"Whii!" Dede 'yo. "Angu dri tu! Omvu 'di nzi vini tu. Amama rii nga pati 'di ma endria avali." Oni ondi rapi eri ma mileari. Ri pati nde ma ezaki eselea. Sakaru tupa dribe Mario ma rua, eri ma adrii, Tabu, aci pati nde ma ageia si nezu eri ngopi. "Pati 'di uku, Dede 'dini kua?" "Adada, Sakaru, eri oku. Te, ovuni oku, dika ambo kile pati enyati Olivu vileri le ku!" "Olivu? Enyati enyi 'deri'i ya?" Sakaru nga zi. "Kirikiri, inze amani e'yo pati ndeyi ma dria" Tabu 'yo 'i idi ni. "Ka ovu 'dini, mirii vaa erizu," Dede nga 'yo, e'do eyini e'yo nze pati nde 'dii ma dria.

Zamva azi ndra ci 'ba eri omve Tiperu. Eri ndra o'a enyati Olivu alia. O'du alu mu yia ima adri Angucia be. Tiperu ni yi to omvuaria, Angucia ne etoo azi. Nzu vutinia si. Nzu, nzu, nzu – mi ega eco etoo nde bi ra? Econi ku. Etoo ma ongu erini ndeni. Tiperu ma omvu ga ra, otu 'i mvizu akua. One angu. Te ne ni Angucia ni ku. Ni mu kala ngosiari ku. Ni vini ra 'i eco mvi akua 'ima adri koko ku. E'do eri ndaa. Aci, aci, aci ezu. Asizu esu la'i aise dria otoko vilea. Tiperu ni emuri eri ma ageia, 'ba lejo ima tia. Mva 'di le 'ima ovu cucu a'di e'yo si? Pari 'da ma ageia, agupi azi rii vini avali. Agupi 'da pivu e usu, vini aju! Tiperu eri eyima o'duko. "Angucia," 'yo yukule si erini agu 'da ma o'duko eri 'boria. "'Di agu 'ba rapi 'dii. Emu 'di ama tiyi oguu dika enyati eve." Tiperu pi ga Angula be e'yere pari 'da ma aliarisi te, mu akua eyivile enyatia.

Eyi mu ca enyati ageia 'bo, fudri eyima atapuru be. Eri tiyi ji yi mvu. Tiperu omve eri, "Mima apa ma atapuru! Agupi 'ba rapi 'dii emu ama ti ogu dika enyati eve." Culu tre ti ma dria, fe nju enyatia 'dale. Tiperu ne vini 'ima awupi azi nga amvu alia. Omve eri, "Mi apa, awupi, mi apa! Agupiyi emu ama ti ra vini enyati eve!" Aupi 'du aco dika mva o'dukoopi ri, nju enyatia 'dale. Tiperu ne vini 'ima a'bipi. Eri mu geri si akanya erini nyaka o'duupiri be. Omve eri, "Mi apa, ma a'bi, mi apa! Agupiyi emu ama ti ra dika enyati eve!" Eri ma a'bi 'du kalika, dro akanya enyatiale ru.

'Dini, Tiperu pi adri be ca enyatia. Omve 'ba enyatia 'dii woro, "Emi apa, emi apa! Agupiyi emu ama ti ogu dika enyati eve!" Ori nde agu enyatia 'dii tu. E'do apa adra si, uru si, kile ikikia tini acizu driniari siri le. Nii eyi mu ziiru ngolea ku dika a'di 'yea ku. Eyi mu ti 'dii zi ngole? Eyi mu nyaka eyini tra 'dii zi ngole? Eyi eyima ongulupi zii ngole? Ori nde vini Tiperu ni tu. Ega e'yo azi. Ega pari eyi muzu avizu saa azisi Angucia be ri. Pari muke ni. Pari ziza ni.

"Ani pari azi ra!" tre okpo si. "Ani pari Amani woro ovuzu muke ni ra" Te agu enyatia 'dii eri nii eri ku. Eyi otre o'dukoo uru si. Eco agu 'dii fe eri arizu ngoni ngoni ya? Mini egari si Tiperu 'ye a'du ni? 'Du ari, e'do di okpo si. Tuu! Tuu! Tuu! Tulu! Tulu! Tulu! Agu woro tupa. Tiperu tre okpo si, "Ani pari azini amani ecozu ama zizuni ra. Emima bi ma vuti." Bi Angucia ma dri.

"Emi emu, ama nga woro mu pati azinia. Ama nga ovu 'dale muke!" Adri ya 'idri. "Tiperu 'dini ku. 'Da ama pari ziza ni. I'yo ndra 'ba lu 'ba azi ni aluni ku." "Ada", Tiperu 'yo. "Eri ndra ziza ru. Te curu 'do amaki woro candia." Tiperu pi ce agu ma dri Angucia be Mario ambo 'da ma alia. 'Ba azi ni a'du afa e'yo siari ku. "Mi iji ama 'dole a'du e'yo si? Ama econi ama zi 'de ku," agu 'dii 'yo. Tiperu 'yo i ati ni, "Mi emu. Ma 'ye mini e'da ra." Tuki pati ma sia. Nee 'bile azi. Tiperu pi fi ati be pati ambo 'da ma alia. 'Ani hwe. "Te agu 'dii econi woro afi 'bile werea 'di ma alia si ku", ati nga 'yo. "'I te nga" Tiperu 'yo. "Emi ma iji ogara 'bile luzu pati 'di ma rua. 'Ye bani 'dale. Luu 'bile pati ma kalaa. Agu azi 'dii eji nyaka otaku pie. Azi 'dii eji ndriyi, kabiloyi, dika ti be. 'Ba 'dii woro fi 'bile 'bani loori ma alia si Mario ambo 'da ma alia. E'yo osuza ri, pari ca 'ba woroni ra."

Etu 'de, angu eca ini, dika ini uvu cucu vini egbe ru. Agu 'ba reepi 'dii mu enyatia. Angu ni tu. "'Ba enyatia 'dii koo woro o'du 'bo," asi 'yo. Mario ambo 'da ma alia, agu enyatia 'dii ri tee. A'diafani mu 'i'ye ni? Eyi ma rua ambi tu. Abiri vini eyi fu. Eyi vini ori si. Tiperu nga 'yo, "Angu ambi tu. Ama oduki aci." 'Du oni iri, e'do eyima rua nyi. Aci e'do owhe, bi aise, e'do dii. Sawa were vutia, angu di ole ru.

Amve 'dale, agu 'ba rapi 'dii emu enyi, enyi. Eyi ma azi alu tre okpo si, e'da angu pati ambo 'da vusi. Diza efu pati 'da vusi. Mile kapi tu 'dii ene angu engazu pati 'da ma rua, edra diza e'do pati ma tri nyiri 'dii ombe. Acika efu tu 'bu alia. "'Diri adroo ambo ni!" nga tre ori si. Ogua alu ja ti e'do apa. 'Da vutia azini, azini, azini - azini. Agu 'dii apa woro. Agu Olivu enyatia 'dii pa'i woro.

'Da ma vutia Dede ovu cucu. Sakaru e'do Mario ambo 'da ma ruati bi. "Ada ada pati pa agu 'dii woro ni."