Waaliwo ekyalo okwazimbibwa obusiisira naye nga abantu baakwo si basanyufu n'akamu. Abantu b'oku kyalo ekyo mu kusooka baali basanyufu naye ate ebisolo by'omu nsiko byatandika okubamalako emirembe. Ensolo zino zaalya ebimera byabwe byonna era oluusi n'oluusi ensolo ezo zaatwalanga abaana abaatambulanga ne bava ku bazadde baabwe. Ekyalo ekyo kyaggwaako emirembe era abantu ne bakyawa okukibeerako. Bwe batyo baatandika okulowooza ku gye bayinza okulaga batandike obulamu obuggya.

Amaka agamu gaazuula eky'okukola. Baalaba nti mu kifo ky'okulwanagana n'ensolo ez'omu nsiko ezaali zeetala buli wamu, baasalawo bagende banoonyenga emmere eyo waggulu mu nsozi. Emmere yabanguyira okufuna mu nsozi eyo. Mu njaziyazi eyo waggulu mwamerangamu ensikosiko. Waaliwo n'emiti egyameranga mi bikko by'ensozi. Mu njaziyazi mwalimu obumyu bwe baateganga wamu n'ebinyonyi bye baakubanga n'amayinja ge baalondanga awo okumpi n'empuku.  .

Amaka amalala gaalaba engeri abo abaasooka okugenda ku lusozi nga bwe bali obulungi. Baalaba abaana ba bali nga balabika bulungi ddala era nga n'abazadde baabwe bakkakkamu. Omwami omu kye yava agamba nti, "Mu nsozi eyo eriyo obulamu obulungi." Ko omulala nti, "Nammwe mujje tubeere eno." Bwe batyo abantu abalala nabo baalekawo amaka gaabwe ne boolekera ensozi. Buli maka gaafuna empuku omwokubeera era bwe batyo ne babeera mu mpuku omwo bulungi nga tebaliiko kabi konna. Amangu ddala buli omu yatandika okugamba nti singa baali balabuse mangu ne bagenda ku lusozi nga bukyali ensolo ne zirema okulya ebirime byabwe n'okutwalanga abaana baabwe.

Abaana bwe baakula eyo mu nsozi gye baali, baatandika okumanyiira embeera y'ebifo bwe bityo. Baayanguwa mangu okuyiga okuwalampa enjazi era ekyewuunyisa kiri nti n'abaana abato nabo baatandika okuwalampa enjazi ez'engeri zonna ku mbiro ezenkana n'ez'obumyu. Era baayiga bulungi okuwalampa emiti nga bagendayo okunoonya ebibala. Baasobolanga bulungi n'okwewuubira mu masanso g'emiti nga babulako katono okwenkana n'enkima. Abantu abaayitanga okumpi n'ensozi ne balaba abantu bano abaabeeranga mu nsozi baabatunuuliranga ne beebuuza oba nga baali nsolo ez'omu nsiko. Wabula ate bwe baabalabanga mu maaso ne balaba n'engoye ze baayambalanga, baakitegeera nti abo baali bantu abaafula obufuuzi ensozi amaka gaabwe.

Embeera yatandika okukyuka mpola mpola. Abantu baakikenga nti abaana baabwe baakendeeza ku bigambo bye baali boogera era ne balaba nti mu kifo ky'abaana bano okwogera ne bannaabwe mu lulimi abantu lwe boogera, bo baatandika ate kuwuuna buwuunyi. Bo abantu abakulu baatandika okulaba nti ennyindo z'baana zitandise okugenja ate era n'okumera omwoya ku mubiri. Buli lwe baatunulaganangako nga balaba nti baali bafuusefuuse mu maaso n'okusinga nga bwe baali ate era nga n'amannyo gaabwe geeyongedde okuwanvuwa. Ebbanga teryalwa ne batandika okutambuza emikono n'amagulu era bwe batyo okutambuza amagulu ne bagenda nga bakuvaako. Mu kiseera kino we baafuukira ekitonde ekiggya. Ekitonde kino ekyali tekirabwangako mu kitundu ekyo, kye kitonde abantu kati kye bayita ekigaya.  .

Ebbanga lyayita ng'ebigaya bino bisanyufu ddala. Ebigaya byalekayo okuyigganga obumyu obwabeeranga mu njazi ne bitandika okulya ebimera. Ebbanga bwe lyeyongera ne byerabira n'okwogera era tewali n'omu ku byo kyaddamu kukola ddoboozi lyonna okuggyako okuboggola oba okuwuuna. Engoye zaabwe baazisuula eri era enkuyege tezaalwa ne zizeeriira. Mu kiseera kino, amagulu gaabyo n'emikono byonna byali bijjudde omwoya omuddugavu ennyo. Wabula byali bijjukira bulungi nti byali bantu. Ekyo nno ate ne kibiviirako okubeera nga byeraliikirira. Buli lwe byatunulaganangako mu maaso, byalabanga nti ennyindo zaabyo zaalinga zeeyongedde obunene okusinga bwe zaali. Kino kyabireeteranga okwesooza. Buli kigaya kyasekereranga kinnaakyo nga buli kimu kisonga ku nnyindo y'ekirala okulaga nga bw'eri ennene ate oluvannyuma ne bitulika ne biseka. Ekigaya ekyabanga kisekererwa kyanyiiganga. Bwe kyanyiiganga nga kiyinza okubuuka mu bbanga mu busungu ate ng'eno nakyo bwe kisekerera ennyindo y'ekirala nga bw'eri ennene.

Ekyavaamu, okujerega kwasukka ne kiba nti ebigaya bino byali tebikyayinza kubeera wamu. Buli maka gaayawukana ku gannaago naye okwesekerera kwo tekwakoma olw'ennyindo zaabyo ennene naye ng'ekyewuunyisa kiri nti tewali kigaya na kimu kyayagalanga kusekererwa olw'ennyindo yaakyo ennene. Ky'ova olaba nno nti n'okutuusa kati ebigaya bibeera mu bubinja butonotono obutafaananako na bantu na nsolo ndala.