Néjo Kokoô, "Kilomé! Eirówuaja naléng. Néíroshi ená mokór. Émátotoni te olóîp lé olchaní áayeng'iyeng'a." Néjut enkímá te enkómom, néton te olóip. Néítashe Selma néíteléíki inkáík enyéna olchoní ópúyíápúí. Négirá olálashe lénye ójî Toivo amán olchaní adól enebâ. Néjo, "káke móruo elé sháni. Kélang kokoô." Néjokí kókoô, "eé késípa káke, mélâng olchaní otíi emurúa najî Ombalantu." Nésai Toivo kókó peê einosáki enkatiní é ílô shaní. Néjokí kókoô, "éntotoni naá dúóó mainósaki intáí." Néíteru ainosú enkatiní.

Netií apá, netií entitó nájî Thamini. Némanya emurúa e Ombalantu. Óre nabô olóng, népuo ó olaláshe ojî Angula, áaoku enkáré. Óre egirá Thamini aipút emotí enyé oó inkulupúók, nédol Angula enkitejó. Némir. Nékuet, nékuet, nékuet, káke íjó pasá kéíbung'a enkitejó? Etalaikíne. Kéten enkítejó te nínye. Neíputá emóti é Thamini, néaku enashúko aló áng. Nétalu Angula káke eitú édôl. Néméyíólo enchótó naipirá. Káke eyíólo ajó mélô áng méríkíto olaláshe lenyé otí. Nélo atalú ninyé. Nélo, nélo, nélo. Nétum taá ninyé adé éírrágítâ te oó ilkujít te óriong olkiú lé orírí. Óre peê enyikakí, néítigîr olálashe te olkímojíno. Káínyoo sá peê eyíéú négira? Óre te enkaló é nínche, néírragita iléwâ óogirá áayeng'iyeng'a. Néata lelô léwâ imbáa ó imootianí ó ireméta. Náa kéning'íto iltólóíshi lenyê. Néjo máíng'aming'amatá, éídipâ áatoning enajóíto. "Iláínyámôk kuló, éétuo áapurroo inkíshú âng, népejóo enkáng âng. Tásiekú máapé! Mákuet áng áalikioo." Néyopiyopári ometábai áng.

Óre peê enyikakí áng, nénang'aré olénkapú lenyé éréútâ enkíténg enyé enkáré. Nébuaakí Thamini ajokí, "olénkapú kúeta! Egíra ilainyamók áaponu áapurroo inkíshú âng, népej enkáng âng." Nérriny olpáyian enkíténg enyé aréú áng. Néduáya Thamini enkanáshe ng'ótónye easishó te enkúrma. Néipot ajó, "kúéta enkanáshe yieyío, kúéta amû egíra ilainyamók áaponu áapurroo inkíshú âng népej enkáng âng." Nédumu entomononí olkémpe ó enkéráí enyé, nékuet aló áng. Néítokí adól kakúyiaâ lenyé éréútâ olámuye. Nébuaakí ajokí, "kakúyiaâ kúeta! Egíra ilainyamók áaponu áapurroo inkíshú âng, népej enkáng âng." Néílepie kákúyiaâ lénye eng'údi aaraá olámuye áng.

Nébaya Thamini ó olaláshe lenyé áng. Néípotu pookí ng'áí. Néjokí, "énkuetú, énkuetú! Egíra ilainyamók áaponu áapurroo inkíshú âng, népej enkáng âng." Néirút iltung'aná. Néaku kékúét aké áapuo ídía áló é enkáng néítokí áashukunye. Nétiu énaa inkalaó naáídashakakí emodíéi é enkíténg. Nélau eneisudóriyíé arashû énáâs. Káji sá eisudórie inkíshú enyê? Káji sá eisudórie enkurmá enyê? Káji sá eisudóriyíé nínche máate? Néírut siî nínye Thamini. Káke etadámua ewúéji oshî népúo áaiguranie o Angula. Ewúéji neserían, néísudóro.

Néjo, "káyíólo ewúéji nikipúo áaisudorie!" Káke eitú éíshô ororéí iltúng'áná énîng enagíra ajokí. Káa sá éás peê einining'í? Káa sá éídim Thamini ataása? Nédumu olwúlul, néosh olêng aitejó, "Bam! Bam! Bam!" Négira iltung'aná. Nébuak Thamini ajó, "káyíólo ewúéji nikipúo áaisudoriyie. Éntusujúaki." Néíbung Angula enkáíná néjokí, "mátorîk iltúng'áná enetíi olcháni láng. Níkipuo póoki áaisudori téíne." Néípirrípir olálashe elúkúnyá néjo, "á-a, olosék lâng ilô. Kítejô apá peê míkílikí likái tung'áni." Néwaliki Thamini ajokí, "eé, káke kítií póoki ewúéji é bátisho." Nérik Angula o Thamini olórere meshómo áaisudori te olcháni. Néméáta oltung'áni otumúse.

Óre peê ebayá iltung'aná ílô shaní, néíkilikúanu áajo, "káínyoo peê itoríkuo iyíóók enê? Imikíindím áaisudori tené." Néjokí Thamini ményé, "óu enê máítóduaa." Néked menyé olchaní. Nétií elusíé. Néim Thamini ó ményé ínâ lúsíé, néjing atúa ílô shaní. Néínepu engúmótó nálálá náa sápuk. Káke iméídim iltung'aná póoki áatijing. Néjo Thamini, "émátaguet ená gúmótó áaitalala peê éisháa iltung'áná pookí. Néíshori entólú. Néíperru engúmótó nálálá te enchotó nábo ó olchaní. Nésotu iltung'aná inkéra ó inkíshú ó imotíook. Néim póoki enadúóó gúmótó, néjing atúa olchaní. Néísháa ilô sháni pookí."

Nédoyio enkólong, nélotu enáímin. Négira enkôp néíropíju. Néíseleejakíno ilainyamók enkáng. Néjo máínining'isho, meáta entóki naníng'o. Néméáta entóki nalíoo. Néjo, "eirúrate póoki ng'ái." Néísudóri iltung'aná te embatá ó olchaní. Néíteru áaning enkijápe, nétir siî esúmâsh. Néureishóyu naléng. Néjo Thamini, "eirópija, máínuá enkímá." Nédumu isoitó aáre. Néítoôsh peê epukú iltiíl lé enkímá. Néíbung iltiíl inkújít, néaku enkímá sápuk.

Néjing ilainyamók enkáng. Óre te enkíti katá nédol enkímá sápuk te embatá ó olchaní. Óre ínâ kímá, néísuaku oláng'át, néng'oru iltiíl. Néílep empúruo. Néureishóyu lelô ainyamók. Néíbelékenya óbo aisík. Néítokí olíkai. Néísik póoki. Néjeu iltung'aná lé Ombalantu.

Néídip kókoô enkatiní. Néírrapírap Selma ílô shaní otíi embátá. Néjo. "Néaku olchaní óítajeúó iltúng'áná pookí."