Ayaa ni baba ma dri ziria zi di vini eri matia kini, "Baba Avi'bo, mi 'dia adu 'ye!" Baba Avi'bo nga omvi candi candi ru kini, "Opi 'yo mani ma ma da ma angu 'da ma alea risi te."

Coti, Avi'bo nga 'yo kini, "Ayaa, e'yo azi ega mani 'bo." "Igo angu 'da ma alea 'dale vile, ra imu 'yo opini kini mini ecozu 'ba ada edezu aya sira, eri nga mindre lee emvu tre tre alifu alu 'bani ecozu ojazu ari ru dika vini dribi emvu tre tre alifu alu engazu 'ba angu ndea 'diyi ma dria ecozu aci edezu 'bani ani agu mani nga edele ri 'bazu okpo ru beni!" "Awa'difoo Avi'bo!" Ayaa nga di nzu vile 'dale drifu zu Kalanaa Mariko be opi nde vile akua ogogo.

"Kalanaa Mariko," mani ecozu, "'ba ada edezu ayasi, eri le ma ma esu mindre emvusi tre tre alifu alu ojaza ru ari ru azini dribi engazu 'ba angu 'di ma alea 'diyi ma dria emvu tre tre alifu alu aci edezu agu nderi 'bazu okpo ru!" Kalanaa Mariko nga e'yo nde a'i ra. Pe agu i vile aziba yi ma drilea ri ma ti e'yo nde ecezu 'ba woro angu nde alea 'diyi ni.

Mi di lu awu eri engazu pari dria ma alea. Anzi nyiri rii owu 'ba 'wara 'diyi pie dria etusi azini inisi yini ecozu mindre osuzu emvu alifu alu tre beni. 'Ba li 'ba angu nde ma alea 'diyi ma alu alu ma dribi teketeke, 'ba o'ba yi emvu 'bani otii opi vile akua 'diyi ma alea. Te 'bani tro o'bizu ngoni ra ti, 'ba angu 'di ma alea 'diyi ma dribi azini mindre cani emvu karakara 'dayi ma alea aluani ku.

Opi Kalanaa Mariko asi di e'yo 'da ku ra. Omve Ayaa ni vile ivu opi ma akua 'dale. Opi bi Ayaa ma dri zi, de 'ba eri vile azia 'diyi de nesi azini dri sa si, yo erini kini. Ayaa, mi de 'ba onduaru ni i ada ada. Mi e'da mani kini mi mima omi ayu ondoa si kilili. Ale mini awa'difoo fee mini ovuzu 'ba ondoaru ndeni ma vile angua 'diyi ma azi ru risi.

'Ba 'ba di Ayaa ni azi'ba yi ma drile ambo ndeniri ru. Ayaa nga di baba Avi'bo ni eji angu nde ma alea vile. Vivile ru Avi'bo eca vini 'ba opi Kalanaa Mariko ni embataa fepi ri ru.