Aabawo khaalekho, umusaani mutweela, uwaba ni buyiindifu buukali naabi – liiswa liikali liilayi naabi, ni tsikhaafu, kamakheese ni tsimbusi. Ne buli isi eloosela khuusaakhuliwa, ni kumutaambo nakwo isi kweloosela khuumuminya, khulwekhuuba aabakho ni shishiindu sheesi ataamba. Aataamba umukyelama.

Shifukhu shitweela, aaba weemikhile mwisina mwe kusaala. Aryo waafuna shishambaaso: Ari siinga alekha khufuna umukhasi ta, umweene aakha ekholeleyo mtweela?

Aryo waananikhilawo khubeetsa umukhasi umumiliwu naabi khukhwaama mu kusakya kwe kuusaala. Nga n'amala khuubeetsa shifwaananyi sh'omukhasi, wahaamba khu moni ts'omukhasi tsana, natso tsabiimbukha. Aryo waasihelelakho kumuuya, nasyo syekela umukhasi umulamu.

Mu n'gali niye aaba umukhasi umumiliwu naabi khufuurisa baamiliwu boosi beesi aabonatsakakho. Kila atsya aasi khumeesikamo keewe, waaloomba umukhasi uyo khuuba umukyelama weewe.

Aryo waamuwa shitweeya shishimelamela, matoongo ni kumunaala kwe khu murwe, bibyookesanisa nga n'ali umukhasi umukhwaalikhe. Aryo waamwombekhela intsu, waakimaala ni liiloba, waakibiimbakho ni buunyaasi, bibyabaatsaka mwisina mwe kusaala kweesi aamubeetsamo. Waalomela umukyelama uyo ari, "Ise ikhuloomba shishiindu shitweela shonyene. Ukhaboolatsakilakho umuundu yeesi eena isi iwe waama ta."

Ne siyabirawo imbuka ta, basooleli khukhwaama mu shisiintsa shisheesanwa, baananikha khuukanikhanamwo bonyene bari, "Umusakhulu ng'oyo afuna aryeena umukhasi umumiliwu umushikhaana oyo?" Baryo baakhalawo khuumwiiba bamuyile iwaabwe.

Umusakhulu waawotokha kumwoyo. Aryo wewulila nga s'anyala khuumenya yenyene akhali umukyelama weewe ta. Ni abweene awo niwo isi aambaasila ari, "Manya siinga imbakho ni shishiindu shoosi sh'omukhasi uyo, kane indekhe khukhwiiwuumba ta. Kila arumana kamawuusi keewe khuumuweentsa, kamwiimbilekho khakheenya khamuwooyewooye nio kanyalise khuumurusakho syoosi khu biindu bye khu mubili kweewe."

Kamawuusi nga kaliimunyoolile, kaamwiimbila kumweenya kwe binywiinywi kari: Umukhasi we mu Kusaala, umukhasi we mu Kusaala. Iwe umumiliwu khuufuura bakhasi babaandi babaramile boosi. Umuseetsa woowo waakhurumaane ifwe khwiitse khumwiisileyo shitweeya shoowo!

Aryo umukhasi uyo waabiwa shitweeya, karyo kaapamburukha kaabira khu lukiingi, kaabira khu luutsi lwe kameetsi, kaakobola isi umuseetsa weewe. Aryo kila awaamba shitweeya waashira mu moni mweewe, mu mbuka ifwiiti iyo wewulilakho buulayikho.

Ne umusaani s'akama khukhwambaasa khu mukhasi uyo. Kila ndi luundi arumana kamawuusi keewe khuutsya kamwiimbile kari: Umukhasi we mu Kusaala, umukhasi we mu kusala. Iwe umumiliwu khuufuura bakhasi babaandi babaramile boosi. Umuseetsa woowo waakhurumaane khumukoboseleyo kumunaala kwoowo kwe khu murwe! Luundi kaapamburukha keelayo ni kumunaala kwe khu murwe nga nikho khaabonelo kh'omukhasi umukhwaalikhe.

Aryo wahaamba kumunaala kwe khu murwe, waakhupa shikhoowe lw'omukyelama weewe, uuli aleeyi busa iyo mu baandu babaandi. Imbuka yaabirawo ifwiiti iri, waalaanga kamawusi keewe luundi. Waakalomela ari, Nimwiileyo, mumwiimbile muri, Umukhasi we mu Kusaala, umukhasi we mu kusala. Iwe umumiliwu khufuura bakhasi babaandi boosi. Umuseetsa woowo waakhurumaane khumukoboseleyo buulamu bwoowo!

Kamawuusi kaatsya luundi kumuluundi kwe khataru. Kaatsya kaamukwa khu mabeka. Nga kamawuusi keemba, buli litweela nga litomolamwo imoni. Lubaluba wekyela shifwaananyi shibeetse. Biikyele ni kamakhono byaakhalikhaka. Kumurwe nakwo kwaakwa aasi. Lwanyuma shitsupu shoosi she khupa aasi.

Mu mbola busa, umuseetsa weewe waapiringisa shitsupu she kuusaala kweewe, waashiyila mu luutsi. Aryo waashimisa khu milandila kyakwo mu meetsi. Kuryo kwaasisinakho luundi kamasaafu khu lwe nyaanga ni liiloba.

Nga imbewo yaawuutsile, kamasaafu kewulila buulayi naabi. Nga isaambo isi umukhasi ewulilamwo nga ali khukhwiiwuuma umuseetsa weewe.